«Удмурт действие» пьеса. Дарали Лели

Удмурт Дунне
By Удмурт Дунне Ноябрь 26, 2015 13:34
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Дарали Лели

Шудӥсь муртъёс: куинь эктӥсь нылашъёс, Депутат, Чеберай, кык кенакъёс Дарья но Марья, телешоуэз нуисьёс Шуямов но Шуямова, вить воргоронъёс, школьникъёс, Йӧно нылкышно, Эстрада кизили, Журналистка, Кылбурчи, Тодосчи, Редактор.

Сцена буш. Чузъяське:

Кемалась-кемалась, вашкала дыръёсы…

Сьӧр гуртэ соос мыно, сьӧр гуртэ, шудон пӧлы…

Кыӵе потэ, кыӵе потэ эмезен чай юэме…

Хватает Волге широты и сини, но с Камою она ещё сильней…

Вамыштоно ке, мед кылёз пытьы…

Мунчоям кортӵог шукки но, мучоло отчы оши…

Бӧрсьысь бӧрсьы сцена вылэ нимаз яке пичи группаосын геройёс пото, соос асьсэ понна ветло, мукетъёссэ уг кыло, уг адӟо. Нырысь геройёс ас понназы лабырто, пумен золгес но золгес верасько. Пумаз кесясько.

Куинь эктӥсь нылъёс пото. Соос стилизованной удмурт дэремъёсын, мыняса но ваче кутскыса, эктыса ортчо, огысьтыз катанчи сьӧрысь потыса, мукетаз ышо. Кӧня ке дыр ортчыса, выльысь пото. Тазьы олокӧня пол кошко, люкетыса кадь мукет геройёслэн азязы потало, вӧзтӥзы эктыса кошко.

Депутат (костюмен). Ӟечесь-буресь, люкаськем калыкъёс! Ивор вайыны дыртӥсько, шумпотон мугмес шараяме потэ. Таяз аре ми быдӟым удмурт кизилилы синпелет пуктыны чакласьком… Таяз арын чакласьком…  коньдон висъяса таяз арын чакласьком, бюджетысь… пуктыны синпелет малпаськом. Кхм. Мон…

Чеберай (атлас дэремен но айшетэн, Депутат азе потыса). Мон  Мальвина Перевозчикова, вордӥськи Починка гуртын, дышетскисько сельхозакадемиын 1-тӥ курсын. Яратӥсько пужъятскыны, чильпаськыны, губияны, кырӟаны, ветлӥсько «Вуюись» ансамбле, кылбур гожъясько. Мон Чеберай, малы ке шуоно мон туж но туж яратӥсько вордскем гуртме, яратӥсько эшъёсме, анай-атайме! Нош али мон тӥ понна кырӟало.

Яратоно Починкае,

Яратоно возьёсы,

Туж мусо потӥськоды,

Яратоно эшъёсы…

Кык кенакъёс вашкала дэремъёсын, киязы пӧраськемен дускоен пото, зӧк куараосын кесяськыса, Чеберайлэсь кырӟамзэ сого.

Дарья. Чале, чале, чале! Мелэ, мелэ, мелэ! Тани перепеч пӧрам! Перепеч, шекера! Куно луэ, веръялэ, До-то-во ческыт! Ачим пӧрай но, сии но, ачим ик витьсэ ик сии, дотово ческыт! Сие, ойдо, сие! Сие ни!

Марья. Кӧня ке пӧраськемъяськи вал. Коть веръялоды-а, мар-а, ческыт ик ӧвӧл но, сюдом ни-а, мар-а, сокем уд курлалэ, дыр, пичи ке но коть веръялэ пӧрам вылысь… Сӥльтэк ке но, зумыттэк ке но, сиёды ни-а, мар-а. Кӧтты сюмаз, дыр, пичи ке но коть салам каром, кубистаен ке но, кӧш уд шуэ-а, мар-а…

Куинь эктӥсь нылъёс азязы пото, сцена кузя, номыр вератэк, эктыса ортчо: пыдъёссэс урдыса, пыдтыш вылазы пуктылыса, киоссэс азьлань ӝуткаса.

Телешоу нуисьёс (гань-гань пуксё сцена урдсысь диван вылэ, туала дэремъёсын, нылкышнолэн йыраз баблес парик, гадяз бадӟым весь, воргоронлы лякемын пуштрес мыйык). Умоесь, гажано учкисьёсмы! Тӥледын котьку сямен «Удмурт арня» телепередача. Сое котьку сямен ик нуиськом ми, Светлана но Валентин Шуямовъёс. Нырысь ик лыдӟомы саламъёстэс. Флора Борисовна Петрова ӟечкыла нунокъёссэ выль дышетскон ар кутскемен, сӥзе ӟеч отметкаос, юн тазалык! Котбам гуртысь Степан Соколов ӟечкыла Раиса Ивановна Оконниковаез выль кенер пуктэменыз, табере бускелезлэн кечез бакчаяз уз пыра, пе. Нош али тӥ понна шулдыр кырӟан чузъяськоз.

Вить воргоронъёс (етӥз тэтчаса пото, яркыт атлас дэремъёсын, огез арганэн).

Гажаса-яратыса но

Тон понна кырӟан гожтӥ.

Маиз ке шуак ӧз тупа,

Кылъёссэ утыр воштӥ.

 

Мыдлань гурен кырӟай-верай,

Мылкыдме, лэся, сурай.

Тон мыным вождэ эн вай,

Мукетсэ нылэз гажай!

 

Синмаськи сьӧд синкашлы,

Векчи куско апайлы,

Мылкыдыз кӧттырмостэм —

Соин штанэ кисытэм!

Школьникъёс, бадӟым плакат вайыса, вить воргоронъёс азе султо но вылаз «Аслэсьтыд кылдэ яратытэк, мукетсэ уд дышы гажаны» чурысь «гажаны» кылэз ӵушо. Плакат сьӧрысь воргорон куараос согисько. Огез школьник та чурез шара вера.

Йӧно кышно (интеллигент, ӝикыт, туслы). Ну, ӧвӧл ке адямилэн культура валанэз, ӧвӧл ни. Уд валэкты, малы кулэ рояль басьтыны. Отын мукет уровень! Тили-тили, трали-вали, коллективъёсты фестивальёсы келяло, нош рояль басьтыны уг быгато. Клубен кивалтӥсь! Мон со концертазы ноку уг мыны, со кышнооссы оломар пасьтаесь, синэз нярӟытӥсь буёло дэремъёсын, пиньёссы чиляло, чыртывесьёссы чиляло, голошаоссы чиляло, арганчизылэн йыртышкыз чиля! Мон ни за что отчы уг мыны. Одӥг копейкаме но уг быдты сыӵе концертлы. Мон Тото Кутуньолэн концертъёсаз гинэ ветлӥсько.

Эстрада кизили (лапег, шаплы, валаны уг луы: кышно яке воргорон. Фонограмма куаразэ соге, микрофонэ кырӟа — зал тыр тыц-тыц-тыц куара шуккиське).

Ай-яй-яй, яратӥсько тонэ,

Ай-яй-яй, ӟыгыртӥсько тонэ,

Ай-яй-яй, мыкыртӥсько тонэ,

Ай-яй-яй, чупаллясько тонэ.

Журналистка (Эстрада кизилилэсь микрофонзэ тала, крезьгурзэ кысэ но гань-гань камера азе кадь вера). Иллягурт фермаын туэ шӧдскымон уно шугадӟонъёс. Силос люкамын кулэезлэсь ӝыныез гинэ. Комбикорм басьтон сярысь вераськонъёс мыно ке но, дефицитэн йырин коньдон ужпумъёсты сак чаклано. Уксё тулыс ужъёсыз дыраз быдтонлы висъямын вал, таин сэрен тракторъёс пумысен сюлмаськонъёс йыло. Выль техника коньдонэз сюпсе, кызьы сиён-юон сярысь гинэ сюлмаськод? Иллягуртъёс шуг-секытъёссэс пертчон вылысь ёрос кивалтэтлы вазиськизы. Шуозы-а скалъёссы шумпотыса «му-у!», тодмо луоз муниципал кылдытэтлэн йырыз берпуметӥ кылзэ верамез бере. Елена Орлова, Сергей Банников, «Иворъёс».

Кылбурчи (палэнскыса сылэ, сэргын, футболка вылаз «Кылбурчи» гожтэмын, номыр уг вера, одӥг-ог ветлэ). Ы… Пы!  Мы… пы…

Тодосчи (арлыдо, тушо, удмурт пужыё тӧдьы пенжакен воргорон). Удмурт адямилы кулэ вӧсь. Со инкуазьлы матын, со инкуазьысь вордске но кошке инкуазе. Араз кык пол люкано быдӟым вӧсь. Кар шорын, писпуосын котыртэм кыралын, конечно, со писпуос ог 50 аресъемесь луыны кулэ, чылкыт интыын люкано калыкез но бичано котькудӥзлэсь быдэн кырым кеньыр, котькуд дас кырымлы — 1 ӵӧж, 20 кырымлы — 1 ӟазег. Со интыын будыны кулэ чечытурын но виртурын, со турынъёсты бичано, 1 муртлы 3-4 модос чакласа, пононо одӥг казанэ но пӧзьтоно 1 минут но 40 секунд.

Редактор (дыртыса пыре, котырак учке но серектыса тамак кенжытэ, ас понназ малпаськемзэ шара вера). Ваньмыз со… тодмо со. Уг лыдӟисько удмуртъёс. Али самой бадӟым шуг-секытэз — адями мед кияз книга кутоз. Удмуртъёс мед лыдӟиськозы шуыса, гожъяны кулэ тунсыко, сюжет сярысь малпаськоно, сюжет мед бордаз кыскоз: адями пыре столовое, пельнянь басьтэ, кизэ миськыны мынэ, берытске но — пельнянез ӧвӧл ни. Всё, детектив кутске. Отчы вуо гангстеръёс, пельняньзэ лушкало, со пельнянез нуо охранаен, тонированной машинаосын, оказывается, со пельнянь пушкын алмазъёс ватэмын…

Кык кенакъёс, паймеменызы ымзэс усьтыса ик, сыло).

Дарья. Ма, тынад, малой, сиемед потэ, дыр?! Тани перепеч пӧрам! Си, эн возьдаськы! Ачим лэсьтӥ, няньзэ но, пуштроссэ но. Си ни, си!

Марья. Мынамез кубистаен гинэ но, сием потэм вылэ сыӵеез но умой кошке, дыр? Кубистаензэ веръялод шат? Ческыт ик ӧвӧл но… Веръятэк эн кельты ни ваем вылысь. Ма, уз сииськы шуыса, малпай вал ик но, оломар вайи ни, доре кельтыны жаль потӥз, оло, пӧй, кин ке сиись луоз ик.

Редактор кыксэ ик перепечез кутэ но я огзэ, я мукетсэ куртче. Кенакъёс вожвылъяськыса кадь эшшо мычо, редактор, номыр вазьылытэк, куша. Каблукен коккетыса, Чеберай лыктэ но соос шоры вожомыса учке, собере чеберъяськыса азязы султэ.

Чеберай. Нош али мон кырӟало!

Яратоно Починкае,

Яратоно возьёсы,

Туж мусо потӥськоды,

Яратоно эшъёсы.

Котькуд ошмес,

котькуд букос,

Котькыӵе но сэрегез

Мылкыдэз капчиятэ но

Буйгатэ сюлэм шугез.

Журналистка. Починка гуртын, нялтас вераса, улӥ урам пумысь свалка али ке но утялтэмын ӧвӧл. Гуртоос верамъя, администрация та ужпумез сэрттыны-пертчыны уг дырты. Ми жагтӥськемъёслэсь туссэс эскерим но тунсыко йылпумъянъёс лэсьтӥм: починкаослэн яратоно суръёссы — «Кам шур» но «Куинь бекче», винаоссы — «Яратон уй» но «Яратоно нылкышнолэн йӧлыз». Зангарисяськаос лызэктозы сюрес урдсын яке куштэм пиялаос, кылзэс юано починкаослэсь. Елена Орлова, «Иворъёс».

Чеберай викышъяса кошке.

Шуямовъёс пото. Кунулскыса, дыртытэк мыно.

Шуямов. Починка гуртысь Геннадий Стрелковез вань семьяез ӟечкыла 70 арес юбилееныз. Шуд, капчи мылкыд, тазалык, яратон но ог-огдэ валан котьку мед тӥледын луоз, Геннадий Васильевич! Сӥзиськом тӥледлы ваньзэ умойзэ но ыстӥськом пӧсь саламен шулдыр гур!

Вить воргоронъёс (етӥз тэтчаса пото, ӧтемзэс гинэ возьмазы кадь).

Зангари — сюрес дурын,

Италмас нош — возь вылын,

Герберсяська — бамалын,

Ашальчи — вож нюлэскын.

Нылкышно ке — школаын,

Фермаын но почтаын,

Нылкышно — магазинын,

Бакчаын но гур азьын.

Лай-ла-ла-ла-лай-ла-ла,

Ла-ла-ла-ла-лай-ла-ла…

Кык кенакъёс воргоронъёс доры матэкто но соосын бурдъяськыса ик экто. Редактор кияз подносэн сылэ. Тодосчи матэктэ но, перепечез кияз кутыса, кема эскере, югыт азе карыса, каллен чигтэ но учке: ӧвӧл-а пушказ алмазэз. Тазэ берен понэ но мукетсэ эскере. Эктӥсь воргоронъёс но Кенакъёс бергаса кошко, Депутат шоры ӝимо но сое эктыны ӧтё, соиз пирсэкъяса палэнске.

Депутат. Гажано люкаськем калыкъёс! Иворен дыртӥсько, шумпотыны зэмзэ бадӟым мугмы вань. Кытын журналистъёс? Ивортӥсько! Таяз аре ми синпелет пуктыны чакласьком, проектэз дась ини, туж синмаськымон, рос-прос кузьым луоз асьме калыкмылы, асьме адямиослы, таяз арын чакласьком, ёрослы бадӟым кузьым, землякъёсмылы… Да что такое! Эктэмысь дугдозы-а татын куке?

Та кылъёс бере крезьгур шуак дугдэ, адямиос паймыса эктэмысь дугдо. Пауза. Кӧня ке дыр ортчыса, куинь эктӥсь нылъёс эктыса ортчо. Бӧрсязы Чеберай потэ но, буш сценалы шумпотыса, «Яратоно Починкае» гурзэ мытэ.

Чеберай.

Яратоно Починкае,

Яратоно возьёсы…

Депутат. Да что такое? Татын кырӟамысь дугдозы-а куке?

Чеберай зар-зар бӧрдыса кошке.

Кылбурчи (синзэ кыньыса, азьпала потэ). Пы!  Мы… Шы… ӝ… ӟ… ӝ…

Депутат. Да что такое?! Татын эшшо кылбур лыдӟо на?

Редакторлэн киысьтыз перепечъёсын дуско усе. Депутат пирсэкъяса катанчи сьӧры кошке. Редактор дыртыса мынэ Кылбурчи пала.

Редактор. Гениально! Гениально. Тани мар уг тырмы вал. Кызьы тӥляд нимды? Я, кулэ ӧвӧл. Вералэ на! Пы… Мы… Шы… Вералэ на шара! Я, кулэ ӧвӧл. Гениально. Ойдолэ. Печатлано тае. Тани мар уг тырмы! Гениально!

Редактор Кылбурчиез кунултэ но сценалэн мышказ нуэ. Катанчи сьӧрысь бызьыса пото школьникъёс но «гениально» шуыса кесяськыса мукет катанчи сьӧры кошко. Огез школьник берытске, огзэ перепечез капыртэ но эшъёссэ сутэ.

Школьник. Капец, хавчик! Кубистаен… Норм, халява! Эй, пацаны, фиг ли уд возьмаське?! Эй!

Йӧно кышно потэ. Пазьгиськем перепечъёсты адӟе но, «нокыӵе порядок ӧвӧл та кунын» шуыса, перепечъёсты дуско вылэ тырыны кутске. Палэнын сылӥсь Тодосчи солы юрттыны дыртэ. Синъёсынызы пумисько. Долкало, интыязы кынмо. Фонограмма кылӥське. Йӧно кышно но Тодосчи каллен султо, киынызы кутӥсько но эктыны кутско. Синмаськыса учко ог-огзы шоры но котырысьтызы номыре уг адӟо ни.

Пото куинь эктӥсь нылъёс, котыразы бергало. Эктыса вить воргоронъёс пӧлысь кыкез пото, соос Кенакъёсын экто, куинетӥез эктыны огзэ нылашез ӧте, ньылетӥез — мукетсэ нылашез. Арганчи арганзэ ӟыгыръя, собере куинетӥ нылашен эктэ. Шуямов Шуямоваез эктыны ӧте. Редактор эктэ Кылбурчиен сценалэн мышказ. Сцена дуре пото Чеберай, Депутат но Эстрада кизили. Депутат уг вала, кинэ ӧтьыны. Вамыштэ Чеберай пала, но соиз, уг экты шуыса, нырзэ чатыртыса, сылэ. Соку Депутат вамыштэ Эстрада кизили пала, соиз шумпотыса валтэ Депутатэз адямиос пӧлы берганы. Кырӟан быре. Эктӥсьёс сцена кузя пазьгисько но шуак дугдо. Ваньзы черектӥсько. Шоразы ик Эстрада кизили, париктэк — адске, со воргорон шуыса. Ваньзы паймыса долкамын. куинь эктӥсь нылъёс гинэ, нош ик огазеяськыса, пыдъёссэс урдылыса, эктыны кутско. Депутат, вожез потыса, соосыз висъя но огзэ ӵыжем кадь каре. Нылъёс пӧртэм пала бергало но нош ик огазе вуо.

Депутат. Экто на татын!

Йӧно кышно (сайкаса кадь). Шуисько ук, ӧвӧл ке ӧвӧл адямилэн культура валанэз. Кыӵе на татын уровень! Тили-тили, трали-вали. Мар веранэз, та кунын ноку порядок уз луы.

Каблукеныз йыггетыса, кошке.

Тодосчи. Удмурт адямилы кулэ вӧсь. Вӧсь — со адямилэн мумыкорез, сямзэ возись сюрлы. Адямилэн луыны кулэ чылкытэз, чеберез валанэз. Сотэк со адями ӧвӧл ини — огшоры сиись-юись, пудо.

Марья (Тодосчилы шӧдтэк шорысь). А мон тодӥсько ук, марлы тӥ перепечме ӧд веръялэ. Юрдӥды. Тьфу, городъёс!

Дарья. А мынэсьтымзэ сииз! Адӟи мон. Сӥльын перепечме лушкемак пенжак кисыяз понӥз.

Марья. Тынадэз зарниен вӧямын, дыр!

Дарья. Зарниен но, азвесен но!

Шуямов. Тырмоз! Тяфыръёс! Кыӵе жади мон ваньдылэсь! Огез кырња, мукетыз эктэ, куинетӥез пӧраське. Ньылетӥез курла. Витетӥез ваньмыныз таин ӟечкыла но передача пыр салам вераны косэ! Тьфу! Эшшо ик маин ӟечкыла? Тани таин?

Шуямов перепечъёс доры мынэ но кыксэ ик перепечез веръяны дасяське. Пауза. Ваньзы сак учко, мар али луоз.

Шуямов. Сӥльын, Дарьяпайлэн.

Дарья. Куно луэ, сие, ойдо, сие! До-то-во ческыт! Ачим пӧрай но, сии но, ачим ик витьсэ ик сии, дотово ческыт!

Шуямова. Цыц.

Шуямов сие.

Шуямов (вис карыса). Фу!

Дарья ма вераны ик уг тоды, калык абдрамын.

Депутат. Да что такое! Татын перепеч но пӧраны уг ни быгато?!

Шуямов. Шыпыт! Марьяпайлэн перепечез.

Марья. Кӧня ке пӧрась-кемъяськи вал. Кубистаен ке но, сюдом ни-а, мар-а, сокем уд курлалэ, дыр, пӧрам вылысь. Сием потыку, ческыт кошке ни со.

Шуямова Марья шоры урод учке, соиз амалтэк ымзэ ворса. Ваньзы вырӟылытэк витё, Шуямов куша. Шуак Шуямов усе, шокатэк кылле. Юр-яр потэ. Бызьыса вуо Журналистка, Йӧно кышно, школьникъёс. Шуямов шуак сайка, серекъя.

Шуямов. Тӥ понна туннэ тыршиз Валентин Шуямов. Дыртӥсько берпуметӥ пӧсь саламъёсмес лыдӟыны. Гажано удмуртъёс! Ӟечкыласьком тӥледыз дунне вылысь тужгес но ческыт перепечен, всё! Сӥзиськом шулдыр кырӟан.

Чузъяське «Яратоно Починкае» фонограмма. вить воргоронъёс кенакъёсын эктыны кутско. Ваньзы экто.

Катанчи.

 

Удмурт Дунне
By Удмурт Дунне Ноябрь 26, 2015 13:34
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<