Удмуртиын 2016-тӥ арлы бюджет эскеремын

Удмурт Дунне
By Удмурт Дунне 5 ноября, 2015 16:24
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Дуннеысь экономикаын шуг-секытъёс кылдэм бере элькунамы 9 толэзь талэсь азьло кутэмын кризисысь потонъя план.

Депутатъёс тодматскизы кризисысь потонъя планлэн быдэсъяськеменыз.

2015-тӥ арлы бюджетлэн расход люкетэз ар пумозь йылтэмын луоз на эшшо 100 миллион манетлы: озьы расходъёс туэ 62 миллиард 246 миллион манет луозы. Коньдон ужпумъёсъя министр Станислав Евдокимов ивортэмъя, тамында тыр кун кредит басьтэмын — сое висъяны чакламын Мугорез кыдатонъя, спортъя но егитъёсын ужанъя министерстволы. Бадӟым люкетэз кошкоз та министерстволэн кичӧлтэмезъя ортчылӥсь ужрадъёслы, спортъя клубъёсты возёнлы, озьы ик егитъёсын ужась специалистъёслэсь уждунзэс пичилы ке но йылтыны — бюджет чотын тыршисьёс пӧлын таосызлэн доходзы тужгес ичи, шуиз С. Евдокимов.

Дуннеысь экономикаын шуг-секытъёс кылдэм бере элькунамы 9 толэзь талэсь азьло кутэмын кризисысь потонъя план. Кыӵе йылпумъянъёс лэсьтыны луоз та дырлы? Со сярысь ивортӥз Правительстволэн Тӧроез Виктор Савельев.

— План бадӟым — 133 люкетлэсь, — вераз со. — Отын тужгес но бадӟым саклык висъямын инвестициосты кысконлы, промышленностез, гурт удысэз азинтонлы. Палэнысь уксё кыскон сярысь верано ке, туэ кадь ноку но такем бадӟым саклык ӧз висъяськы инвестициосын герӟаськем законъёслы — депутатъёс зол тыршизы. Юнматэмын уно законъёс: калыклы тужгес кулэ луись проектъёслы-объектъёслы аукцион ортчытытэк музъем висъянъя, инвесторъёслы ӟечесь условиос кылдытонъя, выт тыронзэс капчиятонъя но трос мукет. Вань та амалъёс шаерамы кыскыны юрттозы 3 миллиард манет пала инвестициосты, кылдозы ог 2 сюрс ужан интыос. Кылсярысь, «Элеконд» огазеяськонлы палэнысь уксё шедьтэмын алюминий конденсаторъёсты поттонъя проектсэ быдэстыны, озьы ик бадӟым уж нуиське Удмуртиын машина поттонъя кластерез кылдытон пумысен. Огъя вераса, шаерысьтымы 29 огазеяськон пыриськоз пӧртэм проектъёсты пыӵатонэ, та понна соослы пӧртэм капчиятонъёс чакламын.

Куд-ог федерал программаосы пыриськыны элькунмы куддыр уг вутскы ке, гурт удыслы сӥземъёсаз Удмуртия котькудаз ӵектӥсь-кемын. Федерал бюджетысь висъяны чакламын 2 но ӝыны миллиард манет, туэ ар куспын вуэмын 1 миллиард 400 миллионэз. 2020-тӥ арозь шаермы азе курон пуктэмын: араз йӧл поттонэз 1 миллион тоннаозь вуттоно. Та туж бадӟым ужпум, одӥг арскын гинэ сое быдэстыны уз пӧрмы. Депутатъёс Правительстволы вазиськизы: амал утчано вуоно арын АПК-лы тросгес юрттэт висъяны.

Елена Никитина

Удмурт Дунне
By Удмурт Дунне 5 ноября, 2015 16:24