Улонысь кошкиз кылбурчи Иосиф Иванов

Удмурт Дунне
By Удмурт Дунне Ноябрь 3, 2015 12:00
И. Иванов сабырлы воргорон вал.

И. Иванов сабырлы воргорон вал.

24-тӥ октябре выжон уе улонысь шӧдтэк шорысь кошкиз нылпи кылбурчи, Удмуртиысь культура удысысь дано ужась, «Алнашский колхозник» газетлэн азьвыл редакторез Иосиф Иванов. Солы вал 62 арес.

Алнаш ёрос библиотекае «Удмуртия» издательствоын поттэм книгаосты вузаны вайыло. Со книгаос дуре мон но ӵемысь кожасько. Син шорам йӧтӥз Иосиф Ивановлэн «Бакчаын будэ шунды» покчиослы книгаез. Туэ печатламын со. Киям кутӥ но, сюлмы икак луиз: сокем чебер, гочатӥсь зуч-зуч книга. Соку ик аслым шуи: удмуртлыклы сӥзем толэзе (шуркынмонэ) одно презентация ортчыто.

Вордӥськон нунал. Ӵукна. Сӥзьыл каникулъёслэн нырысетӥ нуналзы. Учительскойын пукисько, толэзьлы план дасясько. Малпаськисько, кызьыгес ортчытоно Иосиф Ивановен пумиськон.

Жингыртӥсь луиз. Ёросысь дышетонъя управлениысь методист В. Векшина вылэм. Ӟеч мылкыдын вази пумитаз. Вераськемедъя, пе, шӧдӥсько: номыре уд на тодӥськы. Иосиф Зотович кулӥз. Суй-пыдъёсы ик шальтразы кадь.

Иосиф Ивановез кемаласен тодӥсько ни. Со ёросысьтымы ик Улын Котныр гуртын вордӥськемын. Егитысен гожъяськиз. Мон но гожъяськисько вал бере, редакция бордын ужась «Ошмес син» литобъединение ветлӥ. Иосиф Иванов но пӧламы вал.

«Алнашский колхозник» газетын ужакуз, матысьгес тодматскимы ни. Мон Тыло школаын литературно-творческой кружок нуи. Сое радъяны ӵемысь визь-кенеш кулэ луылӥз. Куддыр нылпиосын редакцие я типографие экскурсие вуылӥмы.

Иосиф Зотовичлэн нырысь «пыжем» «Кин вае ӟардонэз» книгаез пичи гинэ вал. Суредъёсыз но сьӧдо-тќдьыё. Но соку ик кылбуръёсыз йӧн-йӧнэсь потӥзы, тэтэ карись кылбурчилэн кадь ӧз йӧтэ. Туж кельшиз аллитерациез кутыса ӝыт сярысь гожтэм кылбурез.

«Тон но мон, мон но тон, ми но тӥ» книгаез потэм бере кружокмылэн занятияз ӧтьылӥмы авторзэ но ёросысь удмурт кылъя дышетӥсьёсты. Пиналъёс котыр ласянь эскеризы, сэрттӥзы-пертчизы кылбуръёсты. Ужезлы нылпиос  вылӥ дунъет сётӥзы. Кылбуръёсыз югытэсь, капчиен лыдӟисько. Тон но нылпи дуннее выйиськод. Автор мур шӧдэ нылпи психологиез. Озьы удмурт литературае йыгмыт вамышъёсын лыктӥз выль нылпи кылбурчи.

Иосиф Зотович син шоры йӧтӥсьтэм, сабырлы, трос вераськисьтэм, огшоры гинэ, но со вакытэ ик йӧно, визьмо, тыршись воргорон вал. Сюлмаськиз удмурт кылмы понна. Анай кылъя дышетӥсьёслы мыло-кыдо юрттылӥз.

Кема аръёс ӵоже  «Алнашский колхозник» газетлэн редакторез луыса ужаз. Газетлэн тиражез, солэн ӟечлыкез понна сюлмаськиз. Совето Союз куашкам бере секыт аръёс вуизы. Бумага утчаса, кӧня бызьылоно луиз. Ивановлэн тыршеменыз, Алнаш типография книгаос поттыны кутскиз. Иосиф Зотович ваньзэ ачиз редактировать кариз…

Собере улоназ сьӧд буёлъёс потӥзы. Редакторысь кошкытӥзы, типографиез ворсазы, сюлэмаз операция лэсьтӥзы, кузпалыз кема дырлы больницае сюриз. Пиез, шудтэм учыре сюрыса, улонысь кошкиз. Нылпи кылбурчилэн перо улысьтыз секыт мылкыдо, улон-кулон сярысь кылбуръёс потыны кутскизы.

Сыӵе мылкыдъёсыз ӧз кельше. Ӧй чида, жингыр-тӥсько. Шуисько, уг ярало кылбуръёсыд. Ымнырыдъя ӧвӧл соос.

— Мар карод, улон та! — пумитам мур лулӟиз кылбурчи.

Библиотекаысь киям выль потэм книгазэ кутэме бере, вылбамысьтыз шундыё куазен кырӟаса суредаськись кильтро ӟольгыриез адӟыса, капчияк шокчи: Иосиф Зотович нош ик ас ӧраз пырем… Но кемалы вылымтэ… Дунне — колёса, сюлэм — пияла. Нош тэшкамез кема уг ни улы.

 Елена Смирнова,  

 Алнаш ёросысь

Тыло школаысь дышетӥсь

Удмурт Дунне
By Удмурт Дунне Ноябрь 3, 2015 12:00
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<