«Пичи чеберайёс но батыръёс» туэ 4-тӥзэ ортчиз

Удмурт Дунне
By Удмурт Дунне 26 ноября, 2015 10:30
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
DSCF4597

Якшур-Бӧдья черкогуртысь Максим Широбоков но Арина Яковлева.

«Удмурт нылкышно кенеш»  но «Удмурт Кенеш» кичӧлтэм улсын Ижысь Эшъяськон юртэ люкаськылӥзы шаерысьтымы нылпи садэ ветлӥсь тэшкылиос «Пичи чеберайёс но батыръёс» 4-тӥ элькун фестивале.

Ужрадэз усьтӥз «Удмурт нылкышно кенеш» огазеяськонлэн тӧроез Надежда Степанова. Со пусйиз:

— «Пичи чеберайёс но батыръёс» фестивальлэн кутсконэз 13 ар талэсь азьвыл вал. Нырысь-валысь отчы пыриськизы Ижкарысь 5 нылпи садъёсысь тэшкылиос. Аръёс ортчыса, фестивале шаерысьтымы котькуд ёросысь но каръёсысь сямен нылпи садэ ветлӥсьёс пыриськыны кутскизы. Туэ 20 ёросъёсысь но 4 городъёсысь покчи чеберайёс но батыръёс нырысь асьсэ дорын вожвылъяськизы. Иже лыктӥзы тужгес но шаплыосыз, йӧноосыз, чупресъёсыз. Нылпиос бадњым сцена вылын но асьсэды артистъёс кадь возьыны быгато ини. Соослэн асьсэос кадесь ик чебересь но яркытэсь дӥськутъёссы.

Нылпиосты, юрттӥсь анай-атайёсты, воспитательёсты, дышетӥсьёсты ӟечкылазы нациосын ужан политикая  министрлэн воштӥсез Людмила Соковикова, Эшъяськон юртэн кивалтӥсь Татьяна Боталова, Ижысь покчиосты школалэсь азьло визьноданъя управленилэн кивалтӥсезлэн воштӥсез Наталья Черенкевич, Дышетонъя но наукая министерствоысь специалист Надежда Ямаева, «Удмурт Кенеш» огазеяськонлэн вице-президентэз Валерий Хохряков.

Собере сцена вылэ фестивальлэн кузёосыз — Серекъярик, Акач-Тукач но Кузьыли — нылпиосты шулдыртыны потӥзы. Мар но уг даурто соос, кыӵе гинэ шудонъёсты но такмакъёсты уг тодо! Та тумошо геройёс ик ёросъёсысь вуэм чеберайёсты но батыръёсты сцена вылэ ӧтьыло. Нылпиос асьсэлэсь быгатонлыксэс возьмато, анай кылын кырӟам-верам сяна, кылбуръёс лыдњо, семьяоссы сярысь мадё (слайд пыр). Тани Якшур-Бӧдья черкогуртысь 5 номеро нылпи садысь Арина Яковлевалы но Максим Широбоковлы быдэн 5 арес гинэ ай. Нош кыӵе соос анай кылын мусо верасько! Таос бӧрсьы пото Пичи Пурга ёросысь Уча черкогуртысь «Кизили» нылпи садысь Артемий Суворов но Пичи Пургаысь «Росинка» садысь Ирина Верёвкина. Учкисьёсты удмурт кылын чебер но вольыт вераськыны быгатэменызы шумпоттӥзы Шаркан но Алнаш ёросъёсысь нылпиос. Та эшъёссылэсь бере уг кылё Вотка карысь пичиос но. Но, жаляса верано, тросэз нылпиос анай кылзэс уг тодо.

Нылпиослы но анай-атайёслы капчи мылкыд сётӥзы Кузебай Герд нимо гимназиысь «Крезь куара» ансамбльын кырӟась нылъёс но пиос. Жингрес куараеныз шумпоттӥз «Камали» студиын кырњась Настя Воронцова. Со ачиз но кӧня ке ар талэсь азьвыл покчи чеберайёсын ӵош сылӥз — вожвылъяськонын нырысетӥ интые потылӥз. Пичиосты бадӟым праздникен њечкыланы лыктӥллям кырзасьёс Алёна Тимерханова но Иван Котельников.

Фестивальын котькудӥзлы чеберайлы но батырлы горд лента керттӥзы но синпель кузьымъёс — шудонъёс — сётӥзы.

— Ӵуказе нуналлы осконмы асьмелэн вань, — вера «Удмурт Кенеш» огазеяськонлэн вице-президентэз Валерий Хохряков. — Пичи нылъёс ӵуказе  калыклэн синчеберез луозы, нош пиосмы асьмемыз утёзы — зэмоя батыръёс сямен. Куд-огез анай-атайёс шуо: малы кулэ удмурт кыл? Кылэз тодэм нокинлы уг люкеты, со  юрттэ гинэ. Учке ай, макем синмаськымонэсь будо нылпиосмы. Соослэсь быгатонлыксэс вылӥ дунъяны луэ ини, чабыса киос ик, ява, жадизы.

 Любовь Тихонова

Туспуктӥз Любовь Тихонова

Удмурт Дунне
By Удмурт Дунне 26 ноября, 2015 10:30