Кужым сётӥсь книга

Удмурт Дунне
By Удмурт Дунне Ноябрь 5, 2015 15:36

энциклопедия, презентация«Удмурт дунне» газетлэн 100 ар тырмонэзлы сӥзем энциклопедической справочникез лыдӟыса, берпуметӥ бамзэ ворсай.

Газетлэн историысьтыз чуръёс, туспуктэмъёс пыр син азьын ортче быдэс улон. Лыдӟисьёслы вазиськоназ газетлэн валтӥсь редакторез   З. Рябинина пусъе ке но, 100 ар история понна бадӟым лыдпус ӧвӧл шуыса, анай кыл борды мон кадь гогыеным бурмемъёслы со ӝӧк выл книга луоз, син азьысь ноку уз ышы.

Даур ӵоже газет 8 пол нимзэ вошъяз, пӧртэм городъёсын печатласькиз, редакторъёсыз, ужасьёсыз вошъяськизы, но со котьку вамышъяз улонэн ӵош, удмурт калыклы анай кылыныз дунневыл, элькун иворъёсын, югдуръёсын тодматӥз. Газет киысь кие ветлӥсь луиз, калык тунсыкъяськиз улонлэн бергаменыз. Соинтэк шат 1970-тӥ-1980-тӥ аръёсы со 25 сюрс экземплярен потылӥз.

Книгалэн тужгес бадӟым узырлыкез — со газет кылдэм дырысен туннэ нуналозь ужамъёслэн списоксы (1 сюрс 735 адями — газет лэсьтӥсьёс но внештатной корреспондентъёс). Та списокысь уноез улонысь кошкемын ини. Аслам кузь улон даурам уноеныз тодматскыны, вераськыны шуд усиз. Ачим кадь ик огшоры гожъяськисьёсын сяна, тодмо писательёсын, поэтъёсын пумиськылӥ. Соос пӧлын вал Михаил Петров, Игнатий Гаврилов, Семён Шихарев, Николай Васильев, Пётр Кубашев, Герман Ходырев, Александр Белоногов но мукетъёсыз.

Книгаысь тодмо нимез, туспуктэмез адӟыса, тодам вайылӥ кытысен, ку но кызьы пумиськылэмъёсмес.

Кылем даурысь 60-тӥ аръёсы вал со. Мон сокугес гинэ армиысь бертӥ. Ял карон дыръям гурт улон, колхоз ужъёс но ӟеч адямиос сярысь гожъямъёсме «Алнаш колхозник» газетэ ыстылӥ. Арнянуналэ семьямы ӝӧк сьӧрын, табань сиыса, пуке. Ӧс вӧлак усьтӥськиз но, сьӧраз кезьыт омыр пыртыса, кузь пальтоен, йыраз кубанкаен — папаха порма изьыен — лапег мугоро воргорон пыриз. Ӟечбуръяськыса атаелы кизэ мычиз: «Мон туннэ, Карл Павлович, тӥ доры ӧй лыкты, Коля пиеныды тодматскон вылысь вуи». Собере кизэ мыным мычыса, шуиз: «Мон — Герман Ходырев».  Мон со сярысь кылылӥ, кыӵе ке книгазэ но лыдӟылӥ кадь, но пумиськылэммы ӧй вал. Пайми шаплы но визьмо вераськыны быгатэмезлы. Берло Герман Алексеевичен редакциын но трос пол пумиськылӥ. Уно визь-кенешъёс сётӥз, гожъяськыны бурдъяз. Одно ик дышетскы, шуиз. Дэмлаз вал Можгаысь педучилищее мыныны, нош мон шонтӥ Чувашиысь Канаш городэ финансистэ дышетскыны. Но гожъяськонлэсь ӧй палэнскы.

Сӥлы карыса, «Удмурт дуннелэн» редакцияз ужасьёс монэ кузпалыным ӵош ик юбилей нуналъёсазы ӧтчазы. Ваньдылы ик туж бадӟым тау. Та нуналъёсы кӧня тодмо адямиосын пумиськыны кылдӥз! Газетын но «Кенеш» журналын печатласькем ужъёсы сярысь вераллязы, праздникен ӟечкылаллязы. Озьыен, гожъямъёсы лыдӟисьёслы тунсыко пото.

«Удмурт дунне» газетлэн 100 ар тырмонэзлы сӥзем энциклопедиез дасясьёслы музъемозь йыбырттӥсько, тодӥсько, кӧня дырдэс, кужымдэс но визьдэс сётӥды. Мон та книгаез котькуд нунал усьясько, тодмоосыным вераськисько кадь — соос мыным азьланяз улыны кужым сёто.

Николай Павлов,

  Кизнер каргурт

Удмурт Дунне
By Удмурт Дунне Ноябрь 5, 2015 15:36
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<