Инмарлэсь мӧзмем лул

Удмурт Дунне
By Удмурт Дунне Декабрь 25, 2015 12:10
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Толсур — визян толэзь. Иисус Христослэн Вордӥськонэзлы (Ымусьтонлы) сӥзем кӧсутён кутскиз 28-тӥ шуркынмонэ. Со кыстӥськоз 6-тӥ толшорозь.

Тау карыса вӧсяськон

Куд-огез шуэ: Вордӥсь-конлы сӥзем пост Быдӟым визьдыр кадь чурыт ӧвӧл. Со сиськон ласянь небытгес. Ымусьтон азьын кӧсутён дыръя, зэмзэ но, арнянуналъёсы но праздник дыръя яра чорыг сиыны. Но мукет ласянь, котькуд визян вакыт огкадь юн куронъёс пуктэ оскись калык азе: шулдыръяськыны, шаянтыны уг яра, адямиосын тэрытӥськыса улоно, кураськисьёслы, шуге-леке шедем муртъёслы юрттоно, воргоронлы но нылкышнолы матысь кусыпъёслэсь возиськоно. Ӵемгес тыршоно причастие басьтыны. Со понна службае ветлоно, молитваосты, канонъёсты лыдӟоно. Нош визяны кулэ одно ик. Адями ассэ уг чакла, мугорзэ уг кыдаты ке, со лябӟе, зол ужаны кужмыз быре, висись луэ.

Озьы ик лябӟе лул. Со дӥсьтӥсьтэм, кышкась, керӟег луэ. Инмарлэсь мӧзмем лулэз ӵошатыны луоно тюрьмае пытсам сютэм адямиен. Сыӵе мурт кылем-мылем сиён вылэ омырскыны дась. Соин ик асьмелы котьку но тодамы возёно Дун-чылкыт Иоанн Кронштадтскийлэсь кылъёссэ. Та святой шуиз вал: туала адями воксё мыдлань улэ, солы ялан чылкытатӥськоно.

Причастие басьтэмды бере эн вунэтэ тау карыса вӧсяськыны. Шуыны луоз тазьы: «Инмаре, Кузё-Инмаре, Тыныд тау карисько монэ, сьӧлыкоез, кулэтэм карымтэед но Тынад Дун-сьӧлыктэм Тайнаяд пыриськыны лэземед понна. Монэ, ярантэм-лэсянтэм муртэ, ваньмызлэсь Дун-чылкыт Инмысь Кузьыменыд чылкытатӥськыны лэземед понна Тыныд тау карисько. Та Кузьым мынэсьтым лулме но, мугорме но мед бурмытоз, вань тушмонъёсме мед уллялоз, сюлмылэсь синзэ мед югдытоз, лулылы каньыллык мед сётоз, яратон мед сётоз, визь-нодэз, осконэз мед будэтоз, Тынад курон-косонъёсыдъя улыны мед юрттоз, Тон дорысь лыктӥсь дэлетэз мед йылэтоз но Тынад Инмысь Эксэйлыкад люкет басьтыны мед юрттоз. Кузё-Инмаре, Тынад Дун-сьӧлыктэм Мугорыд, Тынад Дун-чылкыт Вирыд сьӧлыкъёсмылэсь мозмытсконлы мед луоз. Та чылкытатӥськон мыным шумпотон, висьытэк улон, шулдыр мылкыд мед ваёз».

Кин ёрмиз,  со узырмоз

13-тӥ толсуре оскись калык буре вае Андрей Первозванный апостолэз. Та чорыгась нырысьёсыз радын, аслэсьтыз сюлмаськонъёссэ вунэтыса, Иисус Христос сьӧры вамыштӥз. Тодӥз ке но, секыт но сютэм улонэз чидано луоз шуыса. Иисус Христослэн дышетскисез Утисьмылэсь курон-косонъёссэ чаклаз. Иисус Христос шуиз вал: музъем вылын ёрмыса ул Инбамын узыр луон понна. Музъем вылын востэм но чидаса ул Инбамын пумтэм-йылтэм шумпотонэз тодон понна. Нуналысь нуналэ ужа утиськон нуналлы матэгес луон понна.

Сюрес возьматӥсь

17-тӥ толсуре сӥлы кариськом оскон понна курадӟытэм Дун-чылкыт Варвараез. Солы адямиос вӧсясько, шӧдтэк шорысь кулыса медаз кошке шуыса. Адями сопал дуннее кошкон азяз Святой Варваралы сюлмысь вазиське ке, со причастие басьтэм кадь лыдъяське. Озьы улонысь кошкем лул капчиен ортче Инмарлэн престолэз дорозь сюресэз. Со сюрес вылын адямилы возьматэмын, тодаз вайытэмын луозы вань лэсьтэм сьӧлыкъёсыз, урод малпанъёсыз но кырсь ужъёсыз.

Дун-чылкыт Варваралэн кулӥсьёс понна вӧсяськемез, юрттэмез сярысь уно учыръёс верало. Кылсярысь, Быдӟым ож дыръя госпитальёсын ӵемысь адӟылӥзы џашаен нылкышноез. Секыт сӧсырмыса кулон калозь вуэм солдатъёс дортӥ со ветлӥз вӧсяськыса. Вордскем музъем понна улонзэс сётэм ожгарчиос, одӥг молитва но ӧз тодэ ке но, Ин Эксэйлыке шедизы Святой Варваралэн молитваосыныз, Инмар азьын куременыз.

Дун-чылкыт Варвараез Инмарлы оскемез понна курадӟытыса виизы. Йыраз корт молотъёсын жугизы. Соин ик та святойлы вӧсясько на йыр висёнъёсын курадӟисьёс. Дун-чылкыт Варваралы ик адямиос вазисько, семьязэс секыт висёнъёслэсь утьыны курыса.

Юрттэ ваньмызлы

19-тӥ толсуре асьмеос буре вайиськом быдэс дуннеысь тужгес яратоно святителез Николай Чудотворецез. Черк тодэ та архиепископлэсь адямиослы ӝог юрттэт сётыны быгатэмзэ. Зарезь пыдсысь луолэсь но трос со паймымон учыръёс. Тани одӥгез гинэ: пинал кышномурт 4 аресъем пиеныз черке мынэ вал. Пиез, сюрес вылысь мае ке адӟыса, мумиз бордысь кизэ лэзиз но бызьыса кошкиз. Тэшкыли сюрес шоры дугдӥз. Ӵап со вакытэ пинал шоры грузовой машина лыктыны кутскиз. Кышномурт куалектэменыз пиез доры бызьыны ӧз быгаты, черектӥськиз гинэ: Святой Николай, уть. Грузовик пияш вылтӥ кошкиз. Нылкышно кожаз, пиналыз кулӥз. Макем паймизы анаез но та кышкыт учырез адӟем муртъёс, куке пияш тэтчыса султӥз. Мумиз пиналызлэсь юаз: «Пие, тон вӧсь ӧд луы-а?» «ќй, монэ пурысьтам дедуш асэныз шобыртӥз», — валэктӥз пинал.

Озьы Дун-чылкыт Николайлы адямиос вазисько, висьыны усё, семья кусыпъёссы сӧрисько, шудтэм учыръёс луо ке, сьӧд кужымъёслэсь, урод малпанъёслэсь мозмытскон понна, сюрес вылэ потыку, вуэ пырыку но мукет дыръя. Солэсь юрттэт куро Инмарлы оскись но черке ветлӥсьтэм муртъёс, ӟечезлы осконзэс ыштэм адямиос, узыръёс но начаръёс, нылкышноос но воргоронъёс.

Одӥг ке но, куинь

25-тӥ толсуре данъяськомы мукетсэ святителез — Спиридонэз, Тримифундский епископез. Со но, Дун-чылкыт Николай сямен ик, тодмо уно ӟеч ужъёсыныз. Та святойёс кыксы ик вуылӥзы Никея городэ Дуннеысь епископъёслэн нырысетӥ ӧтчамазы (соборазы). Отысен Святитель Спиридон возьматӥз, кызьы куинез одӥг луыны быгатэ: Инмар одӥг, но солэн куинь «ымнырыз» — Атай, Пи но Святой Дух. Святой Спиридон оскисьтэм калык азьын кияз из кырмиз, отысь огдыре ик потӥзы тыл но ву.

Ӧз сутске

30-тӥ толсуре буре вайиськомы оскон понна курадӟытэм Даниил пророкез но эшъёссэ Анания, Азария, Мисаил пиосты. Тушмон пленэ шедьыса, та егит адямиос Кузё-Инмармылы, Иисус Христослы осконзылэсь ӧз куштӥське. Со понна тушмонъёс пиосты ӝуась гуре куштӥзы. Но пинал муртъёс отын но, Инмарез данъяса, кырӟазы. Тыл соосты ӧз суты. Нош адямиос ӝуась гурысь адӟизы Кылчинлэсь туссэ, со сутӥсь тылэз салкым омырлы пӧрмытӥз.

Гажано лыдӟисьёс, вуись Выль аре Инмар сярысь эн вунэтэ, матэктӥсь праздникъёс асьмеды Утисьмылы матэгес мед карозы.

Матысь нуналъёсы черк пусъе:

13-тӥ толсуре — Андрей Первозванный апостолэз буре ваён.

17-тӥ толсуре — Оскон понна курадӟытэм Варвараез буре ваён.

19-тӥ толсуре — Николай Чудотворец святителез сӥлы карон нунал.

22-тӥ толсуре — Инмар Анайлэсь «Нечаянная радость» оброссэ сӥлы карон.

23-тӥ толсуре — Иоасаф Белгородский святителез буре ваён.

25-тӥ толсуре — Спиридон святителез буре ваён.

28-тӥ толсуре — Стефан святителез но преподобной Трифонэз буре ваён.

29-тӥ толсуре — Аггей пророкез сӥлы карон нунал.

30-тӥ толсуре — Даниил пророкез но Ананиез, Азариез но Мисаилэз буре ваён нунал.

 

Удмурт Дунне
By Удмурт Дунне Декабрь 25, 2015 12:10 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<