Константин Симоновлэн лысьӧмыз кылиз ож бусые

Удмурт Дунне
By Удмурт Дунне Ноябрь 19, 2015 09:04
jcxYzNlZT

К. Симонов вань сюлмыныз яратӥз страназэ.

100 ар талэсь азьло 28-тӥ шуркынмонэ вордӥськиз Константин (Кирилл) Симонов.

Константин Симонов нимез кылӥськод ке, соку ик тодэ лыкто солэн «Жди меня…», «А помнишь, Алёша, дороги Смоленщины» кылбуръёсыз. Атыкай ожын вормем дырысен 70 ар ортчыса но, соос пиналэзлэсь но, арлыдоезлэсь но сюлэмъёссэс вырӟыто. Соин ик Константин Симонов — вань калыкъёслэн но вань выжыослэн писательзы шуонэн соглаш кариськытэк уг луы.

Константин Симоновез калыкын войналы сӥзем произведениосыз понна ярато ке, матысь ӵыжы-выжыосыныз (анаеныз но), мукет писательёсын но со ӵемысь ӧз тупалля. Анаез со вылэ куатаськиз «Жди меня…» кылбурысьтыз «Пусть поверят сын и мать  в то, что нет меня» чуръёсыз понна, нош писательёс вылаз омырскылӥзы партилэсь укыр кылзӥськемез понна. Сталин премиез Совето Союзын со мында нокыӵе писатель ӧз басьты. Симонов вал зэмос патриот, со вань сюлмыныз яратӥз партиез, страназэ. Соин но, оло, ноку но ӧз малпалля, странаен кивалтӥсьёс мыдлань карыны быгато шуыса. Озьы «космополитъёсты», Западлы дурбасьтӥсь интеллигенциез, зӥбонэ мылысь-кыдысь пыриськиз, Михаил Зощенколы но Анна Ахматовалы пумит вераськылӥз, нош «Новый мир» литературной журналын редактор дыръяз Борис Пастернаклэсь «Доктор Живаго» романзэ печатланы пумит кариськиз. Ӧз воштӥськы со берло но, 1973-тӥ арын Александр Солженицын писателез но Андрей Сахаров академикез курлась гожтэт улэ гожтӥськиз.

Зэмзэ-а  Симонов малпаз, Пастернак — космополит, нош Солженицынэн Сахаровен Совето Союзлы пумит шуыса? Та юанлы валэктон шедьтыны шуг. Нимыз но писательлэн 2 ук: Кирилл но Константин.

Мукет ласянь, кӧня солдатъёслэн но соослэн кышнооссылэн сюлэмъёсазы писатель оскон ӝуатӥз. «Жди меня…» кылбурез учкытэк вераны быгатэ вал котькуд солдат, та кылбур трос кылъёсы берыктэмын.

Война пыр потэм писатель военной темалэсь палэнскыны турттылӥз, вера солэн пиез Алексей Симонов. Но ӧз быгаты. Война бере гожтэм прозаез но быдэсыз ожен герӟаськемын: «Товарищи по оружию», «Живые и мёртвые», «Солдатами не рождаются»,  «Последнее лето». Кызьы сотэк — Симонов ожлэн нырысетӥ нуналъёсаз ик фронтэ кошкиз. Но солдат сямен ӧз.

— Мон ӧй вал солдат, мон корреспондент гинэ вал. Озьы ке но мон ноку уг вунэты Могилёв котырын ожмаськеммес, — вералляз Константин Симонов.

Соку Белоруссиын Могилёв кар дорын соосты немецъёс котыртӥзы. Малпаськоды, корреспондент ӧз кышка?

Но Константин Симоновлы, ожез ортчыса, кылдӥз улэп кыльыны. Улыны, война сярысь гожъяны, солдатъёслэн сюлэмъёсазы оскон ӝуатыны, Михаил Булгаковлэсь «Мастер и Маргарита» романзэ, Варлам Шаламовлэсь тюрьмаын улон сярысь гожъямъёссэ, Ильфлэсь но Петровлэсь романъёссэс печатланы.

Константин Симонов берло аръёссэ висьыса улӥз — курадӟиз тыосыныз. Кулон азяз пизэ куриз:

— Кулӥ ке, мынэсьтым мугорме сут но пеньзэ Могилёв бусые тӧлъя-буръя лэзь.

Алексей Симонов озьы ик кариз, кивалтӥсьёс бадӟым писательлэсь шӧйзэ музъеме ватыны косӥзы ке но вал.

Мария ВЕКШИНА

 

Удмурт Дунне
By Удмурт Дунне Ноябрь 19, 2015 09:04
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<