Анай кылъя дышетӥсьёслы вуоно арын магистратура радъяськоз

Удмурт Дунне
By Удмурт Дунне 22 декабря, 2015 11:47
удмурт

Со вакытэ анай кылъя дышетӥсьёслы вакансиос туж ӧжыт.

Анай кылэз дышетон удысын вуоно арысен воштӥськон луоз. Россиысь та ӧрын ужась вузъёсысь магистратураын визь люканы мылкыд карись пиналъёс понна тросгес инты висъяны косэмын.

Жаляса верано, диплом басьтыса гуртысь школаосы мынӥсез уг сюры. Со вакытэ анай кылъя дышетӥсьёслы вакансиос туж ӧжыт. Нош али ужасьёслэн шоро-куспо арлыдзы 48 арес. Дасо ар ортчыса, анай кылъя дышетӥсьёстэк кыльыны быгатомы.

— Таӵе югдур шугъяськытэ, — шуэ дышетонъя но наукая министр Алексей Мирошниченко. — Визьнодасьёсты дасясь учреждениослэн кивалтӥсьёссы азе ужпум пуктӥ: вуоно арысен уногес дасяно анай кылъя дышетӥсьёсты. Глазовысь пединститутлы но Удмурт кун университетлы ӵектэмын: та удысъя дышетон часъёсты но ӧръёсты йылтоно. Паймоно кадь: артысь Башкортостанын анай кылынызы визьнодасе дышетскыны мылкыд карисьёс трос люкасько, конкурссы бадӟым.

Асьмелэн ӧвӧл анай кыллы дышетӥсьёсты магистратураын дасянъя рос-прос программаос. Глазов пединститутэз али косэмын со программаосты кылдытыны. Пӧрмыны кулэ.

Зэм, магистратураын интыосты йылтон уг вера на, отчы соку ик адямиос куриськозы шуыса. Туала вакытэ егитъёслы гочатон кулэ. Алексей Мирошниченко таин соглаш. Кылсярысь, Нижний Новгородын 2006-тӥ арысен гуртэ бертэм специалистлы соку ик сёто квартира но машина. Удмуртиын туэ быдэс ар гуртысь школаосын ужам дышетӥсьёслы быдэн 40 сюрс манетэн висъязы. Сыӵеос 192 кузя люкаськизы. Вуоно арын ужазы ке, эшшо 60 сюрс манет басьтозы, куинетӥ арзэ возиськизы ке — эшшо 80 сюрс манет. Юрттӥсько на ёрос администрациос, пиналлы вузэ дышетскыны пырыны целевой направление сётыса. Озьы диплом басьтэм мурт одно ик ёросаз кӧня ке ар ужаны кулэ. Нялтас вераса, Алексей Мирошниченко пусъемъя, мукет улосвылъёсын сярысь, шаерысьтымы пиналъёс вузъёсы направлениос ӵемгес басьто. Соос уго тодо ни: гуртазы возьмало.

— Специалистэз дасян но сое интыян сярысь гинэ сюлмаськоно ӧвӧл, — шуэ Алексей Анатольевич. —  Анай кылъя дышетӥсьёс понна тодон-валанзэс будэтонъя курсъёс ӧвӧл, шуыны луоз. Дышетонэз азинтонъя институтэн валче та сярысь али малпаськиськомы, программаос дасяськозы. Вуоно арын Можга педколледжез национальной кадръёсты дасянъя центр карыны чакласькомы. Со сяна, сыӵе ик центр ужалоз Глазовын.

Елена Сараматова

Удмурт Дунне
By Удмурт Дунне 22 декабря, 2015 11:47
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<