Чылкыт луло Иосиф Иванов

Удмурт Дунне
By Удмурт Дунне Декабрь 3, 2015 15:04
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

 

Иосиф Иванов.

Иосиф Иванов.

Алнаш ёрос газетлэн азьвыл редактореныз, кылбурчиен Иосиф Ивановен тодматски гожъяськыны кутскеме бере.

Одӥг пол вуз карон юртлэн ӝажыысьтыз уӵыртӥ Бондюжской завод сярысь книгаез. Бигер улос вӧзын улӥськомы бере, со мыным туж тунсыко потӥз. Книгаез кутыса, ӵуказеяз ик редакцие Иосиф Зотович доры мынӥ, возьматӥ бигеръёслэсь яркыт буёло, чурыт выло поттэм книгазэс. Кема кияз бергатӥз. Да, бигеръёс ужаны быгато, шуиз, вылыз чебер, пушказ мар вань, лыдӟыны кулэ. Иосиф Зотович, шуисько, мон сое лыдӟыса потӥ ни, кылтӥрлыксы туж ик ушъямон ӧвӧл, но фактъёс, учыръёс люкамын. Мынам но гожъямъёсы тунсыкоесь, ойдолэ та выллемгес ик книга поттом! Иосиф Зотович, книга бордысь синъёссэ воштыса, мон шоры учкиз. Кин ай таӵе дӥсьтӥсь адями шуиз, лэся (ог-огмес огшоры гинэ  тодӥськом вал, мон соку налоговой инспекциын ужай). Со вакытэ ваньмы компьютерен ужаны дышетскиськом вал ай. Гожъямъёсы, шыньыр-шаньыр кылбур нергеосы, веросъёсы киын гожъямын вал. Кема вераськеммы бере Иосиф Зотович шуиз:

— Давай поттом, но бигеръёслэн кадь чебер уз пӧрмы, сьӧдо-тӧдьыё гинэ луоз, туспуктэмъёс но яркытэсь уз пӧрме.

— Яралоз, — шуисько, — эсьма тунсыко мадёнъёс огазьын луозы, оло, кин ке куке но лыдӟоз!

Тӥни озьы Иосиф Зотовичлэн кичӧлтэмезъя ӟуч но удмурт кылъёсын 173 бамен книгае потӥз. Нимамы ми сое  «Уходят корни в глубь веков» («Даур ортче, пытьы кельтэ»). Иосиф Зотович ачиз ик компьютерен бичаз, редактировать кариз. Нырысь потэм книгаелы шумпотыса, бӧрдӥ: нылпие вордӥськиз кадь потӥз. Иосиф Зотович вакчияк вераз:

— Кие кутымон пӧрмиз. Книгаед но нимыд историе кылёзы.

Озьы книга поттон амалэн сюрес лёги Алнаш редакцие. Пыды капчи луиз, лэся, мон бере поръёс книга поттӥзы — «Я — мариец» (авторез Н. Семёнов). Та книгалэсь кӧмзэ но пушсэ озьы ик пӧраз И. Иванов. Мукетъёсыз но басьтӥськизы  книга поттон борды. Мынам но мылкыды выльысь ӝутӥськиз. Кыкетӥ книгае вордӥськиз 2007-тӥ арын нош ик Иосиф Зотовичлэн юрттэмезъя. Таиз книга сӥземын вал Алнашысь машинно-тракторной станцилэн 70 ар тырмонэзлы.

2009-тӥ арын Иосиф Зотович поттӥз «Анае вералоз вал» книгаме, 2012-тӥ арын редактировать кариз «Ӟуння кырӟа, эктэ, вера» книгаме. Иосиф Иванов — 4 книгаосылэн атайзы. Сотэк вордӥськысалзы меда соос? Кӧня мукет книгаосты но редактировать кариз со! Кӧня уйзэ ӧз изьы, дыр, Иосиф Зотович, ми кадь «чырсамтэ табаньёслэсь» гожъяммес тупатъяса. Со доры ӵем гинэ куриськонэн пыраллязы удмурт кылъя дышетӥсьёс, кивалтӥсьёс. Соослэсь но куд-ог гожъямъёссэс тупатъяз, сыназ И. Иванов. Котькинлы юрттӥськыны тыршиз.

Огвакытэ Иосиф Зотович быдэсъяз редакторлэсь компьютерщиклэсь, корректорлэсь, дизайнерлэсь, журналистлэсь, переводчиклэсь, печатниклэсь ужзэ. Трос тодӥсь-валась, йӧно, зӥбыт, лякыт сямо пиосмурт тӥрен но лусйыны, ӵыпыны, вӧлыны быгатэ вал. Пиезлы корка пуктӥз. Зэм вера калык: визьмо мурт трос уг вераськы. Со но вакчияк но валамон вералоз вал. Котьмар юа — тодоз, котьмар кур — юрттыны тыршоз вал. Мадиськон куспын ик мар ке но сачак серемессэ вералоз. Паймисько вал: кызьы меда кулэ интыяз сыӵе тупано кыл шедьтэ?

И. Иванов вал яратоно кузпал, оскымон эш, атай но песятай. Озьы ик усто гожъяськись, кылбурчи. Кылбуръёсызлэн пуштросазы пыӵамын аслаз лулсэрез, ӧръяськем  мылкыдыз, пушказ возем малпанъёсыз. Та дано адями кырӟаны но туж быгатылӥз. Инкуазьлэсь чеберлыксэ, нылпилэсь лулзэ шӧдонэз но туж бадӟым вал, сотэк-а бордаз няняськылӥзы нунокъёсыз? Тунсыко вал солы туала но вашкала история, культура, политика, улон-вылон ужпумъёс. Инмар солы быгатонлык, котьмае шӧдон-валан, чебер кыллык кузьмам. Лулыныз таӵе чылкыт адями сярысь мынам анае шуысал: «Э-э-эй, эсэд кошкоз, ява, мар но дунне адями та Манялэн Осиез».

Мар шуод, ӟеч анай-атайлэн будэтэм нылпиез кужмо пушъето луэ. Иосиф Зотович вӧзын ужаса, пиез Влад Иванов газет поттон ужлы чаляк дышиз. Со элькунамы газет поттӥсьёс пӧлын одӥгез устоез дизайнер-верстальщик. Ангелина нылыз но адӟем карымон нылкышно, кузпал но анай.

Иосиф Иванов, секыт висьыса, 24-тӥ октябре улонысь кошкиз. Калык сое ноку уз вунэты, угось удмурт литературае гинэ ӧвӧл, калык пӧлы но нимзэ зарни букваен гожтыса кельтӥз.

Любовь Ганькова,

Алнаш 

 

 

Удмурт Дунне
By Удмурт Дунне Декабрь 3, 2015 15:04
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<