Мар висьытэ удмурт газет-журналъёсты?

Удмурт Дунне
By Удмурт Дунне Ноябрь 26, 2015 12:32
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
_DSC0190

«Удмурт дунне» газетлы быдэс даур ни ке но, та выллем ужрад нырысьсэ ортчиз.

«Удмурт дуннелы» 100 ар но удмурт кылын нырысетӥ календарь потэм дырысен 110 ар тырмонлы сӥзьыса, «Россиысь ивор вӧлмытонын национальной прессалэн интыез» конференция ортчиз.

Конференциез радъязы «Удмурт дунне» газет, Печатья но ивор вӧлмытонъя агентство, Удмурт кун университетысь Удмурт кылосбуръя, финно-угроведениея но журналистикая институт. Кызьы пусйиз «Удмурт дунне» газетлэн валтӥсь редакторез Зинаида Рябинина, «Удмурт дунне» газетлы быдэс даур ни ке но, та выллем ужрад нырысьсэ ортчиз. Газет поттон полэсьтӥське трос мукет удысъёсын: кылтодосэн, политикаен но мукет. Оглом вераса, газет лэсьтон со сыӵе ик наука.

— «Удмурт дунне» — Удмуртиысь изданиос пӧлысь тужгес арлыдоез, но со дыре ик тужгес адӟымонэз газет луэ, со ужпумъёсты шараяны уг кышка, — вераз Печатья но ивор вӧлмытонъя агентстволэн кивалтӥсез Алексей Воронцов. — Али газет-журналъёс понна валтӥсь ужпум — тиражзылэсь лыдзэс возён. Секытгес йӧтэ удмурт кылын потӥсь изданиослы. Со капчи уж ӧвӧл, но «Удмурт дунне» та ласянь -туж тырше.

_DSC0228

Конференциын Александр Григорьевич «Удмурт дунне» газетлэн пӧртэм вакытъёсыз сярысь вераз.

Куноос пӧлын вал Кун Кенешысь ялан ужась комиссилэн кивалтӥсез Энвиль Касимов.

— «Удмурт дунне» газет 100 арзэ пусъён понна вань луонлыкъёсты кутӥз, — вера Энвиль Владимирович. — Вань ортчытэм ужрадъёс пыр газет адӟытӥз, макем бадӟым инты со басьтэ калыклэн улоназ, макем зол ужа удмурт культураез но кылэз утён понна. Пусйымон, «Удмурт дунне» егит гожъяськисьёслы, писательёслы, крезьгурчиослы но суредаськисьёслы азинскыны юрттӥське шуыса.

_DSC0202

«Удмурт дунне» — Удмуртиысь изданиос пӧлысь тужгес арлыдоез, но со дыре ик тужгес адӟымонэз газет луэ, со ужпумъёсты шараяны уг кышка, — вераз Печатья но ивор вӧлмытонъя агентстволэн кивалтӥсез Алексей Воронцов.

110 ар ортчиз «Удморт кылын календарьлэн» нырысетӥ номерез потэм дырысен. Календарьёсты поттыны кутскиз азьветлӥсь Иван Михеев. Та бордысен ик лыдъяны кутскиськом удмурт печатьлэсь даурзэ, пусйиз журналистикая кафедраысь доцент Александр Шкляев. Конференциын Александр Григорьевич «Удмурт дунне» газетлэн пӧртэм вакытъёсыз сярысь но вераз. Газетлэн нимыз вошъяськиз удмуртъёслэн асваланзы воштӥськемен, история азинскемен ӵош. Озьы Нырысетӥ дунневыл ожлы луыса 1915-тӥ арын кылдэм «Войнаысь ивор» газет 1917-тӥ арын «Удморт» луэ. Соку удмуртъёслэн аслваланзы ӝутске, ас выжызэс газет нимын но возьматэмзы потэ, пусйиз Александр Григорьевич.

Зинаида Рябинина возьматӥз газетлэсь туала вакытсэ. Газет лыдӟисьлэсь тунсыкъёссэ котыр ласянь лыдэ басьтэ: пото удмуртлыклы, юртлы, литературалы но егитъёслы сӥзем ватэстъёс, бадӟым номерын луо политика, экономика, гурт удыс но мукет темаосъя материалъёс. Газет лэсьтэм сяна, редакция книгаос но потта. Озьы туэ печатламын вал удмурт кылын нырысетӥ энциклопедия — «Удмурт дунне» газетлы — 100 ар: Аръёс. Вакытъёс. Адямиос», поттэмын газетын ужасьёслэн книгаоссы.

_DSC0236

Зинаида Рябинина Йӧскалык библиотекалы «Войнаысь ивор» газетлэсь нырысетӥ номерзэ сётӥз.

Конференцилэн огъя люкетэз бере уж азьланьтӥськиз 2 секциосын. Нырысетӥяз эскеремын вал газет-журналъёслэн пӧртэм удысъёсын герӟаськемзы: кылэз, литератураез эскеронэн, Интернет дуннеен. Татын, кылсярысь, верамын вал, удмурт литератураын выль авторъёс ӧжыт шуыса, тужгес но уг тырмо пьеса гожъясьёс. Кызьы пусйиз кылосбур наукаосъя кандидат Алексей Арзамазов, драматургиен герӟаськем ужпум али висьытэ вань фин-угор калыкъёсты. Та сярысь вераськон ӝутэмын вал Венгриысь Бакони карын ортчем фин-угор писательёслэн дунневыл конгрессазы но.

Мылкыдэз пуромытӥзы 2-тӥ секциын чузъяськем эскеронъёс. Угось татын ӝутэмын вал удмурт кылэн герӟаськем ужпумъёс. Кылосбур наукаосъя кандидат Вера Пантелеева кӧня ке арзэ ни эскере удмурт газетъёсын пумиськылӥсь янгышъёсты. Арысь аре югдур уродгес но уродгес луэ, шуэ со. Вера Григорьевнаез тужгес висьыто стилистикаен герӟаськем янгышъёс — тросаз предложениосын кылъёслэн радзы сураськемын, ӟуч конструкциослы укшало, логика тӥямын. «Удмурт дунне» кылыз ласянь адӟем карымон луыны кулэ мукет удмурт изданиослы, пусъе Вера Пантелеева. Соин ик «Удмурт дунне» газетлэн редакторез Зинаида Рябинина Вера Григорьевналы ӵектӥз, редакцие лыктыса, журналистъёсын янгышъёс бордын ужаны.

_DSC0281

Вера Григорьевнаез тужгес висьыто стилистикаен герӟаськем янгышъёс — тросаз предложениосын кылъёслэн радзы сураськемын, ӟуч конструкциослы укшало, логика тӥямын.

Ӟырдыт вераськон ӝутскиз «Удмурт дунне» газетлэн кыл кутӥсь секретарезлэн Ольга Вахитовалэн докладэз бере. Со сӥземын вал пӧртэм газет-журналъёслэн шонер гожъяськонзылы. Угось 2002-тӥ арын удмурт кылын гожъяськон правилоос вылдӥськемен йырин трос валантэмъёс но сураськонъёс кылдӥзы. Кыӵе правилоосъя гожъяськоно: вуж яке выль? Озьы «Кенеш» журнал кылиз кылем дауре, «Удмурт дунне» выляз выжиз. «Инвожо» журнал понна воксё нокыӵе правилоос ӧвӧл кадь: кызьы мылзы потэ, озьы ик гожъясько. Нош «Вордскем кыл» огдыре вуж но выль но правилоосты лыдэ басьтэ: кыӵе правилоосъя материалзэ гожтӥз дышетӥсь, озьы ик печатлало. Та ужпум котькуд ар сямен ӝутӥське, но югдур уг воштӥськы.

_DSC0288

Конференциын оглом 20-лэсь ятыр докладъёс чузъяськизы. Ваньмыз соос матысь дыре нимаз сборнике потозы.

— Выль правилоосты кылдытыку, кылчиос ӝыны вамыш гинэ лэсьтӥзы, — вера Ольга Вахитова. — Кутскем ужез пумозяз вуттыны кулэ, гожъяськон правилоос валамон мед луозы шуыса.

Та ужпумез интыысьтыз вырӟытон понна кун ласянь заказ кулэ, коньдон мед висъяськоз шуыса, огкылэ вуизы конференцие пыриськисьёс. Угось, Удмурт кылосбуръя, финно-угроведениея но журналистикая институтысь кылчиослэн но, Историяя, кылъя но литературая Удмурт институысь тодосчиослэн но правилоосты йылаз-пумаз вуттыны нимысьтыз дырзы ӧвӧл.

Конференциын оглом 20-лэсь ятыр докладъёс чузъяськизы. Ваньмыз соос матысь дыре нимаз сборнике потозы.

Мария Векшина

Туспуктӥз А. Горбунов

Удмурт Дунне
By Удмурт Дунне Ноябрь 26, 2015 12:32
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<