Анастасия Шумиловалэн «Дыр-эктон» кылбур бичетэз потӥз

Удмурт Дунне
By Удмурт Дунне 17 декабря, 2015 09:26
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

afishaЛитература ингожын выль кизили ӝуатскиз. Мукет сямен шуыны уг луы, егит кылбурчилэсь Анастасия Шумиловалэсь «Дыр-эктон» кылбур бичетсэ лыдӟыса. Авторен но солэн книгаеныз тодматскыны луоз 22-тӥ толсуре 19 часын Ижысь Генерал юртын.

 Удмурт литература мӧзмиз вал ни таӵе мур пуштросо, визьмо, трос культураосты огазеясь кылбуръёслэсь. Куд-ог гожъямъёссэ валан понна тодоно удмурт мадёсъёсты, вашкала Грециын кылдэм мифъёсты, дуннелы тодмо луэм режиссёръёсты, писательёсты но соослэсь ужъёссэс. Быдэс бичетэз пыр пото «дыр», «эктон», «огнамо улон», «кылбуретэз яратон» валатонъёс.

—  Авторлэн «дырез» «эктэ», вылтыре «дыректон» лэзьыса, — гожтэ «Удмуртия» книгапоттоннилэн чеберлыко литература ёзысьтыз редактор, писатель С. Матвеев. — Мар бен, сборниклэн нимыз кельше мыным. Одӥг ласянь. Мукет ласянь учкыса, паськыт «дыр» валатонэз мугорлэн сюбег кабъёсаз пыртэ но огшоры «дыректонэ» вуттэ. «Дыр пунысюлэн биниськоз, мугордэ кекатоз, кый выллем», соку вузыны гинэ кылёз на: «дугды, дыр, тырмоз оломар дауртыны мынам сотэк но ӧвӧлтэм дауреным».

Ачиз Настя вера, кылбурет борды со котьку кыстӥськылӥз, но гожъяськон мылкыдзэ пачкатылӥз кышкан, кылбуръёсыз огшорыесь но толыктэмесь луозы шуыса. Но тани аръёс ӵоже пушкын бугыръяськонъёс, дуннеын ас интыдэ утчан кисьтӥськиз «Дыр-эктон» бичетэ. Табере мон тодӥсько, мар со пумтэм шумпотон но лул дырекъян, шуэ Настя Шумилова. Кылбуръёссэ гожъякуз, Настя улӥз ӵапак сыӵе мылкыдъёсын.

nastya shumlo1

Анастасия Шумилова вордӥськиз Пичи Пурга ёросысь Орлой гуртын.

«Дыр-эктон» кылбур бичетэн тодматскон ӝытын Настя Шумиловалэн творчествоез сярысь мылкыдъёссэс вералозы «Удмурт дунне» газетлэн валтӥсь редакторез Зинаида Рябинина,  Удмурт кун университетысь  литературоведъёс Виктор Шибанов, Светлана Арекеева, Наталья Кондратьева но мукетъёсыз. Со сяна, егит авторлэн эшъёсыз трос кузьымъёс дасязы. Кылсярысь, та ӝытэ Настялэн куд-ог кылбуръёсыз кырӟанэн чузъяськозы. Озьы ик авторез ӟечкыланы вуозы кырӟасьёс Алексей Пикулев, Анна Образцова, вашкала кырӟанъёсты быдэсъясь Dukes группа но мукет егит аристъёс. Ӝыт таин гинэ уз йылпумъяськы, вань мылкыд карисьёс кылёзы Dart газетэн радъям Выль ар шулдыръяськонэ.

Анастасия Шумилова вордӥськиз Пичи Пурга ёросысь Орлой гуртын. 2013-тӥ арын быдтӥз Удмурт кун университетысь удмурт кылосбуръя факультетэз, али тодон-валанъёссэ муромытэ Тарту университетысь философия факультетысь докторантураын. Мылысь-кыдысь пыриське егитъёслы Dart газетэз дасян уже, гожъя малпаськытӥсь, ужпумъёсты сэрттӥсь-пертчись статьяос, книгаослы но киноослы рецензиос.

Удмурт Дунне
By Удмурт Дунне 17 декабря, 2015 09:26