Сюлэм но вирсэр висёнъёсты йӧнатонъя центрлэн ужамез сярысь

Удмурт Дунне
By Удмурт Дунне 16 ноября, 2015 10:19
0102265,медицина,больница,сосудистый центр,реанимация

Арлы быдэ та центр 6-7 сюрс адямилэсь улонзэ уте.

Вить ар талэсь азьло шаерамы усьтӥськиз сюлэм но вирсэр висёнъёсты йӧнатонъя центр. Туннэ солэн ёзъёсыз кылдэмын Сарапул, Глазов, Вотка городъёсын. Матысь дыре усьтӥськозы Можга но Эгра ёросъёсын.                                                                                                                                     

Нырысетӥ элькун больницалэн валтӥсь врачезлэн воштӥсез Татьяна Шевчук ивортэмъя, центрез усьтонлы кошкиз ог 200 миллион манет. Туннэ эмъясьёс но, калык но валазы ни: коньдон юнме быдтэмын ӧй вал — арлы быдэ центр 6-7 сюрс адямилэсь улонзэ уте. Туэ висисьёслэн лыдзы 5 процентлы йылэмын.

— Ог 10 ар талэсь азьло инсульт арлыдоостыгес шуккылӥз, — вера Тазалыкез утёнъя министерствоысь валтӥсь невролог, сэр висёнъёсты эмъянъя центрлэн кивалтӥсез Наталья Комиссарова. — Туннэ, егитъёс сяна, нылпиос но курадӟыны шӧтазы. Висён адями борды шуак кырмиське. Соин солэсь 3 тодметсэ котьку йырын возёно: пери шуккыку, адями вераськыны, ветлыны шугъяське, ымнырыз кырыжтӥське.

Эмъясьёс валэкто: инсульт дыръя ӝог юрттэт сётӥсьёслы ӝегатскытэк жингыртоно. Угось соку йырвиымысь 1 минут куспын 1 миллион лулпырыос быро. Соосты нокыӵе эмъюмъёсын, суретъёсын улӟытыны уг луы ни. Асьме йӧнатӥськон технологиосмы Европаын кадь ке но.

— Пери шуккем муртэ 4 час куспын больницае уг вутто ке, со яке улонысь кошке, яке тазалыксэ ыштэ, — валэктэ Наталья Валерьевна. — Соин та дырез ми зарни шуиськомы. Геморрагической инсульт дыръя йырвиыме вир кисьтӥське. Адямиез улэп кельтон понна секыт операциез быдэстоно луэ — туэ ог 30 муртлы лэсьтӥмы.  Ишемической инсульт шаерамы 4 поллы ӵемгес пумиськылэ — йырвиымлэн кыӵе ке люкетаз вир ветлэмысь дугдэ. Жаляса верано, зарни часъёсы эмъясь доры вуэ шуге-леке шедемъёс пӧлысь 18 процентэз гинэ.

Висёнлэсь утиськыны луэ, шуо эмъясьёс. Сиёно сад-бакчаын будэтэм емыш, йӧл, кузятэм, чорыг. Нуналаз одно ик 30 минут ке но поръяно. 45 арессэс ортчемъёслы ӵем эскероно вирысьтызы сакырзэ но холестеринзэ.

— Кысконлэсь куш-тӥськоно, — шуэ валтӥсь невролог Н. Комиссарова. — Угось пурккетӥсьёс дорамы 4-5 поллы ӵемгес вазиськыло. Урод сямез вормем бере мугорысь вань кырсьсэ поттон понна 5 ар кулэ.

Ольга КОРЕПАНОВА

Туспуктӥз А. Горбунов

Удмурт Дунне
By Удмурт Дунне 16 ноября, 2015 10:19
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<