«Вуж Мултан» спектакль но М. Петров

Удмурт Дунне
By Удмурт Дунне Ноябрь 26, 2015 14:03
Петров_Михаил_Петрович_(писатель)

Михаил Петровлы 110 ар тырме.

Удмурт литератураысь классиклы Михаил Петровлы 110 ар тырме. Со сярысь мон нырысьсэ кылӥ, Удмурт театрысь «Вуж Мултан» спектаклез учкыса.

Со вал 1945-тӥ арын тулыс Россиысь национальной театръёслэн смотрзы дыръя. Мон  пичи вал ай. Сцена вылысь адӟеме улытозям сюлмам кылиз. Михаил Петрович соку фронтын ожмаськиз. Атае шуиз, со, пе, шаерысьтымы одӥгез тужгес устоез писатель. Михаил Петровлэн пьесаезъя ик пуктэмын вал «Вуж Мултан» спектакль.

Удмурт пединститутын дышетскыкум ини, та писательлэн творчествоеныз матысь тодматски. 50 ар тырмонзэ пусйыса, институтысь филология факультетын Михаил Петровен пумиськон радъязы. Соку со сярысь трос гожъязы газетъёсын, веразы радио пыр. Одӥгаз бадӟым аудиторие трос студентъёс но дышетӥсьёс люкаськизы. Писателен пумиськон бадӟым праздниклы пӧрмиз. Удмурт но ӟуч кылъёсын кылбуръёссэ лыдӟимы. «Нет! Не дикие народы…» — кутски мон дырекъясь куа-раен. Берпуметӥ куплетсэ лыдӟеме бере Михаил Петрович ӝӧк сьӧрысь каллен гинэ султӥз но, дорам лыктыса, киме кырмиз. Киыз вал туж юн но шуныт…

Ӵуказеяз юбилейзэ паськыт пусйизы Дзержинский нимо клубын. Милям курсысьтымы вань студентъёс мынӥзы со пумиськонэ. Трос данъянъёс, вераськонъёс вал. Тау карон кылъёс веракуз, М. Петров шуиз, туж трос дыр, пе, юнме быриз, кӧня малпанъёс быдэсмытэк кылизы. Оскытӥз: кулэ ке, вань кужымме, улонме но сёто яратоно Родинае понна. Мынам син шорам йӧтӥз солэн кӧдэктэм ымнырыз.

Нош ӵуказеяз писатель улонысь кошкиз. Со вал 1955-тӥ арын. Мугорзэ поттӥзы Удмурт театрлэн юртысьтыз.  Мынам мамае театрын ужа вал. Тодам лыктэ солэн мадемез. Ымнырыз льӧль адӟиськемысь, Анна кузпалыз нокызьы уг оскы, пе, картэз кулэмын шуыса. Пыдкутчанзэ куштытыса ик, врачъёсты М. Петровлэсь пыдзэ эскерыны косэм.

Советской ульча кузя мыныса, «Нефтемаш» заводлы пумит Южной шайвылэ сое пырак пыдын нуизы. Кышнозэ кунултыса валтӥзы. Туж трос калык люкаськиз Михаил Петровичез берпуметӥ сюрес вылэ келяны: кивалтӥсьёс, писательёс, шаерысьтымы тодмо адямиос, лыдӟисьёс, институтысь быдэс филфак — ваньмыз, кин тодэ но яратэ вал дано писателез.

 Анна Евсеева

 

Удмурт Дунне
By Удмурт Дунне Ноябрь 26, 2015 14:03
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<