Туэ Удмуртиын шугадӟон учыръёс ӧй вал

Удмурт Дунне
By Удмурт Дунне 23 декабря, 2015 08:12
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Кылем арня пумын Можга городэ люкаськылӥзы тылпу кысон удысын ужасьёс, ёрос администрациосын но Можга ёросысь вань муниципал кылдытэтъёсын кивалтӥсьёс. Ар ӵоже ужамзылы йылпумъянъёс лэсьтӥз Россиысь МЧС-лэн Удмурт Республикая Валтӥсь управлениеныз кивалтӥсь генерал-майор Пётр Фомин.

Сюрес вылын шуккиськон дыръя юрттэт сётон.

Сюрес вылын шуккиськон дыръя юрттэт сётон.

Вамышен-вамышен азьлань

Ваньбурдэ ачид ӧд чакла ке, муртъёс тон понна уз сюлмаське. Асьмелэн сак кариськымтэмы бордысь бадӟым ыштонъёс пото. Туэ ар куспын шаерамы 1 сюрс 60 пол тылпу гомаз, тылпуын 110 мурт быриз. Кылем арен ӵошатыса, та лыдпус ӧжытак кулэс луэ ке но, буйгатскыны уг яра. Шаерысьтымы тылпу кысӥсьёслэн но спасательёслэн сюлмысь тыршеменызы валче 3 сюрс 500 пала адями утемын. Адӟем карымон тыршо Дэбес, Камбарка, Ува,  Юкаменск но Можга ёросъёсысь тылпу кысӥсьёс. Жаляса верано, тылпу потон учыръёс но тылын бырыны шедемъёслэн лыдзы йылэмын Грак, Красногорск, Якшур-Бӧдья но Яр ёросъёсын.

— Тылпуосты, кышкыт учыръёсты алонлы арысь аре бадӟым саклык висъяське, — шуиз Пётр Фомин. — Туэ ар куспын гинэ инкуазен герӟаськем кышкытлыклэсь утиськонлы 24,4  миллион манет висъямын. Со чотын тылпу кысон машинаослы ву басьтыны 42 инты кылдытэмын. Нюлэсъёслы матэ интыяськем 33 гуртэ пуктэмын нимысьтыз радиостанциос. Отын улӥсьёслы тылпу потон сярысь иворез радио пыр верало. Со станциез, гуртысен сяна, лэзьыны луэ на ёросъёсысь дежурнойёслэн-диспетчеръёслэн огъя службазы (ЕДДС) но шуг-секытэ шедемъёслы юрттэт сётонъя элькун центр (ЦУКС) пыр.

Нимысьтыз саклык висъяське тылпу потонэз дыраз шараянлы. Туэ ар куспын шаерысьтымы 400 коркае (отын уло  трос нылпиё семьяос, ожысь но ужысь ветеранъёс, инвалидъёс) сигнализациос пуктэмын. Кызьы вераз П. Фомин, соос дыраз синйылтыны юрттозы тылпу потон учыръёсты. Та ласянь котькинлы адӟем карымон ужазы Алнаш, Грак, Пичи Пурга но Юкаменск ёросъёсын.

Кылдытэмын тылпулэсь утиськонъя но ӝог юрттэт сётонъя 25 гарнизонъёс. Федерал бюджетысь 43,3 миллион манет тыр техника но 5 миллион манет тыр тылпу кысон тӥрлык басьтэмын.

Водолазъёс 40 метре лэзиськыны быгато.

Водолазъёс 40 метре лэзиськыны быгато.

Мылкыд борды кулэ коньдон

Кызьы тодмо, 131-тӥ федерал закон кутэмен, муниципал кылдытэтъёслы луонлык сётэмын граждан оборонаез асьсэ сямен радъяны. Соин валче тылпу кысыны мылкыд карисьёслэн лыдзы йылэ. Туннэ нуналлы шаерамы кылдытэмын 212 команда но 286 дружина, отчы 8 сюрс 649 адями пыриське. Доброволецъёслэсь ужзэс азинтонлы Удмуртилэн бюджетысьтыз 10 но ӝыны миллион манет пала висъямын, муниципал кылдытэтъёслэн бюджетысьтызы — 3 но ӝыны миллион манет.

Та ласянь адӟем карымон луо Глаз, Дэбес, Камбарка, Каракулино, Кизнер, Сарапул но Якшур-Бӧдья ёросъёс, нош мукетъёсаз, пе, доброволецъёслэсь ужзэс азинтонлы коньдон туж ӧжыт яке чик но уг висъяло. Гурт хозяйствоос пӧлысь ӟечен пусйыны луэ Можга ёросысь «Россия» эштосэз.

— Ёросмы бадӟым, 19 муниципал кылдытэт лыдъяське, гуртъёс ог-огзылэсь кыдёкын, — шуэ Можга ёрослэн йырыз Аркадий Вершинин. — Соин ик ваньмаз сямен гурт хозяйствоосын тылпулэсь утиськонъя дружинаос кылдытэмын. Тужгес умой ужасьёсты ар йылпумъяськон азьын коньдон кузьымен пусйиськомы. Доброволецъёслэн ужзы умой радъямын «Россия» хозяйствоын, отын тылпу кысыны 4 машиназы вань, 2 водитель уй но, нунал но дежурить каре, соослы уждун тыриське. Машинаоссы ноку но вутэк уг сыло.

Тылпу кысон машинаос сяна, хозяйствоысь огдыре 20 техника калыклы юрттэт сётыны быгатэ. Гужемлы быдэ та техникаен ужасьёслэн капка азязы вуэн цистернаос сыло. Жаляса верано, кышкыт учыръёслэсь нокин утемын ӧвӧл. Тылпу кысонлы бадӟым саклык висъяське ке но, туэ гужем хозяйствоысь парсь гид ӝуаз, 350 йыр пудо быриз.

_DSC3094

Шаерысьтымы муниципал кылдытэтъёс пӧлын арлы быдэ кышкытлыклэсь утиськонъя смотр-конкурс радъяськылэ.

Дас нунал — ас понназы

Шаерысьтымы сюресъёс вылын 1 сюрс 195 шуккиськон учыре тылпу кысӥсьёс но спасательёс потазы. Юрттэт сётэмын 1 сюрс 94 адямилы. Тужгес ӵем шуккиськон учыръёс луо Казань — Ижевск сюрес вылын. Можга ёросысь тылпулэсь утиськонъя 22 номеро частьын ужасьёс ужрадэ люкаськемъёслы возьматӥзы ужаны быгатэмзэс.

М-7 федерал сюрес вылын шуккиськон учыр луэмын, пе. Мырӟиськемын 3 машина: одӥгез ӝуа, мукетаз адями пачкамын, нош куинетӥ машиналэн цистернаысьтыз хлор вия. Шуккиськон учыре ӝегатскытэк вуизы тылпу кысӥсьёс, ӝог юрттэт сётӥсьёс. Азязы пуктэм ужзэс спасательёс вакчи дыр куспын ӝог но валаса быдэстӥзы. Учениосты учкисьёс соослы синмаськизы.

Ар куспын Удмуртиын 68 мурт вуэ выйиз. Муниципал кылдытэтъёсын кивалтӥсьёслы возьматэмын вал, кызьы астэ возёно тымет вылын. Берло дыре калык Йӧвылэсултонэ шурын пыласькылэ. Со понна тросаз шуръёсын люкмесъёс лэсьто. Можгаос возьматӥзы, кыӵе со луыны кулэ. Шуре пыронэ пу пагӟаос юнматоно, йӧ вылэ 5-лэсь трос адямиез лэзьыны уг яра. Ярдурын одно ик чакласькыны кулэ спасательёс.

Спасательёс выль луонлыкъёсынызы тодматӥзы, туж данъяськымонэз — аэромобильной группировка.

— Та группировкае 100 адями пыре: спасательёс, пичи судноосъя инспекциын (ГИМС) ужасьёс. Соос нырысетӥ юрттэт сёто шаерамы бадӟым шуккиськон, инкуазен герӟаськем, сюресъёс но вуос вылын кышкыт учыръёс кылдыку, — шуэ генерал-майор Пётр Фомин. — Спасательёслэсь ужзэс капчиято пилоттэк лобась вертолётъёс. Кышкыт учыр кылдон интыез соос котыр 5 иськем эскерыны быгато. Кинологъёслэн 2 пунызы нимысьтыз аттестация ортчемын. Водолазъёс 40 метр мурдалае лэзиськыны быгато. Азьланяз группировкаын луозы гурезьёсын ужась спасательёс. 100 мурт 10 нунал ӵоже ас понназы улыны быгатоз. Угось тылзы, вузы, сиён-юонзы бордазы.

Шаерысьтымы муниципал кылдытэтъёс пӧлын арлы быдэ кышкытлыклэсь утиськонъя смотр-конкурс радъяськылэ. Таяз учыре вормисе потӥзы Воткинск, Камбарка, Можга ёрос, Пичи Пурга ёросысь Пугачёво. Ужрадын пӧртэм наградаосын пусйизы та удысын ӟеч ужасьёсты. Вуоноез таӵе дышетскон Глазов ёросын ортчоз.

Валентина Емельянова

Туспуктӥз автор

 

 

Удмурт Дунне
By Удмурт Дунне 23 декабря, 2015 08:12
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<