«Шунды» огазеяськонлэн «Вуюись» семинарез ортчиз

Удмурт Дунне
By Удмурт Дунне 14 декабря, 2015 08:59
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

10-тӥ-12-тӥ толсуре «Дзержинец» лагерьын радъяськиз «Шунды» огазеяськонлэн «Вуюись» семинарез.

Ужамы 4 секциосын: PR технологиос, мерлыко  огазеяськонъёс, ужбергатон  но брендинг.  Туала улонын та ӧръёс бадӟым инты басьто ни ке но, мон понна соос туж тунсыкоесь но вылесь. Мон вал PR секциын. PR юрттэ мерлыко огазеяськонъёсты азинтыны, соин ик ӵемгес соослэн ужзы сярысь газетын, радиоын но телевидениын верано, вотэсын пӧртэм тунсыко конкурсъёс но обзоръёс кылдытъяно, огазеяськонлэн пусэныз кузьымъёс поттоно.  Кык нунал куспын валай: татын басьтэм тодон-валанъёс нокинлы мултэс уз луэ, та удысын адями ужаны уг малпа ке но.

вуюись

PR юрттэ мерлыко огазеяськонъёсты азинтыны.

Лагерьын тодон-валан басьтон пӧрмиз кадь шутэтсконлы. Ӧвӧл, мон тэк ӧй пукы, шараяй малпанъёсме. Кылсярысь, кызьы луоз адямиосты сояз яке таяз ужрадэ кыскыны, кызьы соосты огазеяськонэн тодматоно. Туж сак кылзӥськи дышетӥсьмес Анастасия Бекмачеваез, со милемлы тунсыко мадиськиз, куд-ог дыръя серекъятӥз но. Йыр но, лул но шутэтскизы кадь.

Семинарын тодӥмы, кытчы кужымзэс ӧръяны быгато удмурт егитъёс, кылсярысь, блог нуонэ, «Удмурт дунне» но Dart газетъёсы гожъяськонэ, удмурт культураез азинтонэ.

«Дебаты» шудон но тодам кылиз. Куать команда пӧртэм ужпумъёсъя малпаськиз: Интернетлэн кулэлыкез бордысен кутскыса, И. Сталинлэн кивалтэмез дорозь. Милям секцимы вормисе ӧз ке но поты, мылкыдмы ӧз усьы.

Со сяна, радъямын вал Удмуртилэн Тӧроеныз А. Соловьёвен пумиськон. быгатӥмы сюлмаськытӥсь юанъёсмес солы сётыны но ӟеч валэктонъёс кылыны.

— Ужрад мыным трос пайда вайиз, малы ке шуоно нюръяськи возьдаськонэным, йырвизьме сынай, быгатӥ малпанъёсме адямиослы валэктыны, азьланяз но пыриськысал на та шудонэ, — шуэ Аня Самсонова.

Ӝытъёсы йыръёсмылы шутэтскыны сётӥмы. Нырысетӥ нуналаз «Эктон коркаен» вашкала удмурт эктонъёсты, пыдъёсмес жалятэк, туж мыло-кыдо тыпыртӥмы. Валаны ӧз луы, кытын экто профессионалъёс, нош кытын дышетскисьёс.

— Удмурт калыкез эктыны ӧвӧл дышетоно, та быгатонлыксы соослэн вордскыкузы ик пушказы пуке ни, соин ик та выллем ӝытъёсы ваньзы ас интызэс шедьто, — вераз «Эктон корка» студилэн кивалтӥсез Андрей Прокопьев.

Та нуналъёсы мон нош ик выйи «Шунды» огазеяськонлэн тулкымъёсаз, адӟиськи эшъёсыным но тодмоосыным, вераськыса кылы ик ӟугаськиз.

Оглом вераса, ми трос ужамы, пӧртэм адямиосты кылзӥмы, эктӥмы, шутэтскимы одӥг кадь дышетскон нуналъёслэсь, городлэсь, вань шуг-секытъёслэсь! Таӵе слётъёсты, мон малпамъя, одно ик азинтоно, соос сёто выль мылкыд, выль тодон-валанъёс.

Мария Емельянова

Удмурт Дунне
By Удмурт Дунне 14 декабря, 2015 08:59
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<