Чорыганъя ӵошатскон, пытсам почтаос но туала куронъёсъя лыдӟиськон

Удмурт Дунне
By Удмурт Дунне Декабрь 22, 2015 13:07

Сюмси

 Чорыгазы

Кылем суббота нуналэ Гуртлудысь ӵыпет вылын чорыганъя ӵошатскон ортчиз.

Ёросысь муниципал кылдытэтъёс куспын радъям спартакиадалэн со оглюкетэз вал. Ӵошатсконэ 20 мурт пыриськиз. 3 час куспын котькинлэсь трос чорыг люказы Дмитрошур, Кильмезь но Сюмси муниципал кылдытэтъёсысь вуэмъёс. Нош  огазеяськонъёс пӧлын висъяськизы культура удысын ужасьёслэн, ёрос администрациысь но егитъёслэн «Светлана» но ёросысь калыклы юрттэт сётонъя центръёсысь ужасьёслэн командаоссы. Тужгес бадӟым чорыг кутӥз Александр Возисов.

Юкаменск

Законэз уд гажаськы — тыр коньдон

Черкогуртысь пудо вандон интыез пудо эмъясьёс эскеризы.

Кызьы тодмо, кылем арын 1-тӥ майысен пудоез вандыны луэ нимысьтыз висъям интыын гинэ, отын сётэм документъёсъя ик сӥлез вузаны лэземын. Юкаменск черкогуртысь пудо вандон интыын куд-ог шекъёс шараямын. Кылсярысь, сӥль борды клеймо пуктылэмын вылымтэ. Юкаменскысь ужбергатӥсь ветеринарияя куронъёсты тӥямез понна кыл кутытэмын, солы 10 сюрс манет тыриськон пуктэмын.

Балезино

Зарни кузпалъёс

Ёросысь загсын ужасьёс 60, 55 но 50 ар ӵош улӥсь кузпалъёсты сӥлы каризы.

Котырес лыдпуссэс пусъёнэ 8 семья люкаськиз. Андрейшурысь Лидия но Вячеслав Князевъёс 60 ар валче уло, 6 пинал будэтӥзы, табере соослэн 9 внуксы но 10 правнуксы будэ. Балезино каргуртысь Лидия но Анатолий Чирковъёс 55 ар ӵошен уло. 3 пизы но 7 внукъёссы будо. Тамында ик ӵош улэмзэс пусйизы Балезиноысь Агния но Геннадий Дмитриевъёс, Сергиноысь Зоя но Виктор Некрасовъёс. Зарни сюанэнызы ӟечкылазы Шолокгуртысь Ия но Пётр Вахрушевъёсты, Балезино каргуртысь Тамара но Виктор Ворончихинъёсты, Маргарита но Анатолий Комаровъёсты, Заречной каргуртысь Елизавета но Анатолий Гординъёсты.

Дэбес

Пытсам почтаос

Котегурт но Бадӟым Ӟӧтым гуртъёсысь почтаос тунгонамын.

Котегуртысь почтаен кивалтӥсь август толэзе ик ужысьтыз кошкем, юрт кемалась выльдэм-тупатъямез кулэ каре, вылаз ик, пуэн эстоно. Нош Бадӟым Ӟӧтымысь почтаен кивалтӥсь октябрь толэзе ужамысь дугдэм. Эгра почтамтын ужасьёс верамъя, Дэбес ёросысь та почтаос огдырлы гинэ, пе, пытсамын. Отын ужаны мылкыд карисьёс шедизы ке, туннэ ик усьтӥськозы. Почтаен кивалтонэ нокинлэн ик пуксемез уг поты, угось газет-журналъёс вӧлмытэм, пенсия люкылэм сяна, сиён-юон вузанъя планэз но быдэсъяно. Ярано коть, та гуртъёсын умой ужало на почтальонъёссы, газетъёсты соос дӥне вайыса кельто.

Вавож

Дэмен ужало 55 ар  

«Удмуртия» хозяйство 55 ар тырмонзэ пусйиз.

Котырес лыдпуслы сӥзьыса, Бадӟым Кион гуртысь культура юртын сӥё-дано ужрад ортчиз. Сӥлы каризы колхозын ужам ветеранъёсты, орденъёсын пусъемъёсты. «Удмуртия» СПК шаерысьтымы тужгес адӟем карымонэз луэ. Татын ужасьёс туэ гужем котькуд гектарысь 33 центнер ю тысь басьтӥзы, нош тракторист Вадим Зарецких Россиысь устоез гырись луиз, нимыз шаерысьтымы Данъян пул вылэ пыртэмын. Кемалась ик ӧвӧл Эшъяськон орденэн пусъемын скал кыскись Татьяна Карпова. Ужрадын шуныт кылъёс веразы Бушмакинъёслэн, Овчинниковъёслэн, Зарецкихъёслэн, Пермяковъёслэн, Кузнецовъёслэн династиоссылы. Хозяйствоен 1987-тӥ арысен быгатыса кивалтэ  Аркадий Юшков.

Дэри

Устоез клуб

Та нуналъёсы тодмо луиз ёросысь тужгес устоез клуб.

Вормись луиз Докшаысь культура юрт. Быдэс ар ӵоже кыстӥськем вожвылъяськон 3 люкетлэсь вал. Кылсярысь, гурт клубъёсын тыршисьёс гужем ӵоже клуб котырзэс чеберъяны но ӟеч ужрад возьматыны кулэ вал. Докшаысь клубын ужасьёс ваньзэ пыр-поч быдэстӥзы. Соослы ик 50 сюрс манет тыр сертификат сётэмын. Та клубын адӟем карымон луо «Докшаночка» ансамбль но нылпиослэн «Радуга» коллективзы.

 Можга

 Пунэмаськыны умой…

Ёросысь судэ арысь аре тросгес вазисько пунэмъёссэс берыктыны быгатӥсьтэмъёс, тыриськонзэс нуйтыны курыса.

Коньдон ӵектӥсьёслэсь гочатӥсь ялонъёссэс город ульчаысь вамышлы быдэ пумиталод. Мазэ-созэ валатэк ик, адямиос пунэмасько. Коньдонэз басьтыны гинэ умой, нош сое берыктон троссэ секыт югдуре вуттӥз ни. Кылсярысь, кылем арын Можга ёросысь судэ 254 мурт, юрттэт курыса, вазиськиз, туэ ӝыны ар куспын гинэ — 156 мурт. Коньдонзэс тырыны уг быгато пӧртэм мугъёсъя: ужтэк кылё, тазалыксы лябӟе я эшшо мукет. Югдурез утён удысын ужасьёс ало: коньдон басьтыку, договорлэсь котькуд чурзэ сак лыдӟоно. Ӵем дыръя отчы ватӥське тужгес кулэез. Со муген ик одӥг манет вакчи дыр куспын сюрсъёслы берытске.

Кизнер

Лыдӟиськыны — выльдэм юртэ

Кылем арня пумын Кизнер черкогуртын выльдэм библиотека усьтӥськиз.

Туала куронъёслы тупась библиотека усьтэмын Удмуртиысь гуртъёсын модельной библиотекаос кылдытон программа чотын. Федерал бюджетысь висъям коньдонэн компьютер, фотоаппарат, 55 сюрс манет тыр выль книгаос басьтэмын. Кызьы вераз Кизнер ёросысь библиотекаосын кивалтӥсь Светлана Егорова, гуртоос тужгес шумпотэмын выль компьютерлы. Угось туннэ нуналлы ёросысь библиотекаосын таӵеез ӧй вал на.

Удмурт Дунне
By Удмурт Дунне Декабрь 22, 2015 13:07
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<