будэме уг поты… Вань-а быдэ вуонлэн эсэпез?

Удмурт Дунне
By Удмурт Дунне 24 декабря, 2015 09:18
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
yv5tTAsfodQ

Бадӟым будыса но шудэм потэ…

Егит муртэн ниманы олокинэ но луэ — быдэ вуымтэзэ но быдэ вуэмзэ, школаын но университетын дышетскисез яке ужась муртэз.

«Егит» кыллы матын луэ «пинал» кыл. 12 аресъем пияш нылпи ӧвӧл ни, но пинал ай. Нош 35 аресъемез егитысь потыны дасяське ини. Но со ваньмыз, зэмзэ ке, лыдпусъёс гинэ. Нош улонын ваньмыз сураськемын.

Берло дыре киноосысь, сериалъёсысь, книгаосысь ӵем адӟыны луэ выль геройёсты. Со быдэ вуэм адямиос, кудъёсызлы кельшо фэнтези, комиксъёс, мультфильмъёс, супергеройёс сярысь киноос, компьютер шудонъёс. Куддыр соос анай-атайёсынызы ӵош уло. Соослэн уг поты кышнояськемзы яке нылпи ваемзы, кин ке понна кыл кутэмзы. Кызьы ортчиз президентлэн пресс-конференциез яке ку «Звёздные войны» киноэпопеялэн выль эпизодэз потоз юанъёс пќлысь быръёно ке, соослы тунсыкогес кыкетӥез.

Со — кидалтъёс (англи кылысь kid (нылпи) но adult (быдэ вуэм) кылъёслэсь пӧрмытэмын). Зэмзэ вераса, удмурт кылын сое вераны но секыт. Кин со? Быдэ вуэм нылпи — уг тупа. Быдэ вуымтэ воргорон/кышномурт? Кисьмамтэ быдэ вуэм мурт? Мед луоз кидалт ик. Нырысь ик пусъёно, со психикаен герӟаськем висён ӧвӧл — кидалтъёс пӧлын трос вылӥ образование басьтэм, трос коньдон поттӥсь адямиос. Европаысь кунъёсын но Америкаын кидалтъёсты субкультура гинэ уг, выль поколение шуо ни.

Общество ачиз кылдытӥз та адямиосты. Тросэз кидалтъёс пичи дыръязы нокыӵе шуг-секытъёсты адӟемын ӧвӧл, соос дышемын озьы улыны — номыр сярысь малпаськытэк, весь шудыса. Потребительской обществолы туж тупало таӵе адямиос — соос малпаськытэк уксёзэс кыӵе ке чыры-пырыослы быдтыны дась. Кидалтъёс коньдонзэс уг люкало, уксёзэс кыӵе ке визьмо проектъёсы понон сярысь уг малпасько, нылпи будэтэмзы уг поты. Кунлы сыӵе асьсэды гинэ тодӥсь гражданинъёс туж ик кулэ ӧвӧл.

Историез чаклано ке, паймоно — кыӵе вошъяськиз адямилэн быдэ вуэмез шоры учкон. Но общество котьку тодэ вал, ма адямилы кароно сыӵе яке таӵе арлыдэ. Шуом, азьло 12-13 аресъем муртъёсты бызьыто-кышнояськыто вал ини. Нош али 18 арескозь пинал вайид ке — кырыжгес учкозы. 28 аресказ кышномуртлэн нылпиез ӧвӧл на ке — соиз но туж ик умой ӧвӧл ини.

Али Россиын адями быдэ вуэмен лыдъяське 18 арескысеныз. Но та нырысетӥ этап гинэ. Адями валаны кутске, кин со, маин солы вырыны кельше, кыӵе адямиос солы ярало, ваньзэ утчамез-оскалтэмез потэ, ас понназ гинэ улысал. Со ӧвӧл ни нылпи, со закон азьын кыл кутэ, анай-атайёсыз  борды думылэмын ќвќл, но со дыре ик сое быдэ вуэм мурт но шуыны шуг на. Со ассэ утча, улонын аслыз инты шедьтыны тырше.

Куд-огез адямиос, оло, дыр ортчемъя шудонъёслэсь но акыльтозы, семья но кылдытэмзы потоз, но общество соосты дыртытыса, ас чурыт катъёсызъя улыны курыса, кидалтъёс пӧлы пыртэ ини. Зэмзэ ке, лыдэ басьтоно, быдэ вуэмез возьматӥсь арлыд берло дыре будӥз шуыса. Адямиос нырысь вылӥ тодон-валан басьтыны, пыд йылазы султыны, ас понназы ганяк улыны тыршо, собере гинэ семья кылдыто, корка сярысь малпасько, нылпи ваё. Котькин ачиз быръе ини, ма солы кулэ.

Ачим сярысь ке верано —  пичи дыръям бадӟымъёс мыным визьмоесь пото вал, ваньзэ тодӥсесь, вань шуг-секытъёсты вормыны быгатӥсесь. Алигес йырам лыктӥз — ма, асме но, вылды, быдэ вуэмын шуыны луоз ини. Нош мынам чик уг поты на малпаськеме «быдэ вуэмъёслэн ужпумъёссы» сярысь. Мон али но шумпотыса лыдӟисько «Денискины рассказы» но «Гарри Поттер» книгаосты, учкисько «Звёздные войны» киноез но мультфильмъёсты, суредасько комиксъёсты. Семья сярысь, нылпи ваён сярысь малпаськеме уг на поты. Огез яратоно фильме — Ноа Баумбахлэн «Милая Фрэнсис» ужез, отысь героиняез ӵапак кидалт ниманы луоз. Та режиссёр ӵемысь возьматэ кыӵе ке эсэплы тупасьтэм геройёсты — огез критик соос сярысь гожтӥз вал: соослы кельше вуоноезлы осконэн улыны, кинлы ке сыӵе оскон сётыны, но маке зэмзэ но лэсьтыны соос уг дырто. Тае нырысьсэ лыдӟыкум, пӧсь вуэн пыласькем кадь луи, мон сярысь верамын, потӥз. Бен, будэмъя малпаськиськод, адямиослэсь витёнзэс быдэстыны дыр вуиз шуыса. Но куддыр сыӵе потэ нылпи гинэ луэм. Мон ачим но кидалт, лэся…

Анастасия Шумилова

Туспуктӥз А. Першин

Удмурт Дунне
By Удмурт Дунне 24 декабря, 2015 09:18
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<