Удмуртсэ палэнтон — сьӧлык

Удмурт Дунне
By Удмурт Дунне Ноябрь 3, 2015 11:34
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

«Удмурт дунне» газетлы 100 ар тырмонэн валче поттэм энциклопедической справочник кылем арня вискын Можга ёросысь Пазял библиотекае но вуиз. Татын ортчиз лыдӟисьёсын пумиськон.

Нуназе котырын калыкез секытгес люканы, тросэз ужысь уг ваньмо, шуэ библиотекарь Надежда Кузнецова. Куд-огез мырдэм ӝутскиллям лыдӟон юртэ вамыштыны. Собере, паймоно кадь, бертэмзы ик уг поты ни. Умой, пе, тазьы кылзыса пукыны. Таӵе кенешонъёс газетчиос понна но пайдаё. Тодӥськод, кин лыдӟе газетэз, мар тунсыкъяськытэ адямиосты.

_DSC2516

Пазялъёсын пумиськон.

Галина Антонова газетэз 36 ар ӵоже басьтэ ини, солэсь азьло анай-атайёсыз гожтӥськылӥзы. Газетэз туж яратыса лыдӟе, уката ик «Берекет» приложениез. Кибашлы нылкышнолы со пайдаё дэмланъёс вуттэ. Библиотекарь Надежда Кузнецова шуэ, политика сярысь иворъёс гинэ но, удмурт сямен лыдӟиськод ке, сюлме мургес пыӵало. «Шӧкыч» бамысь адӟемез потэ  сценкаосты, ужамы, пе, со туж кулэ. Пумиськонэ лыктэмъёс пусйизы, газетысь нырысь ик учкиськом, пе, асьме палъёс, ёросмы сярысь гожъямъёсты.

Редакциямы кема аръёс ӵоже ужаз та гуртын вордскем журналист но кылбурчи Татьяна Чернова, кыл кутӥсь секретарьын тыршиз Елизавета Камашева. Нялтас вераса, Елизавета Николаевна та вакытэ гуртаз улэ, со милемлы юрттӥз калыкен но тодматскыны, кӧтмес но тырытӥз — тау! Та гуртысь ик потэмын газетэн кема аръёс ӵоже кусып возем авторъёсмы: библиотекарь, кылбурчи Лидия Чернова, Александрово школаысь дышетӥсь Анатолий Комаров. Пазялъёсты газет ӧз вунэтылы, гуртоос сярысь пӧртэм материалъёс потылӥзы. Кусыпъёсмы али но уг ышо. Татын улэ «удмурт кизилимы», шаермес Россиын но  данэ поттэм егит дышетӥсь Олег Чувашов. Но лыдӟисьёсын эшъяськонмы берло дыре сӥя. Ог 20 аръёс талэсь азьло Пазялын «Советской Удмуртия» — «Удмурт дунне» газетэз быдэс гуртэн сямен басьто вал, таяз арлы 9 мурт гинэ гожтӥськемын.

Кызьы вырӟытоно калыкез? Гурт поселенилэн йырыз Владимир Рябов ӵектӥз Виль нуналэ гуртазы лыдӟисьёсын фестиваль радъяны. «Ӟечбур!» газетлэн юнкоръёс понна та аръёсы радъям элькун ужрадэз усто, пе, ортчиз. Ӟеч ӵектон. Чорыг лым яке ӝук сиыны калыкез улляса сямен поттоно уз луы. Троссэ ыштэм эшъёсмес вераськон, шулдыръяськон сямен газет пала берыктыны луысал, выльёсыз но гожтӥськисьёс сюрысалзы, оло.

Пумиськон бере Кремлёвъёс доры кожимы. Та семьялэн нимыз энциклопедиямы но пыриз: выль дауре выжон аре котькинлэсь вазь вордӥськем нунылы (газетмылы гожтӥськемъёс пӧлысь) сӥзимы вал коляска. Пазялысь пияш куинетӥ луиз. Вячеславлы 15 арес ни, асэныз адӟиськыны ӧз кылды, нош Люба апаеныз но анаеныз тодматскимы.   Алевтина Кремлёва шуэ, анае Серафима Зюзякова улэп дыръя «Удмурт дунне» газетлы весь гожтӥськылӥм, берло дыре нокин ӝуткась ӧз луы ни, пе. Выльысь мылкыд кариз газетэнымы эшъяськыны.

А. Кремлёвалэн киыз капчи вылэм. Магазинын ог 10 минут ӵоже газетлы эшшо 3 мурт гожтӥськиз на. Столовойын ужась Татьяна Санникова ачиз ик пайме газетэз басьтымтэезлы. Пиналъёсы дышетскыку, весь, пе, октылӥм, кузпалы но яратэ лыдӟиськыны. Ӵош ужась эшез Надежда Витвинова но газетмес весь октылӥ шуэ. Нош али, пе, 91 аресъем анаймес утялтӥсько, пудо котырын вырисько, жадеменым номыр шоры учкеме уг ни поты, азьланяз адӟом, шуэ. Вуз карись Галина Перминова вунэтэм ни вылэм газетмылэсь туссэ-буйзэ, пуштроссэ. Тодматскемез бере со но гожтӥськоно кариськиз. Вераськеммес кылыса, магазинэ соку гинэ пырем  доярка Людмила Антонова вазиз: мон но гожтӥсько, удмуртэз лыдӟытэк сьӧлык. 3 арзэ вис каремез бере мӧзмем, шӧдске, газеттэк.

Газетлы гожтӥськыны мылкыд карисьёс гуртын вань, соос доры вуттӥськыны гинэ кулэ. Соиз потоз ини почтальонъёслэн мылкыдзы бордысь но.

Лия Малых

 

Удмурт Дунне
By Удмурт Дунне Ноябрь 3, 2015 11:34
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<