В. Путин: Улӥе ум усе ни

Удмурт Дунне
By Удмурт Дунне Декабрь 22, 2015 11:52

Россилэн Президентэз Владимир Путин кунмылэн пӧртэм сэрегъёсысьтыз журналистъёсын 11-тӥ ползэ пумиськылӥз. Пресс-конференцие пыриськизы Россиысь но кунгож сьӧрысь 1 сюрс 390 журналистъёс, кылем арынлэсь со 130 муртлы ятыргес.

путин

В. Путин: юрттэттэк нокин уз кыльы.

Нырысетӥ юан сётӥз «Комсомольская правда» газетлэн корреспондентэз Александр Гамов, Президентэн пресс-конференцие со дасэтӥзэ пыриське ни. Учкыса, пе, потӥ кылем арын та ужрадын чузъяськем лыдпусъёсты, ӵошатӥ туннэ нуналлы югдурен: ма быдэстэмын, нош ма бордын золгес тыршоно луоз.

— Россилэн экономикаез юн герӟаськемын мувӧйлы дунэн: со воштӥське, асьмелы но ваньзэ выль сямен чаклано луэ, — валэктонзэ мытӥз Президент. — Азьвыл аръёсы бюджетмес юнматӥмы ке, баррелез понна 100 доллар дун вылэ пыкъяськыса, туэ та лыдпус 2 поллы кулэсмиз. Вуоно арлы бюджетмес кутӥмы, 50 доллар дунэз лыдэ басьтыса. Но туннэ, адӟиськомы, та лыдпус 38 долларозь усиз. Асьмелы амалтэк воштонъёс пыртоно луоз. Но та дырлы меӵак вераны луоз ни: кризислэсь тужгес секыт вакытсэ Россия ортчиз ни, туэ кыкетӥ паларысен экономикаын югдур огсыр луиз.

Президентлэсь юалляськизы Правительстволэн ужамез, Россиысь банклэн ключевой ставкаез, пенсиос пумысен.

Бюджет чотын тыршисьёслэсь уждунзэс будэтэмен валче улосъёслэн бюджетъёссы секыт югдуре шедемын, уксёзы уг тырмы. Кызьы федерал центр юрттыны быгатоз улосъёслы? Нырысетӥ интыын — социальной удыс,  шуиз В. Путин. Котькыӵе шуг-секытъёс мед луозы, асьмеос нырысь ик сюлмаськыны кулэ калык сярысь. Зэм, улосъёслы капчи ӧвӧл. Но федерал центр соосты юрттэттэк уз кельты. Бадӟым уж нуиське коммерческой, 12 процентъем, пунэмъёссэс кун кредитъёсын воштон понна — таосыз сётӥсько 0,1 процентэн. Со сяна, вуоно арлэн бюджетаз улосъёслы ватсаса висъяны чакламын 310 миллиард манет. Нош улосъёс та уксёен экономиказэс ӝутӥсь ужрадъёс ортчытыны кулэ. Юрттэттэк нокин уз кыльы, оскытӥз Президент.

Гурт удыс сярысь но кылпум потӥз. Владимир Путин пусъемъя, бадӟым оскон фермеръёслы. Улосъёс соосты утён но юрттон сярысь сюлмаськыны кулэ. Кылсярысь, 2 арлы вытъёслэсь мозмытыны, пӧртэм программаос пыр коньдонэн юрттыны.

Журналистъёс пенсиос пумысен но юан сётӥзы. Владимир Путин шуиз:

— Туэ ар секыт ке но вал, луонлык шедьтӥмы пенсиосты инфляцияя тупатыны — 11 процентлы йылтыны. Югдур капчи ӧвӧл ке но, вуоно арын но 4 процентлы ӝутыны пӧрмытомы. Луонлык кылдӥз ке, йылтыны, оло, пӧрмытомы ар куспын но. Но пенсие потон арлыдэз ӝутыны мон пумит. Россиын талы дыр ӧз вуы на, но куке-соку таӵе вамыш лэсьтоно луоз. Демография ласянь шуг-секытъёс кылдэмын: адямилэн улонэз шорлыдын кемагес — 71 аресозь но 2 толэзёзь —  кыстӥське ни, нош ужась калыклэн лыдыз кулэсме. Озьы пенсиосъя системаын дефицит кылдоз, амалтэк нуйтоно луомы пенсие потон арлыдэз.

Пресс-конференциын шӧ-дӥськиз: журналистъёсты та вакытэ золгес сюлмаськытэ кунгожсьӧр политика — соин герӟаськем юанъёслы ужрадын тужгес трос дыр висъяськиз. Калыкез кышкытлыклэсь утён мон понна валтӥсь интыын. Террористъёс куддыр вужере кылё ни кадь потэ мыным, валтӥсь интые потэмын сьӧд зарниез лушкем вузаса узырмон. Соослы ваньзылы, дэмен кариськыса, пум поныны кулэ, шуиз В. Путин.

Трос юанъёс чузъяськизы Египетэн, Турциен, Сириен кусыпъёс пумысен. Калыклы Египетэ сюрес усьтӥськоз, отын югдур гань-гань луиз ке, нош Турцилэн кивалтӥсьёсыныз кусып тупатыны туж секыт, зэмзэ вераса, талэсь кулэлыксэ но уг адӟиськы, меӵак шуиз Президент.

Елена Никитина

Удмурт Дунне
By Удмурт Дунне Декабрь 22, 2015 11:52
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<