Росздравнадзор элькунысьтымы тазалыкез утён удысэз эскериз

Удмурт Дунне
By Удмурт Дунне 16 ноября, 2015 11:17
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
000894,0019,дети,мать,прогулка,коляска

Туэ, кылем арен ӵошатыса, нуныос тросгес вордскемын ни Грак, Красногорск ёросъёсын, Иж городын. Кулэмъёс ичигес пусъемын Можга, Глазов, Кияса ёросъёсын.

Элькунысьтымы тазалыкез утён удысэз Росздравнадзор вуоно арын эскерыны кулэ вал. Но отысь специалистъёс шаерамы вуылӥзы туэ ик.

 Азинсконъёс вань

Росздравнадзорен эскеронъёс ортчем бере ни журналистъёсын пумиськылӥз тазалыкез утёнъя министр Алексей Чуршин. Веранзэ мытӥз эмъян удыслэн азинсконъёсыз бордысен. Соос ичи вылӥллямтэ.

— Тазалыкез утён удыслы 2015-тӥ арын 22,2 миллиард манет чакламын, — шуиз со. — Пӧлысьтыз 1,6 миллиард манетэз — Россилэн бюджетысьтыз. Берло 3 ар куспын гинэ удыслы коньдон висъян ог 22 процентлы йылӥз.

2025-тӥ арозь элькунысьтымы 262 больницаез выльдыны чакламын, со пӧлысь 208-эз — гуртъёсысь. Матысь аръёсы гуртъёсын озьы ик усьтӥськыны кулэ 80 фельдшер-акушер пунктъёс. Котькудӥз — ог 62-80 квадрат метръем. Пӧлысьтызы одӥгез ужаны кутскиз ни — Ижысь Костина Мельница микрорайонын.

Асьмеос сокем ум ёрмиське специалистъёслы. Котькуд 10 сюрс муртлы 45,2 врач усе. Ӵошатон вылысь: Россиын — 41, Приволжск федерал округын — 39,1.

Элькунамы бадӟым саклык висъяське вылӥ технологиосты кутыса эмъянэз азинтонлы, та вакытэ со 14 удысъя чакламын. 2013-тӥ арын  719 муртлы таӵе юрттэт сётэмын ке вал, туэ 9 толэзь ӵоже — 1 сюрс 593 муртлы.

— Нуныослэн лыдзыя республикамы азьмынӥсьёс радын, — азинтӥз веранзэ министр. — Туэ, кылем арен ӵошатыса, соос тросгес вордскемын ни Грак, Красногорск ёросъёсын, Иж городын. Кулэмъёс ичигес пусъемын Можга, Глазов, Кияса ёросъёсын. Элькунамы, Россиен ӵошатыса, улонысь кошкисьёслэн лыдзы ичигес.

 Тӥяськись тӥрлык

Зэм, мургес учкиськод ке, та чебер лыдпусъёс будыны ӧдъяло. Кылсярысь, кулэмъёслэн лыдзыя Удмуртия мукет улосъёслэсь уг висъяськы ке но, Удмуртстатлэн лыдпусъёсыз син азе мукет суред пуксьыто. 2015-тӥ арын январь-июнь толэзьёс куспын 10 сюрс 41 муртлэн улонэз чигиськемын, кылем арын та вакытэн ӵошатыса, со 445-лы тросгес. Озьыен, кулэмъёслэн лыдзы 4,43 процентлы йылӥз. Ӵапак та ик кельшымтэ, шӧдске, Росздравнадзорлы но.

0101970,больница,медицина,онкологический диспансер,маммограф

элькунамы 3 МРТ, сое уже кутонъя Приволжск федерал округын асьмеос 1-тӥ интыын, 14 томограф — таоссэ ужатонъя 3-тӥ интыын, 24 маммограф, 251 эндоскоп, УЗИ лэсьтонъя 290 аппарат.

Нош тазалыкез утёнъя министрез сокем уг ӝожомыто кадь эскерисьёслэн йылпумъянъёссы. Журналистъёсын пумиськонэ со юромо ваем «Медицинский вестник» журналэз. Отын Росздравнадзорлэн кивалтӥсез Михаил Мурашко улосъёсын тазалыкез утён удыс сярысь интервью сётэ.

— Удмуртиысь министерствоез со одӥг пол но уродэн уг пусйы, — шуиз Алексей Чуршин. — Асьмелы кадь ик предписаниос трос мукет улосъёслы но сётэмын. Озьыен, тазалыкез утён удысын тырмымтэос — быдэс Россилэн сюлмаськонэз.

Бӧрысь но тазалыкез утёнъя министр эшшо кӧня ке пол вераз на: мукет улосъёсын но югдур пӧртэм ӧвӧл. Нош куд-ог учыръёсъя республикамылы вожъяськыны но луоно, пе. Кылсярысь, элькунамы 3 МРТ, сое уже кутонъя Приволжск федерал округын асьмеос 1-тӥ интыын, 14 томограф — таоссэ ужатонъя 3-тӥ интыын, 24 маммограф, 251 эндоскоп, УЗИ лэсьтонъя 290 аппарат.  Араз 5 сюрс 700 пала адямилы дунтэк УЗИ лэсьтӥське. Лыдпусъёс возьмато:  Удмуртиен ӵошатыса, артэ Татарстанын ик эмъян тӥрлыксы ӧжытгес.

Асьмелэн тӥрлыкмы трос ке, иське, малы толэзь но, солэсь но ятыр черод возьмано, кылсярысь, МРТ-е ик. Вирлы анализ сётон понна гинэ но черод кылдэмын ни!

— Тросэз эмъян тӥрлык элькунамы басьтэмын вал 2006-тӥ-2009-тӥ аръёсы, — пусйиз Алексей Чуршин. — Дыр ортчемъя соос ӵемгес сӧриськылыны кутскизы. Нош соосты тупатъянлы трос коньдон кулэ. Соин ик улосысьтымы госгарантияя программае гожтоно луим: обследование ортчыны черод 3 толэзёзь кыстӥськыны быгатоз. Но эскеронъёсты ӝегатскытэк лэсьтоно ке, адямиез черодэ ум султытӥське, обследование соку ик лэсьтӥськом.

Юан кылдэ: асьме улосын гинэ шат эмъян тӥрлык сокем ӝог сӧриське? Мукет улосъёсын тӥрлыксы «больничнойёсы» уг пота? Элькунысьтымы тазалыкез утёнъя министрлэн талы одӥг валэктонэз: тырмымтэос бордын ужаськом, но ваньзэ соку ик радъяны уг луы.

 20 минут интые — 2 час

Росздравнадзорлэн алонъёсыз пӧлысь одӥгез — Удмуртиын ляб радъямын ӝог юрттэт сётон. Уг тырмо специалистъёс: штатын чаклам интыос 39 процентлы гинэ тырмемын. Ичи автомобильёс: Ижысь 74 машина пӧлысь ог ӝыныез сӧриськемын-вужмемын. Радъямтэ ӝог юрттэт сётӥсьёслэн специализированной бригадаоссы: чиньыен лыдъямон кылемын реанимация лэсьтонъя, нылпи вайись кышномуртъёслы юрттэт сётонъя бригадаос. Нош макем кема возьмано луэ соосты — тазэ ас вылаз шӧдӥз ни, малпасько, пӧлысьтымы котькудӥз. 20 минут интые, ортче час но, кык но…

039299,скорая медицинская помощь,медицина,Яковлев Александр Павлович,врач,Чикуров Леонид Леонидович,фельдшер,МО Сарапульский район

Ӝог юрттэт сётон машинаосты выльдоно шуыса, соглаш кариське ик А. Чуршин.

Тазалыкез утёнъя министрлэн нош ик аслаз веранэз:

— Вань кык валан: ӝог но берлолы кельтыны луонтэм (неотложной) юрттэт. Ӝог юрттэт кулэ луыку, ог 96 процентаз ӧтёнъёсы специалистъёс 20 минут куспын вуо. Нош берлолы кельтыны луонтэм юрттэт сётонъя кабинетъёс усьтэмын котькуд больницаын. Отчыозь адями ачиз мыныны быгатэ.

Бен, ӝог юрттэт сётон машинаосты выльдоно шуыса, соглаш кариське ик А. Чуршин. Элькунамы 200 пала выль машинаос басьтыны кулэ. Та бордын, пе, ужалом.

— Эмъян удысысь матысь дыре нокин мозмытэмын уз луы, — пусйиз тазалыкез утёнъя министр Росздравнадзорлэн эскеронъёсыз ортчем бере. — Куд-ог валтӥсь врачъёслэсь кылзэс юалом ик шараям тырмымтэос понна. Но оглом, малпасько, министерствоын ӟеч команда кылдытэмын.

Чиновниклы юанъёссы кылдо, шӧдске, Кун Кенешысь депутатъёслэн но. Вуоно арлы элькун бюджетэз сессиын эскерыку, чузъяськиз юан: Тазалыкез утёнъя министерстволы коньдон ӧжыт ум висъяське, но солы ялан малы ке уг тырмы — эскероно, кытчы уксёзэс каро. Ӵектонъёс вал: та толэзе ортчоно сессиын парламент часэз сӥзёно республикаысьтымы тазалыкез утён удыслы. Но та ужпумез берлолы кельтыны куриз Кун Кенешысь Тазалыкез утёнъя, демографияя но семья ужпумъёсъя ялан ужась комиссилэн кивалтӥсез Светлана Кривилёва, со шуиз: матысь 3 арня ӵоже Россиын тазалыкез утён пумысен кенешонъёс ортчозы Москваын, собере та ужпумез асьме дорын но эскерыны луоз ни.

Элина Кумачёва

 

 

 

 

 

 

 

 

Удмурт Дунне
By Удмурт Дунне 16 ноября, 2015 11:17