Шӧмаськод — машинадэ ыштод

Удмурт Дунне
By Удмурт Дунне 10 ноября, 2015 09:40
081283,эвакуатор,спецтехника,автомобиль

Юыса ворттылӥсьёслэсь транспортсэс али кузёезлы берыкто.

Руль сьӧры шӧмаськыса пуксемъёслэсь машиназэс таланы быгатозы. Сое вузаса поттэм коньдон кошкоз улос бюджетэ.

Таӵе ӵектонэн потӥзы Кун Кенешысь депутатъёс Кун Думае, туэ октябре Москваын Удмуртилэн нуналъёсыз ортчыку. Национальной политикая, кышкытлыклэсь утиськонъя, регламентъя но Кун Кенешлэсь ужзэ радъянъя ялан ужась комиссилэн кивалтӥсез Э. Касимов верамъя, та ӵектон юнме шорысь ӧз кылды: руль сьӧры кудӟыса пуксисьёслэн лыдзы уг кулэсмы.

Бен, туэ июльысен гинэ Уголовной кодексэ выль воштонъёс пыртэмын, табере таӵеослы 300 сюрс манетозь штраф тупатыны, 2 арлы эриксэс таланы луэ. Но та но, шӧдске, троссэ уг дугдыты. Сюресъёс вылын кышкытлыклэсь утиськонъя кун инспекцилэн кивалтӥсезлэсь ужзэ быдэсъясь А. Липин верамъя, июльысен гинэ элькунысьтымы 90 мурт кыл кутон улэ кыскемын ни руль сьӧры 2-тӥ ползэ шӧмаськыса пуксемез понна. Соос пӧлысь одӥгез 1 арлы но 2 толэзьлы пытсэт сьӧры келямын. Эшшо 16-сэ суд кужмысь ужатоно кариськиз.

Юыса ворттылӥсьёслэсь транспортсэс али кузёезлы берыкто. Но ГИБДД-ын ужасьёс, депутатъёс тае шонерен уг лыдъяло. Автомобилез соослы ӧвӧл ни сётоно, пе, машиназэс талано доверенностен ворттылӥсьёслэсь но. Эшшо кыл кутон улэ кысконо юэм водителен  артэ пуксисьёсты. Янгыше уськытоно кудӟыса руль сьӧры пуксемъёсты адӟисьёсты но, та сярысь инспекторъёслы ќз ивортэ ке.

 Элина Кумачёва

 

Удмурт Дунне
By Удмурт Дунне 10 ноября, 2015 09:40