Яратон йӧэз но шунтэ. Кызьы мурт пиналэз аслад кароно

Удмурт Дунне
By Удмурт Дунне 3 декабря, 2015 14:19

Удмуртилэн Тӧроез Александр Соловьёв та нуналъёсы Пичи Пурга ёросысь Яган-Докъя гуртысь Капиталина Ломагинаез «Анайлэн данэз» гадьпусэн пусйиз. Аслэсьтыз 3 пиналзэ умой будэтэм сяна, нылпи юртысь 2 пияшъёслы шунытсэ уг жаля.

К. Ломагина Валера но Сергей пиосыныз.

К. Ломагина Валера но Сергей пиосыныз.

Пумиськон

— Ачим 6 нылпи пӧлын будӥ ке но, ноку ӧй малпалля, семьяе такем бадӟым луоз шуыса, — вера Капиталина Саватьевна. — Кык нылъёсмы вал ни, но мужике туж вожъяськылӥз пилы. Гуртысьтымы ик одӥг кышномуртлэн кык пиосыз будо вал. Солы шуисько: ойдо эшшо быдэн одӥг пинал ваём. Со мыным шуак вазиз: ёрмисьёс сотэк но тырмо. Государстволэн, пе, сотэк но сюдоно муртъёсыз трос. Сюлэм улам пиналы кылдэмын ни вал, оло, соин но кӧты туж ӝож луиз. Начар но юись муртъёс гинэ трос нылпи уг ваё ук! Бадӟым семьяос но кужмо, адӟем карымон  луо.

Та малпан Капиталина Ломагиналы отӥяз но маза ӧз сёты. Калыклы возьматэмез потӥз, трос нылпиё семьяос сельсоветазы уно, соос умой улыны но ужаны быгато. 1997-тӥ арын школаязы люказ Брангурт сельсоветысь бадӟым семьяосты. Соослы зэмос праздник лэсьтӥз, нылпиоссы концерт возьматӥзы. Соку трос нылпиё анайёсты сокем-сокем сӥлы уг каро вал. Соин но, лэся, Капиталина Саватьевналы  шуныт ӝыт кузьмамез понна тау карисез уно вал. Анайёс бератаз жингыръяны кутскизы, соиз я таиз ужпумъя юанъёссы кылдыку. Отӥяз нылкышно малпаськыны ӧдъяз: школаын ужасько, дышетӥсь, Пургала ӵем ветлӥсько, кытчы вазиськыны тодӥсько, нош куд-огез гуртэзлэсь палэнэ но уг поталля ук. Ӵапак сыӵеос понна школае ӧтиз ёрос центрысь пӧртэм удысъёсъя кивалтӥсьёсты. Калык зал тыр люкаськиз, кыӵе но юанъёс ӧз чузъяське.

Калык понна сюлмаськемзэ адӟыса ик, Капиталина Саватьевнаез школаязы нылпиослэсь правооссэс утёнъя инспекторе юнматӥзы. Соку со ӧз ик шӧдылы, сюлмаськонэз отӥяз эшшо но йылоз шуыса. 2009-тӥ арын дораз лыктӥзы ёросысь опекая но попечительствоя ёзын ужасьёс. Юрттэт, пе, кулэ. Кык вын-агайёсты семья басьтћз вал, со соослэсь куштӥськиз. Нылпи юртэ сётыны жаль, пыртыны нокин доры, пе. Вазиськизы: Валераез но Сашаез шутэтскон нуналъёслы ке но басьты, коркаед бадӟым, нылпиосын огкыл шедьтӥськод. Со куспын ми, пе, пиослы семья утчалом.

Ломагинъёслы малпаськыны 3 нунал сётӥзы. Бадӟымез пияш 5-тӥ, пичиез 1-тӥ классэ ветлэ. Сокем пичиесь ӧвӧл ни шуыса, кузпалыныз кенешыны ӧдъяз. Но семьязэ рос-прос дасяса ӧз вутты — пиосты ӵуказеяз ик вуттӥзы. Шутэтскон нуналъёслы гинэ шуизы бере, Капиталина Саватьевна воксё ӧз куалекты.  Но семья утчан — воксё капчи вылымтэ. Озьы пияшъёс толэзьлы  Ломагинъёс дӥне кылизы. Со ик луиз валче улыны кутскемзы.

Тэрытӥськон

— Аслэсьтым нылпиосылэсь будэмзэс но ӧй вала. Нош Валера но Саша вуэм бере анай луонлэсь секытсэ но, каньылзэ но адӟи, — шуэ Капиталина Саватьевна. — Та нылпиос кылдэмен, асламъёсыныз но огкыл шедьтэмысь огдыре дугдӥмы — куспамы маиз ке чигиськиз кадь. Нылъёсы семьямылэн паськытамезлы воксё ӧз  шумпотэ. Пие 9-тӥ классын дышетске вал, сямзэ возьматъян вакытыз. Сергеймес отчыозь мусояса гинэ возьылӥмы, кема возьмамы бере. Валамон ни, пиосын вожаны ӧдъяз. Валералэн но Сашалэн номырзы ӧй вал: дӥсь но, ручка-тетрадь но басьтоно. Пие ӝожомыны ӧдъяз: весь, пе, соослы гинэ оломар но басьяськод, мыным номыр но уд. Соосты яратӥськод, нош монэ уд ни шуыса, пыкылыны кутскиз. Валэктӥсько: пие, тынад самой дуноез дунне вылысь вань — анаед но атаед, нош пиос та ласянь ӝоже уськытэмын. Мон тонэ туж яратӥсько, тон та пумысен воксё куректыны но сюлмаськыны кулэ ӧвӧл, но та вакытэ дырез тросгес висъяно пичиослы, соос мед шӧдозы, куштэмын ӧвӧл шуыса. Шунытмес ӧз шӧдэ ке, семьямы уз пӧрмы, шуи. Пие кылӥз. Но тазьы гинэ семья уг лякиськы вылэм. 2 ар кулэ луиз мыным пияшъёслэн сюлэмазы пырон понна. Аслэсьтыдзэ чабкод но, нош муртлэсьсэ куаретыны но уд дӥсьты. Соос огпол вераса куддыр уг валало, уг кыло. Анайзэс тодо, со кулэмын ни ке но, тонэ, оло, анай чот но уг каро.

Зэм, покчиез, Ломагинъёс доры нырысьсэ пырыкуз ик, шуиз: о-о-о, милемлы татын кельше, ми татын улом. Но мылкыдзэс бугыръясь сюриз. Пияшъёслэн атайзылэн сузэрез Ломагинъёслы жингыръяны кутскиз: малы, пе, асьтэлы пиосты басьтӥды. Улэм-вылэмды но, пе, кыӵе, ум тодӥське, учкыны лыктом. Соку Капиталина Саватьевна шуиз: лыктэ, учке, пиослы тӥ бордын умойгес луоз ке, басьтэ, мон кужмысь уг возьы, соосты ачим курыса, ӧй ветлы. Кышномурт соку ик жингыръямысь  дугдӥз.

Асьсэос пияшъёс нырысь-валысь туж кышкало вал, Ломагинъёс но соослэсь куштӥськозы шуыса.

— Картэлэн ужез ку кызьы йылпумъяське. Куддыр воксё беромыса бертэ. Саша огпол корка кузя солань-талань ветлэ но ялан лулӟылэ: папа ӧвӧл, папа ӧвӧл. Вуоз ай, шуисько. Со туж кышказ: мужике бордысьтымы кошкиз, оло. Ачим но кемагес школаын ӝегасько ке, Саша юа ни вал, кытын сокема улӥ шуыса.

Пиос зол кышкатэмын вал, шӧдске. Нырысь нуналъёсаз мунчо эстӥмы. Мужике сьӧры ыстӥсько, веникен пыртоз, шуисько. Уг кылисько, ум мынэ, шуо. Буйгатӥ: огпол гинэ мисьтӥськоды, собере отчы уд ветлэ ни. Кельшем, лэся. Мукетъят мунчо эстӥм но, азьло ик дасяськыны ӧдъязы, — тодаз вае нылкышно.

Нырысетӥ нуналъёсаз Капиталина Саватьевна кытчы пырон инты ик ӧз шедьтылы. Валера сямызъя лякытгес ке, Сашаез жугиськемез понна школаысь но улляны медо ни вал. Анай-атайёс куриськон гожтӥллям, Сашаез школае медаз ни лэзе шуыса. Дышетӥсьёс но соин огкыл шедьтыны ӧз быгатылэ.

— Ачим тодӥсько, туж секыт сямыз. Дорын гинэ но миндэръёсты сэрпалляз. Но директор доры вамыштӥ. Шуисько: со умой улонэз адӟемын ӧвӧл, кызьы соку ик адями кадь ассэ возёз, нуналскын уз тупатскы, но воштӥськоз ай, эн уллялэ. Кылӥзы. Пие пумен жугиськемысь дугдӥз. Яратон тужгес бадӟым кӧтӝожез но ворме вылэм.

Мон школаын ӧй ужасал ке, нылпиос пӧлын ӧй бергасал ке, кин тодэ, оло, пиосты визьманы но ӧй быгатысал. Уката ик пиосты милемлы пумит пуктӥсьёс вань кадь. Пиосты вордыны кун уксё сётэ. Валераен Саша сое ми асьмелы быдтомы кожало, лэся. Уксёез одно быдтыны туртто, ӵуказе сярысь уг малпало. Ог-огзылэсь дӥсьсэс уз ик нуллэ. Огпол пичиез курткатэк бертӥз. Кытын, шуисько. Огпол гинэ дӥсяса вуттӥз вал. Саптаськиз но, куштӥ, пе. Выль мае ке ӧм шедьтэ ни. Выльзэ басьтоно луиз. Уксёез кутыны уг ик валало, — вера Капиталина Саватьевна.

Валчеяськон

Тужгес секыт вакытъёсаз Капиталина Ломагинаез вала но буйгатэ картэз. Ёрос администрациысь семья ужпумъёсъя ёзэн кивалтӥсь Галина Пушкарёва но котьку чакласа возе. Нырысь-валысь телефонме ик киысьтым ӧй куялля, ялан Галина Пушкарёваен кенешылӥ, шуэ трос нылпиё анай. Кин тодэ, мар, пе, дауртысал ни сотэк. Котькуд праздниклы быдэ Ломагина басьтэ вылӥ кивалтӥсьёслэсь ӟечкылан открытка. Сыӵе дыръя, пе, малпасько: мыным оско. Та малпан азьлань вамыштыны кужым сётэ, шуэ.

Али Ломагинъёсын Саша пизы гинэ улэ. Мукетъёсыз атай юртысь потӥзы ни. Таня нылзы аслэсьтыз ужзэ мытыны турттэ, ужбергатӥсь кариськемез потэ, Надя нылпиен утиське. Сергей пизы Ижысь гурт удысъя академиын дышетске. Валера Казаньысь военной суворовской училищеез йылпумъяз, али танковой вылӥ училищеын визь люка. Саша 8-тӥ классын дышетске. Яратоно предметэз — история. Ёросысь олимпиадаосы но пыриське. Гуртын хозяйствозы бадӟым, семьяезлы юрттӥське. Анай-атае кадь адӟем карымон луэме потэ, шуэ.

— Анай шуыны ноку ӧй косы. «Тӥ табере мынам» шуэме гинэ вань. Но пиос асьсэос озьы вазисько.  «Анай» кыл «яратӥсько» шуэмлэсь но бадӟымгес. Вань нылпиос но пумен эшъяськизы. Тужгес но шунытэсь кусыпъёссы пиослэн. Талэсь бадӟым шумпотон ӧвӧл, — вера Капиталина Саватьевна.

Елена Сараматова

Туспуктэмъёсыз геройлэн

Удмурт Дунне
By Удмурт Дунне 3 декабря, 2015 14:19
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<