Лымы усемен ёросъёс ыштонъёсты лыдъяло

Удмурт Дунне
By Удмурт Дунне 2 ноября, 2015 08:36

сараматоваЛымыяны ӧдъяз ни, нош шаерысьтымы 9 ёросын ю-няньзэс утялтыса ӧз быдтэ.

Гурт удысъя но сиён-юонъя министерствоысь будосъёсъя но музъем кусыпъёсъя управлениен кивалтӥсь Николай Широбоков верамъя, 11 сюрс 557 гектар вылысь юос утялтэмын ӧвӧл на. Вань кизем бусыос пӧлысь та 3 процентэз. Лыдпус сокем ик бадӟым но ӧвӧл кадь. Но коньдонэ берыктоно ке, люкаське ик.

— Утялтытэк кылем бусыосысь ог 15 сюрс тонна ю тысь потысалыз. Со ог 150 миллион манет, — шуэ Николай Широбоков. — Берло аръёсы таӵе шуге-леке шаермы ӧз вуылы вал. Мылкыд секыт. Лымы усе бере, урожай басьтонлы оскон ӧвӧл ни. Ю-нянь шундыберган ӧвӧл ук — музэ погра.

Тужгес трос ыштонъёс адӟизы Дэбес, Эгра, Кез, Красногорск но Балезино. Таослэн ог 20 процентэз бусыоссы утялтымтэ. Зэм, комбайнъёссэс туннэ уйпалъёс гараже пыртыны уг дӥсьто на. Куазь чебертӥськоз на, оско. Балезино ёросысь валтӥсь агроном Татьяна Столбова татчыозь -4-5 градусозь кынтэмез возьма вал. Соку бусыосазы пыремзы луысалыз, пе. Комбайнъёс -12 градусозь ужаны быгато уго. Но вань осконзэ шобыртӥз таш-таш усем лымы.

SONY DSC

Вань осконзэ шобыртӥз таш-таш усем лымы.

— Уйин ноль градус возиськиз ик. Пукись вуос кынмизы, нош музъем сыӵе ик кот, — вера Татьяна Аркадьевна. — Комбайнъёсмылэн лудэ пыремзы ӧз луы, куазь кӧня ке дыр ӵоже чебер возиськиз ке но. Табере бусы шоры учкыны ик вӧсь. Лымыен нориськем ю-нянез уд калты ни. Ог 3 сюрс гектарез утялтымтэ. Со вань бусыос пӧлысь 14 процентэз. Уждунэз, бензин быдтэмез, урожаез санэ басьтоно ке, со 60 миллион манет тыр ыштон. Ярам, урожай туэ начар луысалыз ке, лымы улэ ке но кыльысалыз, сокем жаль ӧй потысал. Но туэ урожай но вань! Гурт удысъя но сиён-юонъя министерствоын уйпалъёсты тышкасько: асьтэос, пе, янгышесь, дыраз утялтыны ӧд быгатэ шуыса. Сыӵе дыръя кӧт ӝож луэ. Кызьы ми лымшоръёсын ӵошатскомы? Уйпалан туэ зор-кот нормалэсь 2-3 поллы уногес усиз. Будосъёсмы но бергес кисьмало. Техникамы но лымшоръёслэн сярысь начаргес — хозяйствоосмылэн луонлыксы ӧвӧл ӟеч комбайнъёс но тракторъёс басьтыны. Ёросамы 2-3 арзэ ни кукуруза гинэ но уноез лудэ ик кыле. Шуныт уггес тырмы бере, будэ кема. Нош отӥяз кезьытъёс омырско. Али но 25 процентэз кукурузамы лудын на. Ыштонъёсын ужатозь, сое воксё кизьытэк но луэ, дыр. Но маин пудоез сюдод?

Удмурт Дунне
By Удмурт Дунне 2 ноября, 2015 08:36
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<