Шырбыжен шыд — искусство! Коми-пермяк ужбергатӥсьёс ӧрзэс шедьтӥзы

Удмурт Дунне
By Удмурт Дунне 12 ноября, 2015 14:30
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

даралиТуала амалэн ужано ке, калык культура удысын коньдон поттыны луэ. Та малпанэн Коми-Пермяк округысь Кудымкарын октябрь пумын радъяськиз нырысетӥ  форум.

Перм эшъяськон

Ас вакытаз Россиысь Фин-угор калыкъёслэн ассоциациысьтызы Олег Моторин  ачиз кадь ик калык культураен висись адямиосты люкалляз Москвае. Пӧламы вал Сыктывкарысь Светлана Турова («Югыд-арт» киуж), Кудымкарысь Наталья Отинова («Горт» студия), Москваысь Ежевика Спиркина («Ойме» группа) но мукетъёсыз. Ваньмы сямен ик туала калык дӥсь вуронэн но керттӥськонэн коньдон поттӥськом, ваньмы ик перм калыкъёсысь луиськом. Москваысен ик милемыз синйылтӥзы коми-пермякъёс, доразы этнокультурной центразы куное ӧтем гинэ ӧвӧл — форум радъязы. Кудымкаре мон ветлӥ «Даралилавка» проектэным.

коми-пермяк дӥсь вуронъя «Горт» студиысь Вера Мехоношина етӥнлэсь кималиё дэремъёс кылдытъя, вашкала сямен куиське. Наташа Отинова — дизайнер, футболкаосы но толстовкаосы коми-пермяк пужыосты печатла, тодмо луизы ни гондырен, балянэн, уйсыен суредъёсыз. Кудымкарын та нылашъёс шоры синмаськыса учко. Дэремъёссы но футболкаоссы умой кошко Москвае, Екатеринбурге, Тюмене, Эстоние но Финляндие. Нырысь дӥсьсы чакламын вал фин-угор калыкъёслы, но сое ӟучъёс но кулэ каризы.

 Оскымон пус утчан

Светлана Турова коми пужыосын дӥсь но шудонъёс керттэ ини 10 арлэсь кема. Пичи мастерскойысен йыгмыт бизнесозь картэныз џош сюрес лёгиз. Шорт ваё Белоруссиысь но Россиысь фабрикаосысь, вуоно арын асьсэос ыж гон черсыны медо. Керттӥсько киын но, машинаен но. Машинаен керттӥськон бадӟым заказъёсын ужаны луонлык сётэ. Кертто коми калык пужыосын дэремъёс, пичи кузьымъёс, озьы ик корпоративной пусъёсын, гожтэмъёсын дӥсь но мукетсэ. Берпуметӥез трос гинэ барыш вае. Коми пужы усто кошке узыр уйпал улосъёсы: отысь ужбергатӥсьёс шумпотыса кузьмало эшъёссылы пужейёсын шарфъёс но керттэм гондырпиос. Огеныз Россиысь дано боксёр Н. Валуев но дораз бертӥз ни.

Светлана Турова пусъе: ужед мед мыноз шуыса, оскыны кулэ матысь адямиосыдлы, соослэн юрттэтсытэк секыт луоз. Туровалэн лемлет малпанэз — Сыктывкар вӧзысь пичи гуртын киужъёсъя азбар усьтыны.

Туала вакытэ куд-ог вузъёс но услугаос пӧрмо аспӧртэм брендъёслы — оскымон луэмез возьматӥсь пуслы, тодметлы. Басма басьтыны мынӥськом, кылсярысь, «Любава» магазинэ, нош преник басьтыны  — «Миланае». Матронлэн пужъятэм айшетъёсыз — бренд, нош Пеклалэн — ӧвӧлгес, малы ке шуоно сӥньысэз кизер. Нимысьтыз агентствоос та учыре быгатысалзы Пеклалы бренд малпаны, солэсь киужзэ тодмо нимыз пыр вузаны. Соку кылдысал «Пекла айшет» вуз карон марка, котькуд айшет борды вуремын луысал логотип, со логотип тодэ вайытысал слоганэз: «Пеклалэн айшетэз буйгатэ сюлэмез!»

up3l2yrqtf8

Коми-пермякъёс дышизы аспӧртэм шудонъёс лэсьтыны.

Кожаськоды, удмуртъёслэн ӧжыт тодмо брендъёссы? «Мынам Удмуртие. Ми тӥледын артэ». «Юмшан57. Удмуртлык сярысь ӟуч сямен». «Эктоника. Каммон, эшъёс!»

Ӵапак «Эктоника» сярысь мон мади Кудымкарын этно-форумын. Крезьгуро бренд котькуд толэзе Ижысь клубын ог 500 адямиез люка. Адямиос, «Эктоника» нимез кылыса, лыкто. Озьыен, туала вакытэ ним вузаське. Зэм, вашкала дыръя но нимлэн даныз вал. Озьы ке но туэ нимез буш интыын кылдытыны капчигес, калыклэсь мылкыдзэ чакласа, чилясь бумагае бинялтэм вуз дэмланы. Мукетъёсыз синмаськымон «вузъёс»: Inwis kinopottonni но Петыр Палган, Polina Kubista но Татьяна Москвина. Калык культураез туала амалъёсъя выль инвисъёс сьӧры поттыны луэ, со тунсыко удмурт но, ӟуч но басьяськись понна.

Удмуртъёслэн но комиослэн ужамзы син шорын. Этно зэмзэ быгатэ улослэсь экономиказэ выль сямен ужатыны, азинтӥськон понна выль амал луыны. Мукет ласянь,  ужбергатонэ пыӵан калык культуралы шокчыны выль омыр луэ.

 Сиёнлэн шоркарыз — Кудымкар

Вератэк кельтыны уг быгатӥськы коми-пермякъёслэн куноятэмзы сярысь. Форум дыръя милемлы чечымъёс дэмлаллязы: сардаен (сныть) пыжиськем, ческыт салат, емыш ву (морс). Ӝыт этноцентрысь усточи Андрей Дерябин «Пермяк» кафее вайиз, татын мон гуртын пӧзьтэм сурзэс веръяй но турын-куаръёслэсь пельнянь сии, шырбыжен (хвощ) шыдэн гусъяськи. Ӵуказеяз мукет кафее вуылӥм — олокыӵе но сӥльёслы паймим. Вань та интыос одӥг муртлэн тыршемезъя кылдӥзы: сиён-юон удысэз Кудымкарын возе Алексей Петров. Одӥг гинэ адями быгатӥз коми-пермяк сиёнэз ресторан дуннее пыртыны. 2007-тӥ арын Петровлэн поваръёсыз вормизы бадӟым евроазиатской ӵошатсконын. Отчы дасяськыкузы, Петров чурыт вераз: «Нокыӵе итальян сиён ум пӧзьтэ — коми шыдэн мыном!» Со дырысен пермякъёс арысь аре паймыто дуннеез калык сиёнэнызы. Нюрмульыен пирожкиос но сардаен пыжосъёс монэ пыраклы синмаськытӥзы. Озьыен, коми-пермякъёс быгато сиёнзэс ческыт пӧраны но, соин уксё но поттыны. Кин шуиз, фин-угор сиён ческыт ӧвӧл? Пӧраськон шоры искусство шоры кадь учкыны гинэ быгатоно но сое азинтоно.

 Дарали Лели

Удмурт Дунне
By Удмурт Дунне 12 ноября, 2015 14:30
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<