Мар валтэ Валтонэз? Арво Валтон писательлы — 80 арес

Удмурт Дунне
By Удмурт Дунне Декабрь 14, 2015 11:49
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Арво Валтон — тодмо эстон писатель, киносценарист. Солэн тыршемезъя но кичӧлтэмезъя кылдытэмын  Ӵыжы-выжы калыкъёсъя эстон программалэн литературая премиез, фин-угор литературая фонд (аслэсьтыз литературая премиоссэ со отчы понэ). Со коньдон висъяське  фин-угор кылъёсын гожъяськись авторъёслэсь  книгаоссэс поттыны.

Эстониын поттӥз трос удмурт авторъёслэсь ужъёссэс, книгаоссэс.

Юбилеез азьын ми  Арвоен Интернет пыр кенешим. 

Арво Валтон.

— Азьлань вамышез шонергес мед луоз шуыса, адями мышсэ учкылыны кулэ, шуо. Асьтэлэсь улондэс дунъякуды, кыӵе мылкыдды кылдэ?

— Мон вамышъёсме мертасько лэсьтэм ужъёсыным: улӥсько одӥг быдэстоно ужпумысен мукетозяз: чакласько-лэсьтӥсько-быдэстӥсько, нош чакласько… Зэм, луылэ мукет сямен но. 24 томен сочинениосме поттэме бере шуи: та сяна, номыр уг гожъя ни, выро берыктон ужен гинэ. Но туэ гужем мылкыды воштӥськиз но, выльысь быдэс серия пичи веросъёс гожтӥ. Тросэз соос пӧлысь лэсьтэмын выжыкылъёсъя — вань удмурт шӧмоосыз но. Та книгае пӧсь на — та нуналъёсы гинэ потӥз.

Юбилейёс, нялтас вераса, мыным уг кельшо, угось та нуналэ шумпотонлэсь трос сюлмаськонэз луэ: ваньзэс утялтоно, пальпотоно, чебер кылъёссэс кылзоно, нош кӧня ке нунал ортчыса, шуям сяськаосты сэрпалтоно…

— Пинал дыръяды тӥляд семьяды Сибире келямын вал. Валамон ини, со бадӟым шуккет луиз. Мукет ласянь, со адӟон ик ӧз юртты-а тӥледлы писатель луыны?

— Кызьы сыӵе дыръя шуо, ваньмыз, мар тонэ уг виы, кужмогес каре. Сыӵе югдуре соку сюремын вал уноез эстонецъёс: Эстониысь 20 сюрслэсь ятыр адямиез, тушмон карыса, отчы келязы. Атаймес басьтӥзы вазьгес, берло сьӧраз ыстӥзы милемыз но — кыкто вынъёсты но анаймес. Милемлы выныным соку 13 арес вал. Ӵапак быдэ вуон вакыт. Сыӵе дыръя адӟиське ни, кыӵе луоз адями азьланяз. Но мон писатель луысал, дыр, сыӵе курбонъёстэк но, угось туж яратӥсько ас калыкме, кылме.

— Писатель луыса вордӥськыны кулэ?

— Быгатонлык Инмарен сётӥське, шуиськом, со озьы. Но писатель луон понна со гинэ тырмыт ӧвӧл, угось шакрес гожтэмед нокинлы уз кельшы, соин ик писателёзь будыны луэ, трос тодыса, шӧдыса, гожъяськыса гинэ. Гожъяськоно, куке уд быгатӥськы гожъяськытэк улыны, куке вань мар вераны, куке шӧдӥськод, со тынад сюресэд (миссиед) шуыса.

— Тӥ туж трос гожъяськиды совето вакытэ — ваньмыз сямен произведениосты, эстонысь ӟуч кылэ берыктыса, потылӥзы. Произведениосты висъяськы-лӥзы аспӧртэм луэменызы. Тӥ одӥгез тужгес лыдӟымонэз прозаик вал.

— Шонер но, ӧвӧл но. Бен, мон котьку трос гожъяськылӥ, но… ӧй печатласькылы ӵапак со совето вакытъёсын йырин ик. Мынам мылкыдъёсы-малпанъёсы ӧз тупаллялэ партилэн идеологиезлы. Пичиен-пичиен печатласькыны кутски ай Эстоние но «Хрущёвской оттепель» шуон вуэм бере — нырысетӥ книгае потӥз 1963-тӥ арын гинэ. Со вакытэ инженер луыса ужасько вал бере, веросъёсам возьматъяй ужась адямиез, завод улонэз. Соос борды ӧз ӝабырскылэ, нош системалы ӧжытак ке но мынтӥт гожъямъёсме сборникъёсы ӧз пыртылэ.

— Но Сибирьын улэмдылы сӥзем «Удручённость и надежда» романдэс тӥ малы ке гожтӥды ай 1980-тӥ аръёсы гинэ. Малы со вӧсез сокема нуллоно вал? Нош ик тушмон каремзылэсь кышкаса?

— Ӧй, нокинлэсь, номырлэсь мон ӧй кышкалля. Сибирьын улыкум, мон пинал на вал, Эстоние берытским мыным 18 арес дыръя, кулэ вал дыр ваньзэ сое валаны, котыр ласянь учкыны-эскерыны. Соин ик гожтћ, куке кисьмай сое гожтыны. Зэм соиз: рукописьме таламзылэсь кышкаса, чакласькытэк ӧйлась — сое, машинкаен печатласа но микрофильм лэсьтыса, лушкемен келяй кунгож сьӧры. Потонэзлы ӧй оскылы. Но совето власть куашказ но, югдур воштӥськиз, книгае потӥз. Зэм, ӟуч кылэ со берыктэмын ӧвӧл.

— СССР шоры учконды валамон, но туж шумпотымон, тӥ туала Россиын улӥсь фин-угор калыкъёслэсь кылзэс азинтыны юрттӥськоды: берыктон ужен выриськоды, Эстониын дунтэк книгаоссэс поттӥськоды. Со понна кисырес но кадь, астэ пунэме пыремен шӧдӥськод…

— Улонын котькудӥзлэн — нимаз адямилэн но, быдэс калыклэн но — потэ, солэн матысь адямиосыз, ӵыжы-выжыосыз медло шуыса. Асьмеос юрттӥськом ук матысь адямиосмылы, озьы ик та учырын но — мынам юрттэме потэ одӥг выжыысь калыкъёслы, малы ке шуоно соос дауръёсын зӥбет улын воземын. Мыным валантэм, куке соослэн чеберлыко кылзы (литературазы) ас куназы уг ке поты, соин ик кылдӥз сыӵе проект.

Нош астэ пунэмын шӧдон сярысь вераськыны ик кулэез ӧвӧл — мар понна? Ай солэсь ортчыт, мон асме сыӵеен шӧдӥсько — угось мон та писательёсты берыктӥ но поттӥ. Та уж мыным аслым но шумпотон кузьма. Мон туж гажасько но дунъясько фин-угор писательёсты, угось соос анай кылынызы гожъяськеменызы асьсэлэсь нацизэс гинэ ӧвӧл, мынэсьтымзэ но утё (вераським ук, асьмеос ӵыжы-выжыос шуыса).

— Огвакытэ тӥ политикаен но выриды — Эстон Республикалэн парламентэзлэн депутатэз вал. Мар со тӥледлы сётӥз?

— Котькудӥз эстон адями ас понназ малпаськылӥз колониализмлэн зӥбетэз улысь мозмытскон сярысь, ми шӧдылӥм асьмеды оккупациын кадь. Со мылкыд аръёсын тымиськылӥз, соин ик куке Совето Союзын перестройка кутскиз, ми понна солэсь бадӟым шуд ӧй вал — Эстониын кутскиз «кырӟась революция»: вань творческой адямиос, интеллигенция итӥськизы со борды. Мон шӧдылӥ со вакытэ политикаын аслэсьтым кулэлыкме, малы ке шуоно вал аслам адӟонэ, тодон-валанэ.

— Тӥ туж тунсыко киносценарист но. Тӥляд сценарийдыя поттэм «Последняя реликвия» кинофильм («Таллинфильм», 1971-тӥ ар) огвакытэ туж тодмо вал, трос ӟеч дунъетъёс басьтӥз. Асьтэлы кудӥз фильмды кельше?

— Уз оске, дыр, но мон аслам сценарийёсыя лэсьтэм киноосты чик уг учкылӥськы. Нырысь ик, со кемалась вал ни, мынам ӧвӧл, дыр, асэным данъяськон, ортчеменыз улыны турттон сямы. Мар вал, со вал. Вылаз ик, куд-огез фильмъёсы ӧй ке луысалзы, аслым капчигес луысал, дыр, угось яке цензуралы, яке толыктэм режиссёрлы луыса мынам малпанъёсы фильмын быдэсак кырыжтэмын.

— Калык пӧлын малы ке но малпан вань, творчествоен вырись адямиос шудтэм луо шуыса. Мыным со мыдлань потэ. Тӥ нош шудо-а?

— Бен, мон шудо адями! Со огшоры кылъёс гинэ ӧвӧл, зэм озьы. Угось улонам выри яратоно уженым — творчествоен, котьку данъяськылӥ калыкеным, тодӥсько, мар со синмаськон-яратон, сӥ-дан, азинлык, эрик но шуд. Улон — со шуд ни. Шуныт тӧл, нясь-нясь шунды, сӥзьыл куарлэн шыпыртэмез — со шумпотон уг кузьма шат?

Ватсаса:

Зэмос нимыз — Арво Валликиви.
Вордӥськиз 1935-тӥ арын 14-тӥ толсуре Эстониысь Мярьямаа гуртын. 1944-тӥ арын атайзэс Сибире келязы, 1949-тӥ арын отчы ыстэмын вал быдэс семьязы. Отысь берытско 1954-тӥ арын.
Дышетскемезъя — гурезь ужъя инженер. Заочно йылпумъяз ВГИК-ез (1967), специальностез «кинодраматург». 1968-тӥ арысен — профессиональной писатель.
Гожтӥз «Восемь японок» (1968), «Мустамяэская любовь» (1979), «Старые счёты» (1981), «Пути сходятся в вечности» (1978), «В чужом городе» (1985), «Возлюбленная дьявола» (1987), «Спешное раскаяние» (1989) но трос мукет книгаос.
Произведениосыз берыктэмын 30 кылъёсы.
Кӧня ке киносценарийёслэн авторзы, тужгес тодмоез — Э. Бронхёэлэн романэзъя «Последняя реликвия» (1971). Эстон кылэ берыктӥз ӟуч, пор, удмурт, болгар, поляк, венгер произведениосты.
1992-тӥ-1995-тӥ аръёсы — Эстон Республикаысь парламентлэн депутатэз.
1998-тӥ арысен — Фин-угор литератураослэн ассоциацизылэн президентэз.
2009-тӥ арысен — Тарту университетысь профессор.

Арво Валтонэн кенешиз Зинаида Рябинина

Удмурт Дунне
By Удмурт Дунне Декабрь 14, 2015 11:49
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<