Мар огазея Т. Борисовез но И. Наговицынэз?

Удмурт Дунне
By Удмурт Дунне Декабрь 9, 2015 11:37
borisov

Т. Борисов 1933-тӥ арын — СОФИН ужъя ӝегатон вакытэ.

Асьмеос ичи тодӥськомы шаермы сярысь. Нош кин уг тоды аслэсьтыз историзэ, кӧня ке дыр ортчыса, дышетэ муртлэсьсэ — таӵе кылъёсын Трофим Борисовлы сӥзем конференциын докладзэ мытӥз Историяя, кылъя но литературая Удмурт институтлэн директорез Алексей Загребин.

— Вотской автономия кылдӥз 1920-тӥ арын 4-тӥ ноябре. Огнуналэ со ӧз лэсьтӥськы. Озьыен, кыӵе ке учыръёс отчы вуттӥзы.

Валэктон сюриз ар но ӝыны талэсь азьло. Мон вуылӥ Белоруссие, Минскын ортчиз наука конференция. Со сӥземын вал Нырысетӥ дунневыл ожлы. Милемды нуизы Минсклэсь 150 иськеме палэнэ, Вилейка городэ, улӥсез — 7 сюрс адями. Маин тодмо та чебер инты? Ӵапак отын 1915-тӥ арын сӥзьыл сылэм фронт. Немецъёс дугдытэмын вал. 2 но ӝыны ар ӵоже фронт нокудлань ӧз вырӟылы. Та Вилейка город гинэ ӝыны ар ӵоже 6-7 пол киысь кие выжылӥз, яке немецъёс сое киулто, яке асьмелэнъёс басьто. Ож лудэ вуылӥз эксэй Николай II, данъяз солдатъёсты Георгийлэн киросэныз. Собере вуылӥз Вильгельм II, аслэсьтыз улэп кылем солдатъёссэ корт киросъёсын сӥлы кариз. Валамон ини, татын туж уно калык быриз. Вилейка котырын бадӟым шайвылъёс. Мынӥсько со шайвылтӥ, гожтэмын: татын ватэмын Камской полк. Вамыштӥсько азьлань: Глазовысь Троице-Сергиевской полк, вӧзаз — Сарапулысь 166 номеро пехотной полк но мукетъёс. Вилейка дорын ик Нырысетӥ дунневыл ож дыръя сылӥз эвакогоспиталь, отын врач вал Трофим Борисов. 10 сюрсъёсын сӧсырмем но газэн усыкмытэм солдатъёс та госпиталь но Трокайлэн киосыз пыр потӥзы. Со аръёсы ик белорус музъем вылын, Барановичи дорын, окопын пукемын прапорщик, удмурт эпослэн авторез Михаил Худяков. Мар каризы соос ожмаськымтэзы дыръя? Малмыжысь ӟуч адями М. Худяков дышетӥз удмурт кылэз. Ӵапак окопысен со гожъяз Наукая академие но малпаськиз историяя общество кылдытон сярысь, кудзэ со зэмзэ но кылдытӥз 1918-тӥ арын Малмыжын. Та огазеяськонлэн ёзчиез луиз          К. Герд но. Вирен пылатэм ож лудысен ик Трокай Борисов шуэ: тазьы улыны уг яра, улонэз воштоно…

1917-тӥ арын вазь тулыс Т. Борисов эвакогоспиталеныз вуэ Казане, люка котыраз удмурт интеллигенциез: вужзэ но туалазэ. Бен, соку удмурт интеллигенция вал кык пумо. Вылез — ож лудын кылдэм, вирлэсь кышкасьтэм интеллигенция. Вужез интеллигенция — нукыртӥсь, ӝожомись но котьмаин соглаш кариськись. Таӵе луэмзы понна соосты зол курланы уг яра, дыр, малы ке шуоно вакыт сыӵе вал — фронтовикъёслэн, пумитъяськыны быгатӥсьёслэн.

Со аре ик Глазовын 333-тӥ запасной полкын кылдэ Вотской рота, отчы пыризы удмурт офицеръёс но 200 солдатъёс, Национальной армия выллем. Та рота дась вал кияз пыӵалэн утьыны удмурт калыклэсь правооссэ. Ӵапак татысь ожгарчиос ик азьланяз удмурт автономиез кылдытӥсьёс луозы.

Трофим Борисов Елабугаысен ини кутске уж борды. Кылсярысь, удмуртъёслэсь нырысетӥ ӧтчамзэс радъя. Со вӧзы султэ удмурт офицер Максим Прокопьев. Мар бордысен кутско? Гочатӥсь лозунгъёс бордысен уг — дышетӥсьёсты дасянъя семинария усьто: Елабугаын, Выль Мултанын, Малмыжын. Малы? Трофим Борисов шуылӥз: «Визьмо, дышетскем но туалазэ валась мурт гинэ азьлань улонэз лэсьтыны быгатоз». Солэн малпамезъя, ӵапак дышетӥсьёс азьлань улонэз лэсьтыны кулэ…

Собере вал Граждан ож. Туж вазь, 1919-тӥ арын гужем ини, Колчаклэн армиеныз ожмаськыкуз, быре Максим Прокопьев. Т. Борисов киоссэ уг лэзьы. Сарапулын со удмуртъёслэсь кыкетӥ ӧтчамзэс ортчытэ но соослэн куронъёсынызы мынэ Москвае, вазиське большевикъёслы. Трокаез кылзэ национальной ужпумъёсъя нарком И. Сталин. Сталин умоен лыдъя удмуртъёслэсь автономия кылдытыны малпанзэс. Борисовез тодматэ партиысь уно кивалтӥсьёсын. Ӵапак соку ик Трокай тодматске Иосиф Наговицынэн, нырысетӥеныз удмурт революционерен, Глазов уездысь Туктым гуртын вордскем но эмиграциын улэм муртэн. Иосиф Наговицын Трофим Борисов кадь ик аспӧртэм, визьмо вал. Со кема дыр ӵоже улӥз Бельгиысь Льеж городын. Умой улӥз, аслаз коркаез вал. Но партия ӧтиз но, Наговицын бертӥз Москвае. И. Наговицынэз но   Т. Борисовез ик выль власть косӥз Удмуртиын автономия кылдытыны. Мар каре Борисов? Со, ваньзэ та ужез радъям, дасям но югдурез пыр-поч тодӥсь адями, ас интызэ сётэ Иосиф Наговицынлы. Туж шонер лэсьтэ. Трокай кык-куинь вамышлы азьлань адӟе вал. Со вала: сюрес сётоно выль властьлы, Наговицын  большевиклы.

И. Наговицын но Т. Борисов трос шуг-секытъёсты вормизы, уно чидазы. Ӵапак Наговицын большевиклэн но Борисов удмурт интеллигентлэн валче ужаменызы асьмелэн туннэ вань республикамы. Жаляса верано, шаерамы тросэз уг но тодо та нимъёсты, уг тодо, та адямиослы Ижын синпелетъёс вань шуыса. Соос туж трос лэсьтӥзы, Удмурт шаер умой мед улоз шуыса. Трофим Борисовез буре вайыкузы, аспал эшъёсыз, алнашъёс, гажаса Трокай агай шуо, шонергес луоз Трокай атай шуыны, со зэмзэ но удмурт республикамылэн атаез луэ.

Галина Семёнова

Удмурт Дунне
By Удмурт Дунне Декабрь 9, 2015 11:37
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<