2015-тӥ арын Кун Кенешысь депутатъёс 104 закон юнматӥзы

Удмурт Дунне
By Удмурт Дунне Декабрь 30, 2015 09:05
IMG_6916

В. Невоструев: бюджет удысын тыршисьёслы уждун тыронэн ӝеганъёс ӧвӧл.

Кун Кенешлэн Тӧроез Владимир Невоструев парламентлэн туэ ужамезлы йылпумъянъёс лэсьтӥз.

— Ар пӧртэм ужрадъёсын яркыт вал, — шуиз со. — Одӥгез валтӥсез соос пӧлысь — Кун Кенешлы 20 ар тырмон. Сое пусйим мартэ. Юбилей ужрадэ ӧтчамы витьысьтыз ик созывъёсысь депутатъёсты. Ӧм кельтэ солэсь азьло, Верховной Советын, ужамъёссэ но. Соос вакытэ юнматэм законъёс пӧлысь туннэ но котькуд куинетӥез ужа, отчы куд-ог воштонъёс но ватсанъёс гинэ пыртэмын. Соос ик дасязы элькунмылэсь валтӥсь документсэ — Конституциез.

2015-тӥ арын Кун Кенешысь депутатъёс 104 закон юнматӥзы, со пӧлысь 30-эз чылкак выль луо. Нош кызьы соос быдэсъясько — депутатъёс чаклало, интыосы потаса. Озьы туэ Кун Кенешлэн нуналъёсыз ортчизы Глазовын но Дэриын.

— Калык пӧлы потаса, умой-умой адӟиське, макем шонер кутэмын соиз я таиз закон, мар люкетэ сое быдэсъяны, — пусйиз Владимир Петрович. — Луылэ сыӵеез но: адямиос куд-ог законъёс сярысь тодыса уг вутто. Соин ик валэктон уж но нуоно луэ.

Кун Кенешлэн тазьы калыклы матэгес кариськемезлы синмаськизы ни Киров улосысь депутатъёс — ас доразы но та амалэз пыӵатоно кариськизы. Озьы ик  уртче, ог-огзылэсь дышетскыса ужан сярысь огкылъёс туэ гожтэмын Нижний Новгород улосысь Думаен, Москваысь город Думаен.

— Табере сюрес тодӥськом Кун Думае но, малпасько, ӵемгес отчы вуылом, бюджетамы ватсаса коньдон кыском, — шуиз Кун Кенешлэн Тӧроез. — Москваын Удмуртилэн нуналъёсыз туж пайдаё ортчизы — уно пумиськонъёс-кенешонъёс вал. Соослэн емышсы адӟиське ни. Вуоно арлы бюджетэз эскерыку, доход люкетаз ватсаса 1 миллиард 600 миллион манет чакламы — со Россиысь вуэм дотациос. Россилы луыса ик коммерческой банкъёс азьын кредитъёсмес пичиятыны быгатӥськом, озьы бюджетысь ог 500 миллион манетэз шыръяны луонлык кылдӥз.

Оскон вань, Удмуртилэн мукет но ӵектонъёсыз улонэ пыӵаны быгатозы шуыса. Кылсярысь, Москваын Удмуртилэн нуналъёсыз дыръя ик вераськон ӝутэмын вал: Россиын 10 пала гинэ улосъёс кылемын, кудъёсызлэн ог 65 процент люкам вытъёссы кошко федерал центре. Россиысь юрттэттэк таослэн коньдонзы уг кыльы ни улоссэс азинтонлы, бюджетысь ваньмыз сямен коньдонзы кошке социальной удыслы. Удмуртия али ӵапак таӵе югдуре вуэмын. Соин ик Россия, пе, тае лыдэ мед басьтоз вылэм.

Но секыт югдур шоры учкытэк, асьмелэн бюджет удысын тыршисьёслы уждун тыронэн ӝеганъёсмы ӧвӧл — мукет улосъёсын со вань ни. Азинтэмын сюресъёсты лэсьтон, социальной удыслы юртъёс пуктон но мукетыз. Озьыен, 2015-тӥ арлы бюджетмы валаса кутэмын вал. 2016-тӥ арлы бюджетэз юнматон азьын но депутатъёс трос  пумиськонъёс-кенешонъёс ортчытъязы, лыдэ басьтӥзы общественной огазеяськонъёслэсь но, парламентэ пырисьтэм партиослэсь но мылкыдзэс.

Кун Кенешлэн Тӧроез оскемзэ вераз асьме гурт хозяйствоослы, промышленной предприятиослы.

— Гуртоос азе ужпум пуктэмын: 2020-тӥ арын 1 миллион тонна йӧл кыскыны кутсконо, — шуиз со. — Малпасько, соос тае вормозы. Угось туэ ик куд-ог хозяйствоос басьтӥськизы ватсаса 500-1000 пудо йырлы фермаос пуктон борды. Вуоно арын но та уж борды кутскыны чакласьёс ӧжыт ӧвӧл.

Шуг-секытъёслы ӧз сётске тросэз предприятиос но. Кылсярысь, Ижысь автозавод, кылем арен ӵошатыса, 153 процентлы тросгес «Лада Веста» машина поттыны быгатӥз. Ӧз ӵемтӥське, кылем арынлэсь тросгес вуз поттыны быгатӥзы «Аксион-холдинг», Ижысь радиозавод, Воткаысь машина поттон завод но мукетъёсыз. Куд-ог предприятиос выль вузъёс поттыны кутскизы. Кылсярысь, Уваысь «Арион» огазеяськон фанера дасян борды басьтӥськиз — лэсьтӥськон удыслы ӟеч юрттэт луоз.

Владимир Невоструев малпамъя, котькуд удысын бадӟымесь азинсконъёс басьтыны луоно — со понна огкылысь тыршоно.

Элина Кумачёва

 

 

Удмурт Дунне
By Удмурт Дунне Декабрь 30, 2015 09:05
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<