Выль аре — корт кыз но кынмымтэ зарезь

Удмурт Дунне
By Удмурт Дунне 24 декабря, 2015 08:41

дашаТуэ 2-тӥ арзэ Выль арез но Вордӥськонэз Португалиын быдэс Европаен валче пумитасько.

Россиын улӥсьёс Выль ар уез возьмало ке, Европаын вань калык чидатэк вите Ымусьтонэз. Католикъёс Рождествоез 24-тӥ толсурысь 25-тӥ толсуре потон уе пусъё. Но солы дасяськон трослы вазьгес кутске.

Зэмзэ верано ке, Португалиын Выль ар но Ымусьтон шӧмез валаны турттыса, кате быре. Угось лымы но кезьытъёс татчы уг вуыло. Синъёсы али ке но дэймо, кар шорысь кортлэсь лэсьтэм чилясь кызэз яке мишураен шобыртэм кактусъёсты но пальмаосты адӟыса.

Ымусьтонлы дасяськон быдэс толэзь кыстӥське. Вань покчиослы нимысьтыз дырпус (календарь) басьто: 1-тӥ толсурысен 25-тӥ толсурозь покчиос со борды юнматэм пуйыосысь нуналлы быдэ кампет сиё. Нош арлыдоос понна шулдыръяськонлы дасяськон зэмос йыртӥянлы пӧрме: котькуд ӵыжы-выжылы кузьым шедьтоно, праздникез пусъён понна корка быръёно, куно ќтёно.

Ымусьтонысен Выль арез пумитан дорозь Португалиын — шутэтскон нуналъёс. Ваньмыз чиля, синмез мальдытэ но шумпоттэ. Котькытын усьтӥсько базаръёс. Ӵемысь отысь адямиос басьяло кузьым. Мае но татысь уд шедьты!!! Киын лэсьтэм бижутерия, куэм яке керттэм дӥськут, сиён-юон. Ӝыт пал таӵе базаръёсын  концертъёс ортчыло. Учкисьёс, бер ӝытозь медаз кынме шуыса, пӧсятэм яке джинжа юо. Таӵе суредэз быдэс Европаысь адӟыны луэ.

Ымусьтон уе Португалиын ӝӧк вылазы одно ик Pato assado (пыжем ӟазег) яке Bacalau com natas (йӧлвылэн пыжем треска) пукто. Со сяна, Ымусьтон уг ортчы Bolo-rei-тэк (эксэйлэн пыжиськемез). Озьы шуо Португалиысь одӥгзэ тужгес но тодмо ческыт сиёнэз.

Шуо, кин выль арлэсь нырысетӥ минутъёссэ зарезь дурын ортчытоз, вуоно аре шудо луоз. Оло, соин арысь аре зарезь дурын, пляжъёсын Португалиысь кизилиос бадӟым концертъёс сёто. Албуфейраын, мынам карам, сямлы пӧрмиз ни Выль арез океан дурын, чебер салютэз учкыса, пумитаны. Со арлы быдэ вунонтэм шоулы пӧрме.

Дарья Шиляева

Туспуктэмез авторлэн

Удмурт Дунне
By Удмурт Дунне 24 декабря, 2015 08:41
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<