Мурт кие кӧчиз 8 миллион

Удмурт Дунне
By Удмурт Дунне Ноябрь 3, 2015 12:46
12225,мобильный,сотовый телефон

«Мобильной банк» услугалэсь куштӥськоно.

Россилэн пӧртэм сэрегъёсысьтыз йыртэмасьёс Удмуртиын улӥсьёслэсь ог 8 миллион манетсэс лушкаллям. Туннэ та пӧлысь одӥг копейкаез но берыктэмын ӧвӧл.

Югдурез утёнъя министерствоысь ваньбур лушканэн нюръяськонъя ёзлэн кивалтӥсез, полициысь майор Евгений Кайшев паймытӥз лыдпусъёсын. Банк картаосын но телефонъёсын герӟаськем йыружъёс шаерамы 3 поллы йылэмын. Кылем арын 1 сюрс 500 уголовной уж ӝутэмын ке вал, туэ — 3 сюрс 204. Законэз тӥясьёслэн куриказы ӵемгес шедё арлыдоос. Кызьы утиськоно лушкаськисьёслэсь?

  1. «Мобильной банк» услугалэсь куштӥськоно. Вань уголовной ужъёс пӧлысь 395-ез герӟаськемын телефонъёсын. Адямилы вуэ СМС. Отын ӵем дыръя луэ кыӵе ке реклама яке ссылка. Соосты усьтӥськод гинэ — телефонэ каръяське вирус. Озьы йыртэмасьёслы тодмо луо адямилэн банк картаезлэн вань лыдпусъёсыз.
  2. «Мобильной банклэсь» куштӥськемды уг поты? Амал одӥг. Телефонэ пуктоно антивирус. Со СМС-ёсты сӥс пыр поттэ, кулэтэмъёссэ пырыны уг лэзьы.
  3. Йыртэмасьёс «Сбербанкын» ужась кариськыны дышиллям. Калыклы пӧртэм иворъёс ысъяло: «Кредиттэс тыре», «Милям тӥледлы юанъёсмы кылдӥзы» но мукет. Талы осконо ӧвӧл. Банк карталэсь номеръёссэ соослы келяны уг яра. Жингыртыны но — мултэс. Син куспын телефонысь но, картаысь но уксё мурт кие кӧчоз. 1 сюрс 244 муртлэн 8 миллион пала уксёез озьы ышиз ни. Чаклано созэ но — ку вуиз СМС. Соосты ӵем ысъяло бер ӝыт, куке банкъёс уг ужало ни.
  4. Йыртэмасьёс шаплы кариськизы Интернетын но. Социальной сетьёс, вуз каронъя пӧртэм бамъёс пыр калыкез эрекчаны выро. Кылсярысь, «Авито» бамын лушкаськисьёс шуба вузано кариськиллям. Чебер туспуктэм сётӥллям. Дунзэ чутрак кулэстӥллям. Нылмуртъёс талы оско. Шубаез мукетызлы медаз вузалэ шуыса, ӝыны дунзэ йыртэмасьёслы келяло.

Яке законэз тӥясь адями со бамысь ик быръе кыӵе ке ялонэз. Вуз карись муртлы гожтэ: «Вуздэс басьто. Уксё келян понна картадылэсь номерзэ ыстэ». Бӧрысь нош гожтэ: «Уксё келяме уг луы. Картадылэн мыш палысьтыз номерез кулэ на». Озьы ялон сётэм адями валатэк ик кыле — йыртэмасьёс уксёзэ капырто.

  1. Арлыдо ӵыжы-выжыосты ӵемгес эскерылоно. Угось берло 2 толэзь ӵоже йылӥзы телефон пыр алдаськыса вераськисьёс. Россилэн мукет сэрегаз улӥсь йыртэмась жингыртэ мӧйы муртлэн стационар телефоназ. Шуэ: «Анай, мон машинаен шуккиськи. Уксё кулэ вал». Пересь адями паймытске ик: «Куараед бон, пие, мукет кадь но…» Соиз вазе: «Ымдуры пилиськемын. Вераськеме уг луы». Телефонзэ сётэ эшезлы. Соиз ини пересь адямилы пыр-поч валэктэ, кӧня уксё кулэ, кыӵе картае сое ыстоно но мукет.
  2. Кредит картаосын сак выроно. Таосысьтыз но коньдонзэ лушкаськисьёс портыны быгато. Но ӵем дыръя отысь вань уксёез уг басьто. Пичиен-пичиен. Соин куд-огез валатэк но кыле, электрон пуйыэз пась шуыса. Бӧрысь полицие вазисько. Но таослы юрттон капчиен уг сётӥськы. Угось картаысь уксёез зэмзэ но кин быдтӥз — банкын ужасьёсы валэктыны шугъясько. Тая шаерамы 149 уголовной уж ӝутэмын.

Йыртэмасьёс ваньзы уло Удмуртилэн палэназ: Архангельск, Томск, Тюмень, Вологда, Алтай улосъёсын. Пӧлазы трос студентъёс но пытсэт сьӧрын пукисьёс. Огназ адями та ужен уг выры — ӵем дыръя уллёе люкасько.

Туннэ ӟырдыт эскеронъёс мыно Архангельск улосын. Кырмемын лушкаськонэн вырись 3 пиосмуртъёс. Таослэсь полицейскойёс шедьтӥллям телефонлы 8 сюрс пала сим-картаоссэс. Ӵапак отчы люкаське вылэм мурт уксё. Законъя 1 сим-картаен, ас вылад гожтытэк, вераськыны луэ 10 нунал. Соин полицейскойёс йыртэмасьёсты кырмыны кема выризы. Шедизы соос, банкоматысь уксё басьтыкузы. Банкомат, коньдон сётыкуз, азяз сылӥсь адямиез туспуктэ. Соку ик полицейскойёс тодмазы законэз тӥясьёсты.

Ольга Корепанова

Туспуктӥз А. Горбунов

Удмурт Дунне
By Удмурт Дунне Ноябрь 3, 2015 12:46
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<