Ар йылпумъяськиз, лыдӟиськон — ӧз

Удмурт Дунне
By Удмурт Дунне 24 декабря, 2015 12:13
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

bag_320x480_frontУдмурт кун филармониын Литературалэсь арзэ йылпумъян но Кинолэсь арзэ усьтон ужрад ортчиз. Отчы пыриськизы шаерысьтымы кивалтӥсьёс, депутатъёс, писательёс, библиотекарьёс, культура но искусство удысын тыршисьёс.

Туала но вашкала, нылпиослы но бадӟымъёслы, ӟуч, удмурт но кунгожсьӧр — ваньмыз со литература сярысь. 2015-тӥ аре асьмеос котькудмы тросгес лыдӟиськимы, дыр. Литература — со калыклэн визьмыз но узырлыкез. Культурая но туризмъя министр Владимир Соловьёв ортчем арлы йылпумъянъёс лэсьтӥз но тау кариз ваньмызлы, кин лыдӟиськонэз, книгаез яратонэз матэгес кариз адямиослы, литератураез азинтонлы кужымзэ, дырзэ, тодон-валанзэ сётӥз.

— Шуг-секытъёс шоры учкытэк, туэ шаерысьтымы библиотекаослэн книга фондъёссы трослы узырмизы. Уно выль изданиос потӥзы, П. Чайковскийлэн юбилеезлы но Быдӟым Вормонлы 70 ар тырмонлы сӥзьыса. Таиз ар йылпумъяське ке но, литературалы сӥзем конкурсъёс, адӟытонъёс, проектъёс азьланьтӥськозы вуоно арын, — шуиз Владимир Соловьёв.

Туэ Удмурт Республикалэн Правительствоез сётъяны кутскиз Зоя Богомолова нимо премия. Со сётӥськоз арлы быдэ кык номинацияя. Та ужрадын пусъемын вал нырысетӥосыз лауреатъёс. «Литератураын критика» номинациын З. Богомолова нимо премиез басьтӥз литературовед, кылбурчи, публицист Алексей Арзамазов. Нош «Библиотека но лыдӟиськон» номинациын пусъемын Ижысь библиотекаосын кивалтӥсь Светлана Гусева «Лыдӟиськы, Ижевск» фестивалез усто радъямез понна.

Литература ар йылпумъяськиз шулдыр концертэн. Люкаськемъёслы ӟеч мылкыд кузьмазы балетъя «Радуга» нылпи театр, крезьгуръя колледжысь студентъёс, кылбурчи но кырӟась Богдан Анфиногенов. Удмурт кун филармониысь академической хор капелла (кивалтӥсез — Андрей Елисеев) быдэстӥз Герман Корепановлэсь но Ашальчи Окилэсь «Нюлэскы но ветлыкум» кырӟанзэс. Правительстволэн Тӧроезлэн воштӥсез Сергей Фефилов пусйиз:

— Вуоно арлы культура удыслы бюджетэз чаклан азьын кылзоно та капеллаез, собере ини кутоно бюджетэз. Культура яке экономика валтӥсез, озьы висъяны уг луы, дыр. Малы ке шуоно культураез шӧдӥсь-валась адями гинэ тыршоз улонэз, котырзэ чебергес, чылкытгес но умойгес карыны.

Литературалэн арез чотын ик туэ шаерамы паськыт ортчиз «Лыдӟиськись Удмуртия» марафон. Солы йылпумъянъёс лэсьтӥз Кун Кенешысь Наукая, дышетонъя, культурая но егитъёсын ужанъя ялан ужась комиссилэн кивалтӥсез Наталья Сударикова. Та ужрадэ мыло-кыдо пыриськемзы понна республикаысьтымы устооссэ библиотекаосты синпель кузьымъёсын пусйиз.

«Лыдӟиськись Удмуртия» марафонэ, кылсярысь, мыло-кыдо пыриськиз Сарапул «Надеждалэн городэз» проектэныз, Пичи Пурга ёросысь библиотека «Кужмо Пурга выжые» лыдӟонъёс понна пусъемын вал, шарканъёс удмурт литературалы сӥзем «Вордскем шаермес данъяса» арня ортчытӥзы, яръёс — «Ваньмы — парке» проект.

Та ужрадын ик сӥлы каризы «Бадӟым лыдӟиськон-2015» проектъя конкурсын вормисьёсты. «Литература карта» номинациын устоез луиз Эгра ёросысь библиотека. Эграос кылдытӥллям районзылэсь литературая электрон картазэ. «Дунне котыртӥ» номинациын вормизы дэриос «Выжыкыл дунне — финноугрия» проектэнызы. «Сюрес дневник» номинациын тужгес тунсыко вал Воткинскысь 7-тӥ библиотекалэн ӝог лыдӟиськонлы сӥзем ужез. Воткинскысь ик эшшо одӥгез библиотека «Песятайлэн шуныт коркаяз» проектэн вормись луиз на.

Литература арез кайта азьланьтоз Кинолэн арез, соос уго ог-огзылы мурт уг луо.

Галина Семёнова

 

Удмурт Дунне
By Удмурт Дунне 24 декабря, 2015 12:13
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<