Сириен ӵогъялтон, «Лада Вестаез» вузан но бусы утялтон машина басьтон

Related Articles

• Куреггуртын ветеранъёс люкаськылӥзы 0 04.Фев
• Глазовысь «Иднакар» музейын усьтӥськиз «Иднакарлэн чеберез» адӟытон. 0 29.Сен
• Чайковскиез шудӥз Чайковский 0 01.Апр

Дуннеын

Тыбыре ӵогъялтон

Сирия вадьсын пуштытэмын Россилэн террористъёслы пумит ожмаськись Су-24 ожгар самолётэз. Сое пазьгиз Турцилэн истребителез.

Асьме истребитель берытске вылэм ни Сириысь авиабазае. Самолётсы инмысен пуштэм бере 2-ез ик лётчикъёс парашютэн тэтчыны вуттӥллям. Но музъем вылэ вуыны кыкназылы ӧз кылды — одӥгез быриз.

Та учырез эскерон азинтӥське. Россилэн Президентэз Владимир Путин Турцилэсь озьы выремзэ «тыбыре  ӵогъялтонэн» лыдъя, угось та кун та дырозь вералляз ИГИЛ-лы пумит ожмаськемзэ, нош уж вылын мукет пӧрмиз…

Россиын

Вузаське «Лада Веста»

Кунысьтымы 25 городъёсын вузаны кутскизы Ижысь автозаводын бичам «Лада Веста» машинаосты.

Та машинаез поттонъя конвейер усьтӥськиз туэ 25-тӥ сентябре. Ар пумозь поттыны чакламын 5 сюрс пала автомобиль. Вуз каронъя центръёсы туннэ нуналлы келямын ни 1 сюрсэз.

Автопромез чакласьёс пусъё: калык шумпотыса басьтоз «Лада Вестаез». Пушкыз но вылыз туала, кышкытлыклэсь зол утемын, дуныз, кунгожсьӧр машинаосын ӵошатыса, сокем бадњым ӧвӧл — 500 сюрс манет пала. «Лада Веста» сю иськемлы быдтэ 7,5 литр эстӥськон, час куспын ортчыны быгатэ 178 иськемез. Ижын та машинаез нырысь ик басьтӥз Сарапулысь нылкышно.

Удмуртиын

Дун капчиялоз

Удмуртилэн Тӧроез А. Соловьёв огкыл юнматӥз «Брянск-сельмаш» заводлэн кивалтӥсеныз В. Сулеевен.

Озьы вуоно арын элькунысьтымы гурт хозяйствоос 15 процентлы капчиятэм дунын басьтыны быгатозы та предприятиын поттэм ю тысь утялтон, пудо сиён дасян техникаез, озьы ик пӧртэм агрегатъёсты. Тӧро ивортэмъя, туннэ нуналлы бадӟым эштосъёслэн но фермер хозяйствоослэн ваньбуразы лыдъяське 6 сюрс 235 трактор, ю-нянь утялтонъя 1 сюрс пала, пудо сиён дасянъя 598 техника. Таос пӧлысь 70-80 процентэз вужмемын ни.

Дасяз Елена Никитина