Сиён-юонлы дунъёс ар ӵоже ог 10 процентлы ӝутӥськизы

Удмурт Дунне
By Удмурт Дунне Декабрь 30, 2015 09:45
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

сараматова

Кытчы гинэ эн учкы — улон дуноя.

Удмуртстатлэн кивалтӥсезлэн воштӥсез Татьяна Фалалеева верамъя, тужгес зол куртчылӥськыны ӧдъяз сылалтэм сельдь — ар куспын 37 процентлы дуныз будӥз. Кылем арын декабре солэн киллограммез 128 манет сылэ вал ке, али — 175 манет  вылын. Чорыг дун сьӧры ик уйиськиз кӧсвӧйлы дун — 28 процентлы йылӥз. Ар кутсконын сое шорлыдын 80 манетэн шедьтыны луэ ке вал, ноябрь толэзе дуныз 103 манет вылэ тэтчиз. Кисыез зол бушатэ чай: килограмез сылэ ни 659 манет. Асьме дорын со уг буды. Нош палэнысь вуттон дунтэм уг усьы. Эшшо ке санкциосын сэрен дунъёс ӝутӥськизы. Но асьме заводъёсын потӥсь, асьме бусыосамы будӥсь продукцилы но дун тэтчиз. Кылсярысь, сыр ог 27 манетлы дунояз, нянь — 5 манетлы. Курегпуз дун гинэ 4 манетлы усиз — сылэ 58 манет. Нялтас вераса, Приволжск федерал округысь 14 улосвыл пӧлысь няньлы но йӧллы дунъёсъя Удмурт шаер 5-тӥ интыын сылэ (нырысетӥ интыын — бадӟымез дун). 3-тӥ инты басьтӥськомы сакыр, сылал, макарон дунъёсъя.

дунъёс

Зэм, уждун но будӥз 1 сюрс 409 манетлы. Октябрь толэзе со 24 сюрс 669 манет лыдъяськиз. Но со дыре ик коммунальной услугаослы, бензинлы но дунъёс ӝутӥськизы ук. Удмуртстат ивортэмъя, ноябрь толэзе, октябрен ӵошатыса, калыклэн доходэз 10,2 процентлы кулэсмиз. Адямиос кисызэс  чакланы ӧдъязы. Но сиён-юонэн вуз карисьёс  верамъя, калык мае ке нимысьтыз воксё басьямысь ӧз дугды. Сакыр но, нянь но озьы ик басьто, но ӧжытгес.

Ыштонъёс адӟыны кутскизы гурт хозяйствоос.

— Сӥзьыл ик зол адӟиськиз ни: адямиослэн басьяськыны луонлыксы кулэсмиз, — шуэ Пичи Пурга ёросысь «Надежда» хозяйствоен кивалтӥсь, Кун Кенешысь депутат Бронислав Ясонов. — Берло дыре вузлы дунъёс огкадьгес возисько ке но, калык уксёзэ ӝикыт кутэ.  Адямиос уго кредитъёсы выемын, соосты ӵоксаны тыршо. Эшшо ке банкъёс процентъёссэс ӝутӥзы. Куд-огез возьмаса пуке, магазинъёс дунъёсты уськытозы шуыса. Ма, дунъёсты кулэстон но барыш уг вайы ни. Кылсярысь, кубиста магазинын али 17 манет котыр сылэ, нош ар кутсконын сое 29-эн вузаллязы. Сыџе ик югдур картошкаен. Сӥзьыл 1 килограмм картошка 8-9 манет сылэ ке вал, али со 6 манетозь вуиз ни. Миым таӵе вакытэ 15 манетэн вузаськомы ни вал. 6 манетэ кылён ыштонъёс вае. Гуосын мускыт медаз луы шуыса, вентиляторез ужатоно, картошкаез бырйыса мешокъёсы тыроно, адямиослы уждун люкылоно. Ыштонъёс бадӟымесь луизы ке, тулыс амалтэк музъеме удобрение но ӧжытгес поттод ни. Оло, бусыдэ но кулэстод. Туэ шаерамы 40 процентлы уногес картошка мерттӥзы. Адямиос асьсэос но сад-бакчаосазы сое будэтӥзы, урожай бадӟым вал. Соин но магазинысь бакча сиён шоры уггес учкыло на. Котьма ке но гужем туала куронъёслы тупась хранилище пуктыны малпаськомы. Адями уго сиськемысь уз дугды. Со дышоз выль сямен, выль дунъёсын улыны. Адями котьмалы дыше.

Вуоно арысен бадӟымесь машинаос федерал трасса вылтӥ ортчемзы понна уксё тыроно луозы. Промышленностья но вуз каронъя министрлэн воштӥсез Галина Трегубова верамъя, таин сэрен дунъёс 1 процентлы ӝутӥськозы.

Туала вакытэ бырйиськыны луонлык вань: магазинъёс лачак. Вуз каронъя базаосын, складъёсын вуз зэмен ик кӧня ке манетлы дунтэмгес. Но бензин дунэз лыдъяд ке, секыт сумкаостэ ӝутъяндэ малпад ке, ныр улысьтыд магазинысь ик басьяськыны капчигес кадь.

Инфографика лэсьтӥз В. Штыкова

Удмурт Дунне
By Удмурт Дунне Декабрь 30, 2015 09:45
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<