Шаерамы ог 103 сюрс анайёс пиналзэс оген будэто. Кызьы таӵе семьяын мемилы визьнодано пизэ?

Удмурт Дунне
By Удмурт Дунне 18 ноября, 2015 08:41
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Удмуртстатлэн лыдъямезъя, шаерамы  ог 103 сюрс анайёс пиналзэс оген будэто. Кызьы таӵе семьяын мемилы визьнодано пизэ? Та пумысен вера Ижысь «Психолог плюс» центрысь специалист Наталья Тугашова.

069303,дети,велосипед,село Мазунино,Сарапульский район

Анайлы дырыз дыръя пизэ бордысьтыз лэзёно.

 Утчано воргорон

— Жаляса верано, оген анайлы туж шуг зэмос воргорон будэтыны. Со понна семьяын одно ик луыны кулэ атай, — вера Наталья Тугашова. — Зэм, югдурез капчиятыны луэ. Но со понна тодын возёно кӧня ке дэмланэз.

Эш будэтыны уг яра. Анай туж умой тодэ, мар кароно нылашъёслы кельшон понна. Таин сэрен пиезлы со дэмла: вераськы нылъёсын урокъёс сярысь, дэремез чебер, шу, солы кельшоз. Эке кылзӥськоно кожа. Со ачиз но валатэк кыле, кызьы классысьтыз нылъёслы эш луэ. Бадӟымгес классъёсы вуыса гинэ, пияш шӧдыны кутске: мукет этеос дыдыосын кусып тупатыны выро, синмасько-серекъяло, нош со нылъёс понна пияш ӧвӧл. Нылашъёс солы вань сюлэм шугъяськонъёссэс кисьто, но со шоры юлтошсы шоры кадь гинэ учко. Таослэн син шоразы со ноку пиосмурт уз луы, огенызы но кусып тупатыны уз пӧрмыты.

Дэмлан. Нылъёсын-пиосын кусыпъёс сярысь пияшлы пиосмурт мед вералоз. Семьяын воргорон ӧвӧл ке но, ӵыжы-выжы воргоронъёс быриллям шат? Пияшлы луонлык сётоно пиосмуртъёсын кенешыны, соослэсь адӟем карыны. Собере, туала арын олокыӵе но кружокъёс но секциос вань, унозэ соосты воргорон дышетӥсьёс но тренеръёс нуо. Кин ке но пи понна авторитет луыны кулэ.

Пинал — карт ӧвӧл. Туж тросэз анайёс 30-35 аресъем пиоссылы шуо: тон аслыд туган шедьты,  кышнояськы ни вал, мон туж сюлмаськисько. Куддыр ватсало: мон соку капчиен кулысал. Пи та берло верамзэ сюлэмаз басьтэ. Со уго кылъёсысьтыз мукет пуштроссэ но кылэ: улонад ваньмыз пӧрмиз ке, мон тыныд кулэ уг луы ни, озьыен, мон кошко, малы люкетом на, нош мон тыныд кулэ ке,  тон уд кышнояськы. Пинал пичи дырысеныз анайлэсь кылзӥськыны дышемын нырысетӥ вамыш лэсьтонъя, нырысетӥ кылъёс веранъя, эмъяськонъя. Соин ик, бадӟым будыса но, анаезлэсь мар вераны турттэмзэ, лушкем малпанъёссэ туж юн шӧдэ, со лушкем пуштросъя ик улыны тырше.

Дэмлан. Анай пизэ ӟеч адями, ӟеч карт луыны будэтэ ке, пиез сыӵе ик луоз.

Оген кыльыны кышкась, пизэ аслыз будэтӥсь меми экезэ бордысьтыз ноку уз лэзьы. Мынам вань ни воргоронэ, шуэ куд-огез. Юрттӥськоз но, визь-кенеш но сётоз, малы мон аслым карт утчалом на? Пиез уго бордысьтыз уз кошкы, анайзэ уз вуза. Нош сыӵе кыл кутонлы пиез дась-а? Пиосмурт сямен дунне шоры учкон, вамышъёсыз но котырысьтыз адямиос понна кыл кутыны быгатон 21 арес котырын сяна уг лыкты. Пичиысен со быдӟа ныпъетэз бордаз ошиды ке, бадӟым будэмез бере но пинал кадь кылёз, кыл кутыны уз быгаты. Сыӵе пиосмурт кышкась луэ. Со котькинлэн улоназ пыриськыны, ваньзэ тодыны выре, кинлы маин юрттоно. Ваньзэ тодыку, кышкан тӧлӟе уго, вормо кадь потэ. Нош ачиз кыл вылын гинэ ваньзэ быгатэ но тодэ.

Собере, анай сюлмаськонъёссэ пиезлы вера, солэсь, мар каромы ай шуыса, юа ке, ас вылысьтыз ныпъетсэ пиез вылэ погыльтэ кадь. Ныпъетлэсь мозмытскиськод ке, кӧня ке дыр ӵоже со сярысь малпаськытэк но луэ ук. Солэн луэ карт но шедьтэмез. Но уг утча. Со шуэ: кызьы мон бызём, мынам пие вань, нош пиелы котырысь воргоронъёс уг кельшо. Отӥяз та югдур эшшо секытгес луэ. Пияш кышнояськытэк кыле. Со уго шуэ: монэн йырин анае ӧз бызьы, кызьы мон сое табере кельтом? Ассэ янгышен шӧдӥсь воргорон нылкышноосын кусып тупатыны шугъяське.

Дэмлан. Таӵе югдур медаз кылды шуыса, анайлы огшоры кылъёсты верано: вань сюлмаськонъёсы — со мынам йыр висёнэ, мон бадӟым ни, нош тон пичи на, мон тодӥсько, мар кароно. Соку ваньмыз интыяз пуксёз, пичи экелэн но ныпъетэз капчиялоз. Умой воргоронэз пумитаса бызьыны луонлык кылдыку, бызёно. «Пиме ӝож кароз, уг бызьы» шуэмды нокинлы но шуд уз вайы.

 Думетысь пуны

Аслэсьтыд интыдэ тодоно. Анай вӧзын будэм пиосмуртлы семья кылдытыны шуг. Со кема бырйиське. Котькуд нылкышноысь со утча анайзэ. Соин но сыӵе пиосмуртъёс туганъёссэс я кышнооссэс ӵемысь вошъяло. Огеныз улонзэ герӟа ке но, ассэ быдэсак шудоен шӧдыны уг пӧрмыты. Сюлэмысьтыз интызэ уго мумиз басьтӥз. Шаермес утьыны присяга сётэм мурт кадь, анаезлы кулытозяз йыбырттоз, со сярысь сюлмаськоз.

Зэм, куддыр анай яке пиез улон интызэс вошто, ог-огзылы эрик сёто кадь. Но вискысьтызы уно иськемъёслэсь пиосмурт, думет йылысь пуны сямен, урмыны кутске. Кинлэсь ке пегӟиськод ке, со тонэ утчаны турттэ ук, возьма, тон сярысь малпа. Мӧзмыса улэмысьтыз, ужамысь но дугдэ, семьязэ но курадӟытэ. Эшшо секытгес югдур, анай кулэ ке.

Дэмлан. Талэсь утиськон понна анай пиезлы пичиысен мед шуоз: мон шумпотӥсько, тон монэ яратӥськод шуыса, но тынад аслад семьяед луыны кулэ, тон со понна улыны кулэ.

 Атай луыны уг быгато. Аслаз нылпиез вордӥськем бере но пиосмурт ӵемысь уг тоды, кызьы соин кусып тупатоно. Югдур уката секыт, семьяын пи будэ ке. Атай шуэ: огкыл ум шедьтӥське, со монэ уг вала, мон уг тодӥськы, кызьы со доры матэктыны. Кызьы тодоз? Со ӧз адӟы атайзэ, ӧз адӟы, кыӵеесь луыны кулэ кусыпъёссы. Таин сэрен нылпиезлэсь палэнскыны кутске. Кышноез кышканы ӧдъя, семьязы тэшка шуыса. Семьяын бугырско керетонъёс. Тужгес секыт йӧтэ та югдурын нылпилы. Юнме уг шуо: нылпи — семьялэн тодметэз. Анай-атай вискын кусыпъёс начаресь ке, пинал урод дышетскыны, ассэ алама возьыны, висьыны ӧдъя. Таӵе югдурын анай-атай керетэмысь дугдо, пиналзы сярысь сюлмаськыса, асьсэзыз вунэто. Пинал тае шӧдэ, со семьяез утисьлы, тэшкам бервылэз лякисьлы пӧрме. Нош пиосмурт пичи дыръяз воргоронъёсын вераськыны дышысал ке, югдур трослы капчигес луысал.

Куд-ог анайёслы уг кельшы, кызьы пизы кышноеныз ассэ возе. Уг ярало кензылэн выросъёсыз но. Анай нокызьы но тэрытӥськыны уг быгаты «пиез — карт» малпанэн.

Дэмлан. Анайлэн яратонэз куддыр — туж секыт ныпъет. Куд-ог мемиос дорам лыкто но шуо: пиелэн улонэз уг пӧрмы, юрттэ, ку сое дорады вайыны яра? Сыӵеослы шуисько: лыктэ, но огнады, пидылэн воштӥськемез потӥз ке, ачиз лыктоз, но али тӥлесьтыд дунне шоры учкондэс берыктоно.

Уг яра пиналэз яратонэн ӝокатыны. Сое бордысь лэзьяно ураме шудыны ке но. Огпол жугиськиз ке но, куалектоно ӧвӧл. Сотэк со пиосмурт уз буды. Воргорон пушкысь нырысь ик гажано воргоронэз.

 Елена Сараматова

 

 

 

 

Удмурт Дунне
By Удмурт Дунне 18 ноября, 2015 08:41