Шаркан ёросын дышетӥсьёсты Г. Верещагин нимо премиен пусъё

Удмурт Дунне
By Удмурт Дунне Ноябрь 11, 2015 08:46
DSC_7586

Шаркан ёросысь А. Лебедева пусъемын Г. Верещагин нимо премиен.

Вить ар талэсь азьвыл «Удмурт Кенеш» огазеяськонлэн Шаркан ёросысь ёзэз ёрос администрация азе ӵектонэн потӥз: удмуртлыкез ӝутонэ мылысь-кыдысь пыриськись муртъёсты Григорий Верещагин нимо премиен пусъёно.

Учёноез, этнографез, югдытӥсез вордӥськем нуналэз котырын озьы сӥлы каронэз администрация умоен лыдъяз. Дунъямъёс пӧлын Ляльшур школаысь дышетӥсьын ужам Евгения Куклина, Сосновка гуртысь культурая юртын ужам Анатолий Шкляев, Быги гурт поселениен кивалтӥсь Нина Беляева, Шарканысь нылпи творчествоя юртлэн кивалтӥсезлэн воштӥсез Светлана Перевозчикова. Туэ премиен пусъемын Шаркан школаысь удмурт кылъя но литературая дышетћсь Алевтина Лебедева.

Алевтина Яковлевна визьнодан удысын 30 арлэсь ятыр тырше ни, мыло-кыдо пыриське общественной уже.

— Туала арын удмуртлыкез ӝутыны капчигес луиз, — шуэ Алевтина Яковлевна. — Шаркан школаын 1 сюрслэсь трос пиналъёс дышетско. Уноез соос пӧлысь ӟучомемын. Соин ик нимысьтыз удмурт класс усьтэммы но уг луы. Но котькуд классын 4-5 нылпи удмурт бере, таослэсь адӟем карыса, ӟучъёслэн но удмурт кылэз дышетыны мылкыдзы сайка. Ачим но гочатыны вырисько: анай кылмес тодӥсьёслы Венгрие, Эстоние, Финляндие вож сюрес усьтӥське, шуисько. Пичиосынызгес пӧртэм шудонъёс пыр удмурт кылэз дышетӥськомы. Зэм, удмурт кыл нылпи садысен ик программае пыртэмын луысал ке, югдур воксё мукет луысал. Куд-огез, воксё номыр валатэк, вуо ук, шонертэм вераськемзылэсь кепырало но чалмыт пуко. Нош котькудаз сямен садын воспитательёс удмуртэсь. Одӥг ке но удмурт группа усьтыны луысал ке, дышетӥсьёслы но азьланяз каньылгес луысал. Али, программаез нуэм сяна, кылысь кылэ берыктонэн выроно луэ. Соин ик али садын ужан амалэз воштон бордын ужасько.

Шаркан школаын огвакытэ удмурт кылъя кабинет гинэ но ӧй вал. Но директорзы валаз кулэлыксэ. Татын нылпиос воксё мукет дуннее вуо. Сям-йылолъёслы сӥзем сэрегез вань. Удмурт дэремен кыӵе но мунё ӧвӧл татын! Нылпиос асьсэос ик утись мунё но лэсьтыны дышетско. Удмурт ужрадъёсы но пырисько. Али Алевтина Лебедева 11-тӥ классысь Ирина Гуменникова дышетскисеныз ӵош Казаньын ортчем научно-практической конференцие пыриськизы, отын пужъятэм удмурт ӵушкон сярысь мадизы но лауреат луизы. Табере дышетэм нылпиосме Москваозь вуттэме потэ, шуэ Алевтина Лебедева.

— Берло дыре зол шӧдӥське ёросысь калыклэн удмуртлык пала берыктӥськемез, — вера «Удмурт Кенешлэн» ёросысь ёзэныз кивалтӥсь Елена Перевозчикова. — Адямиос, гурт поселениослэн кивалтӥсьёссы гинэ но дорам лыкто, юрттэт куро, ми общественной огазеяськон ке но. Оско, лэся. Ким гуртын пуктэмын татын вордӥськем писательлы Степан Широбоковлы синпелет. Сое котыртэм кенер куашканы кутскем. Гурт поселениен кивалтӥсь вазиськиз, тупатыны мед юрттомы шуыса. Спонсоръёс утчаса, кенерзэс выльдыны коньдон шедиз, туэ синпелет котыр чеберскиз. Вазиськизы музейын ужасьёс: композиторлы Григорий Титовлы вордскем Титово гуртысьтыз культурая юрт борды, пе, мемориал пул шукконо. Аслаз крезьгурчилэн улэм юртэз кылемын ӧвӧл ни уго. Вуоно тулыс буре ваён пулэз шуккыны чакласькомы. Администрация но юртто шуэ, асьмеос но пӧртэм ӵошатсконъёсы пыриськиськомы, коньдон поттӥськомы. Озьы удмурт калык огазеяськонлэн кужымез будэ шуыса, адӟиське. Али ёрос администрациын но котькуд кабинетэ пыр — удмурт сямен ваземез кылод. Ваньмаз 18 школаосын но, анай кыл кулэ шуыса, валаны ӧдъязы. Азьвыл ваньмаз сое уг дышето вал. Али черкогуртамы но анай кыл чузъяське. Со понна туж трос кужымзэ понӥз Алевтина Лебедева.

 Елена Сараматова

 

Удмурт Дунне
By Удмурт Дунне Ноябрь 11, 2015 08:46
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<