«Удмурт Кенешлэн» бадӟым ӧтчамез ортчоз 10-тӥ-11-тӥ тулыспалэ

Удмурт Дунне
By Удмурт Дунне 18 ноября, 2015 13:00
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
DSC03559

Ӧтчамын ваньмыз луыны кулэ 382 делегат (котькуд 1400 удмуртлэсь быдэн 1 адями).

Таяз арняе «Удмурт Кенешлэн» ортчем Пичи кенешаз Игорь Семёнов ивортӥз: 13-тӥез Бадӟым ӧтчам ортчоз 2016-тӥ арын 10-тӥ-11-тӥ тулыспалэ (феврале) Удмурт театрын.

Пусйыны кулэ: таӵеез кемалась ӧй вал ни, удмуртъёслэн берло отчамъёссы ортчылӥзы дыртӥд-вуттӥд одӥг нунал ӵоже. Но та рад, экономикаын секыт югдур шоры учкытэк, элькун кивалтэт дурбасьтӥз «Удмурт Кенешлэн» таӵе ӵектонэзлы, угось нуналскын гинэ ужез рос-прос радъяны нокызьы уг луы — дыр кошке отчётлы но быръёнъёслы гинэ, нош зэмос сюлэмшугъяськытӥсь ужпумъёсты эскерыса вуттоно ӧвӧл. Пичи кенеш чакламъя, ӧтчамын делегатъёс ужалозы 6 удысъя:

— дышетон но кылэз азинтон,

— этнополитика но право,

— егитъёсын ужан,

— лулчеберет,

— ивор вӧлмытон,

— семья но тазалыкез утён.

Ваньмыз луыны кулэ 382 делегат (котькуд 1400 удмуртлэсь быдэн 1 адями). Шаерысьтымы сяна, лыктыны кулэ сьӧрлось но куноос: Москваысь, Башкортостанысь, Татарстанысь, Свердловск, Перм, Киров улосъёсысь, Комиысь, Марий Элысь…

Съездлы дасяськон мытэмын ни, соин ик кинлэн вань отын эскероно ужпумъёсъя ӵектонъёсыз — ивортэ. «Удмурт дунне» озьы ик дась мылкыдъёстэс-малпанъёстэс печатланы но кивалтӥсьёс доры вуттыны.

Пичи кенешын озьы ик тодмо луиз: Удмурт Элькунысь Общественной палатае ӵектэмын «Удмурт Кенешлэн» тӧроез, Россиысь Фин-угор калыкъёслэн консультативной комитетсылэн ёзчиез Игорь Семёнов. Та интыын азьвыл ужаз Валентин Тубылов.

Зинаида Рябинина

Туспуктӥз Леонид Гонин

Удмурт Дунне
By Удмурт Дунне 18 ноября, 2015 13:00