Пукон ӝыт, гуртовидение но нюлэс коран

Удмурт Дунне
By Удмурт Дунне Ноябрь 24, 2015 11:53
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Яр

Сазь десант

Биграгуртысь школае вуылӥз Глазовысь «Атлантида» волонтёр отряд.

Бадӟым ужрад «Сазь десант» нимаськиз, нош ортчиз со «Сазь Россия гинэ кужмо луоз» ӧтён улсын. Таӵе пумиськонэз ортчытон сярысь сюлмаськиз Яр ёросысь нылкышноослэн огазеяськонзы. Биграгуртысь школаын дышетскисьёс та ужрадэ анай-атайёссэс но ӧтизы. Люкаськемъёс азьын вераськиз волонтёр отрядэн кивалтӥсь Владимир Макаров, со пыр-поч мадиз кудӟытӥсь юонлэн но тамак ӵынлэн изъян ваемзы сярысь, нош бӧрысь волонтёръёс шудон ортчытӥзы. Вормисе потэм командаос ческыт кузьымъёсын пусъемын.

Эгра

Тхэквондо азинске

Арлы быдэ Эгра каргуртын ортче тхэквондоя ӵошатскон.

Та ужрад сӥземын ас пал эшсэс, милициысь полковникез Николай Перевощиковез буре ваёнлы. Ӵошатсконэ пыриськизы 5-17 арес пиналъёс, Эгра ёросысь сяна, кужымзэс эскерыны вуылӥзы Ижысь но Кезысь спортсменъёс. Вормисе потӥз Эграысь огазеям команда. Пусйыны кулэ, Эгра ёросысь пиналъёс тхэквондоен выро огдыре 4 интыын. Дэмен ужамзылэн емышез шӧдӥське вормонъёссы вылын.

Кез

«Гуртовидение»

Удмурт культурая центрын «Гуртовидение» ужрад ортчиз.

Кез ёросысь удмурт культурая центр Кузямувыр черкогуртэ интыяськемын. Арлы быдэ отчы люкаськыло ёросысь егит кырӟасьёс, туэ та ужрадэз паськытатыны малпазы. Отчы пыриськизы вань мылкыд карисьёс: нимаз кырӟасьёс но коллективъёс. Культура удысын ужасьёс сяна, сое радъяны юрттӥз «Удмурт Кенеш» огазеяськонлэн ёросысь ёзэз. Ужрад сӥземын вал Удмурт Элькунлэн кунлык басьтэмез дырысен 95 ар тырмонлы. Вормисьёсты шараязы нимаз номинациосын. Нылпиос пӧлын вормись луиз Кузямувыр школаысь Лиза Никитина, нимаз кырӟасьёс пӧлын — Кузямувыр черкогуртысь Ольга Васильева, серемес учыр вераны быгатэменыз паймытӥз Кезысь Екатерина Ардашева, ансамбльёс пӧлын висъяськиз Кезысь «Переливы».

Камбарка

Бадӟым пукон но пичи шудон

Ниж-Армязь гуртысь «Удмурт корка» центрын пукон ӝыт ортчиз.

Та гуртысь «Сяськобей» ансамбле ветлӥсьёс куноосты удмурт сямъя пумитазы: кырӟаса-вераса, пӧсь перепечен. Пукон ӝытэ ӧтемын вал Камбарка ёросысь культура удысын ужасьёс, гуртъёсысь калык коллективъёсын кивалтӥсьёс. Ваньзы соос ужан амалъёсынызы тодматскизы. Озьы ик вераськизы ёросысь выжы калыкъёслэсь йылол-сямъёссэс утён сярысь, коллективъёс но калык центръёс кылдытыса. Ужрад йылпумъяськиз мастер-классэн, мылкыд карисьёс та нуналэ ыж гонлэсь пичи шудонъёс лэсьтӥзы.

Каракулино

Туберкулёзэз кортнано

Туэ 10 толэзь куспын ёросысь 7 муртлэсь туберкулёз висёнзэ шараязы.

Висёнэз дыраз шараяд ке, йӧнатӥськыны луоно. 30-тӥ октябре Каракулино ёрос больницаын калык пӧлын валэктон уж ортчытӥзы туберкулёзэз эмъянъя элькун больницаын ужасьёс. Ноябрь толэзе соос вуылӥзы на Галаново, Малые Калмаши, Арзамасцево черкогуртъёсын улӥсьёс доры. Туберкулёзэз дыраз шараян вылысь арлы быдэ флюорографиез ортчоно.

Алнаш

 Нюлэс шера

10 толэзь куспын нюлэскын 14 йыртэмась кырмемын.

Ёросын 17,05 кубометр тэль лушкем  корамын, 183 сюрс 294 манет тыр изъян лэсьтыса. Вож будӥсь писпуосыз лушкем корамзы понна 3 мурт вылэ уголовной уж ӝутэмын. Со сяна, ёросын улӥсьёс куасьмем писпуосыз но лушкем кораллям. Нюлэскысь 540 кубометр пу поттэмын, 69 сюрс манет тыр изъян ваемын. Тая 11 йыртэмась кырмемын, со пӧлысь 6-ез, лушкем ужамзэ валаса, ас мылкыд каремезъя коньдон тыриз, нош мукетъёсыз вылэ уголовной уж ӝутэмын.

Кизнер

 Тӧдьы боды

Кизнер ёросын улӥсьёс итӥськизы Россиын ортчись «Тӧдьы боды» ужрад борды.

Таӵе ужрад ортчытӥське ляб адӟись но сукыр муртъёслэсь сюлмаськонъёссэс шараян но соослы юрттон вылысь. Туннэ нуналлы ёросын 136 мурт юрттэтлы кулэяське.

Нош Инвалидъёслэн калыккуспо нуналзылы сӥзьыса, 3-тӥ декабре ёросын ортчоз 15-тӥ параспартакиада. Инвалидъёс спортын быгатонлыкъёссэс возьматозы. Озьы ик вань муниципал кылдытэтъёсын кивалтӥсьёсты куремын инвалидъёслэсь киужъёссэс люканы.

Красногорск

 Огназы кылем юсьёс

Кылем арня шорын Кокман шурысь чорыгасьёс синйылтӥзы 2 юсез.

Пичигес шурын уясь юсьёс адямиосты доразы матэктыны лэзиллям. Паймем воргоронъёс ӝегатскытэк жингыртӥллям Красногорск ёросысь инкуазез утёнъя инспекцие. Угось юсьёс катьтэммемын вылэм ини. Валантэм, малы соос пичи шуре пуксиллям, но кытчы пыриллям эшъёссы. Инспектор Алексей Перминов чорыгасьёсты кӧня ке нунал чакласькыны куриз. Тылобурдоос нокытчы ӧз лобӟе ке, соосты тулысозь шуныт интые пыртоно луоз.

 

 

 

 

Удмурт Дунне
By Удмурт Дунне Ноябрь 24, 2015 11:53
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<