Калыклэн юанъёссылы валэктон сётъязы кивалтӥсьёс

Удмурт Дунне
By Удмурт Дунне 22 декабря, 2015 12:12
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
IMG_5610

Кун Кенешысь ялан ужась комиссиен кивалтӥсь Н. Кузнецова ужпумез сэрттон борды ӝегатскытэк басьтӥськиз.

Конституцилэсь нуналзэ пусъён улсын Россиын 14-тӥ декабре ортчиз кун ёзъёсын калыкез пумитан нунал.

Нуназеысен 8 час ӝытозь калыкен ваче син кенешизы элькунысьтымы вань кун ёзъёсысь, Адямилэн правоосызъя уполномоченнойлэн аппаратысьтыз, озьы ик федерал ведомствоослэн элькунмыя управлениосысьтызы кивалтӥсьёс, специалистъёс. Шоркарын сяна, та ужрад паськыт радъяськиз вань ёрос центръёсын но городъёсын. Озьы котькуд адями быгатӥз кивалтӥсьёслы меӵак вазиськыны.

Та ужрадэ мылысь-кыдысь пыриськизы Кун Кенешысь ялан ужась комиссиослэн кивалтӥсьёссы Светлана Кривилёва, Валерий Бузилов, Наталья Кузнецова но Наталья Сударикова. Парламентысь депутатъёс огшоры нуналъёсы но округысьтызы калыкен пумиськыло, кенешо ке но, юанэнызы Кун Кенешлэн юртаз меӵак вазиськисьёс 20 мурт пала люкаськизы. Соослэн уноез вазиськонъёссы герӟаськемын вал улон интыен. Калык тунсыкъяськиз: кыӵе луонлыкъёс кылдытэмын шаерысьтымы егит дышетӥсьёслы капчиятэм амалъя квартира басьтыны, кызьы радъяське Быдӟым ожысь ветеранъёслэсь улон условиоссэс ӟечомытон, кыӵе программаос быдэсъясько элькунамы егит семьяослы сэреген юрттонъя но мукет. Со сяна, трос юанъёс люкаськемын жилищно-коммунальной хозяйство ласянь: адямиос ӝожтӥсько управляющей компаниослэн пӧяськемзы вылэ, озьы ик тунсыкъясько капремонтъя программалэн быдэсъяськеменыз.

Калыкез сюлмаськытэ тазалыкез утён удыс но. Светлана Кривилёвалы пӧртэм юанъёсын вазиськизы: адямилэн дуно операция лэсьтыны луонлыкез ӧвӧл ке, юрттэт курыны луоз-а кунлэсь, та учырын бюджетын юрттэт чакламын-а? Светлана Петровналы озьы ик вазиськизы Ижысь но Сарапулысь больницаосын тыршисьёс: висисьёслы интыосты кулэсто, таин валче эмъясьёс ужтэк кылёзы. С. Кривилёва валэктӥз: тазалыкез утён удысын бичатӥсь юанъёс туннэ нуналлы лачак люкаськемын, соос сэрттытэк-пертчытэк кельтэмын уз луэ.

Лэчыт юанъёсын вазиськисьёслы, валамон, шуак гинэ юрттыны уг луы. Нырысь ик ужпумез эскероно, кулэ луись ёзъёсы запросъёс-юанъёс келяно. Та уж борды матысь дыре басьтӥськозы Кун Кенешысь депутатъёс. Та нуналэ вазиськонъёс ваньмыз пусйыса кельтэмын но депутатъёслы нимаз удысъёсъя люкылэмын.

IMG_5600

Пырись-потӥсьёслы радэн-радэн пуконъёс пуктылэмын: одӥгез кивалтӥсьлы юанзэ сётэ, мукетыз черодзэ вите.

* * *

Правительство но рос-прос дасяськем та нуналэ калыкез пумитаны. Кивалтӥсьёсты утчаса, калыклы Правительстволэн юртэтӥз бызьылоно ӧз луы. Пӧртэм министерствоосысь, ёзъёсысь специалистъёс интыяськиллям нырысетӥ этаже. Пырись-потӥсьёслы радэн-радэн пуконъёс пуктылэмын: одӥгез кивалтӥсьлы юанзэ сётэ, мукетыз черодзэ вите.

Ижысь 8 номеро больницаын ужасьёс юан сётыны трос кузя лыктӥллям: эмъяськонниысьтымы, пе, ЛОР-ёзысьтызы интыоссэс кулэстыны чаклало. Азьвыл, пе, Ижысь эмъяськонниосын таӵе висисьёслы 60 инты чакламын вал, табере быдэс городлы кельтэмын луоз 20-ез гинэ.

— Кытчы кариськоно табере милемлы, ужтэк кылимы ке? — чабкисько специалистъёс. — Ярам, ми кыӵе ке но амал шедьтомы ик, вылды, но висисьёс курадӟозы ук — черодзэс кема витёно луозы. Тырмыт шат быдэс шоркарлы 20 инты?

Якшур-Бӧдья ёросысь Пестовка пичи гуртын улӥсьёс но Правительствое вуиллям сюлэмшугзэс усьтыны: сюрессы ӧвӧл, ӝог юрттэт сётонъя но тылпу кысонъя службаос вазиськонъёссэс санэ уг басьто ни — сӥзьыл угось дэрие нӧдӥз «скорой». Элькунмылэн Тӧроез А. Соловьёв сюресъёсты лэсьтонлы-тупатонлы бадӟым саклык висъяны кутскиз бере, осконмы вань, милесьтым но вазиськонмес  санэ басьтозы шуыса, шуо гуртоос.

Министерствоосысь специалистъёс сяна, юанъёслы валэктон сётъяз Правительстволэн Тӧроез Виктор Савельев. Сюлмаськытӥсь юанъёс лачак, соос ваньзы гожтыса кельтэмын — матысь дыре соосты сэрттомы-пертчомы, пусйиз со.

Калыкен кенешон паськыт радъяськиз «Огъя Россия» партилэн Удмурт ёзэзлэн, Удмурт Республикая валтӥсь федерал инспекторлэн, Адямилэсь правооссэ утёнъя уполномоченнойлэн, Пенсиосъя кун фондлэн Удмурт ёзэзлэн приёмнойёсазы. Та ёзъёсын тыршисьёс пусйизы: калыкез пумитан нуналмы милям быдэс ар кыстӥське — вазиськонъёсты нуналлы быдэ кутӥськомы, котькин но котьку быгатоз милемлы сюлэмзэ усьтыны.

Калыклэсь вазиськонъёссэ кутӥзы югдурез утисьёс но. Следствиея комитетэ, кылсярысь, вуиз 10 вазиськон. Уноез озьы ик герӟаськемын  эмъян удысэн.

Калыкез пумитан нунал возьматӥз: шаерамы улӥсьёсты тужгес но сюлмаськыто тазалыкез утён, сюресъёсты лэсьтон, ЖКХ. Та удысъёсысь тырмымтэосты палэнтон бордын ик  тыршоно луоз кивалтӥсьёслы матысь дыре.

Елена Никитина

Туспуктиз О. Ларин

Удмурт Дунне
By Удмурт Дунне 22 декабря, 2015 12:12
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<