Любовь Ганькова: Ӟанна пушъе лул пушкын

Удмурт Дунне
By Удмурт Дунне 3 декабря, 2015 14:35
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Алнашысь Л. Ганьковалэн мылкыдыз шур кадь кисьтӥське.

Алнашысь Л. Ганьковалэн мылкыдыз шур кадь кисьтӥське.

Алнаш ёрос — шаерысьтымы одӥгез тужгес удмуртэз ке но, татын но удмуртлыклы нимысьтыз саклык висъяно луэ, угось ас шӧлказ гинэ номыр уг азинскы. Соин ёрос администрация арлы быдэ ортчытъя удмурт культуралы сӥзем нуналъёс.

Одӥгез яркыт ужрад — ёросысь шаерчиен но писателен Любовь Ганьковаен пумиськон — ортчиз ёрос центрысь Искусствоосъя школаын кылем арняе. Та йӧспӧртэм нылкышноен ми тодматылӥм ни «Тӧр шорын» рубрикаямы. газетамы со ӵем печатла аслэсьтыз кылбуръёссэ но веросъёссэ. Но сое кылзыса, ноку уд жадьы вылэм, кышномуртлэн котькуд верамез — визькыл. Юнме ӧз  басьтӥськы, дыр, со кӧня ке ар талэсь азьло калык веранъёсты люканы — соосты  олокӧня номераз печатлаз  «Кенеш» журнал, данакез потэмын аслаз книгаосаз. Со сяна, алигес гинэ «Удмуртия» издательстволэн «гурысьтыз» потӥз вылез книгаез. «Кырӟалэ, кырӟась эшъёсы» нимаське со — татчы люкамын  гуртоосызлэсь гожъям такмакъёс, визьмо верам кылъёс, меӵкытъянъёс. Книга ӝот-ӝот, кие кутымон, чебер вылбамо. Любовь Леонидовна  400 бамъем  выль книгаезлы шумпотэ ке но, кӧтыз уг тыры — 450 такмак гинэ тэриз, 200-эз потытэк кылиз на, лулске со.

Вань улытозяз бухгалтерын ужам кышномурт, арлыдаз вуыса ини, гожъяськыны кутске. Трос аръёс ӵоже тымиськыса возем мылкыдъёсыз шур кадь кисьтӥсько кылбуръёсы, веросъёсы. Мае ке вератэк кылемезлэсь кышкаса кадь, со усьтыр-табыр гожтэ но поттэ, гожтэ но поттэ… Ас мылкыдъёстэ-малпанъёстэ кисьтонлы укыр паймонэз ӧвӧл бен — шыпыт уй котькудӥзлы юрттэ, но кызьы со юалляськыса гуртысь гуртэ пыдын ветлэ, паймыса бырод. Гуртысь огшоры арлыдо кышномурт — ачиз ик фольклорист но, шаерчи но. Со огназ сомында лэсьтэ, тодосчиос быдэс институтэн уг вуттӥсько. Но Любовь Леонидовна со сярысь уг малпаськы — солы кулэ ӧвӧл коньдон но (аслэсьтыз сётоз), дан но. Ӟуння выжые сярысь ваньмызлы вераме потэ, шуэ. Со туж данъяське аслаз выжыосыныз. «Ӟуння», пе, мукет сямен «ӟаннасяська» шуэм луэ. Со котькытын уг буды, туж шер сяськая, но кин ке  шедьтэ ке, пыраклы шудо луэ…

Ассэ Любовь Ганькова малы ке ялан  секыт кылыко шуэ, но люкаськем калык шоры учкыса, солы оскыны уг луы. Ужан нунал шоры учкытэк уго, нуназе шорын  пумиськонэ зал тыр калык люкаськиз. Кузьымъёсын, сяськаосын. Ӟечкыланы вуиз ёрос йыр Виктор Бобров, администрациын ужасьёс, гуртоосыз, Удмуртиысь Писательёслэн огазеяськонзылэн, «Удмуртия» издательстволэн, «Удмурт дунне» газетлэн, «Кенеш» журналлэн кивалтӥсьёссы… Ижын презентациос трослы бездыт ортчо. Нош Алнашын чабо на кылбурлы, кин ке кырӟан мытэ ке, итӥсько мукетъёсыз.

Зинаида Рябинина

Туспуктӥз Михаил Егоров

Удмурт Дунне
By Удмурт Дунне 3 декабря, 2015 14:35
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<