Кизнер черкогуртын усьтӥськиз тылпулэсь, кышкыт учыръёслэсь утиськонъя выль часть

Удмурт Дунне
By Удмурт Дунне 24 ноября, 2015 11:44
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
пожарная часть

Частьын тылпу кысӥсь 2 выль машина сылэ.

3 этажъем ӵуж-ӵуж юрт пуктэмын паймымон ӝог — 1 ар но 6 толэзь куспын!

Корка пыронэ вуизы трос куноос: Россиысь Промышленностья но вуз каронъя министерствоысь химия ож тӥрлыкез утёнъя-быдтонъя управленилэн кивалтӥсезлэн нырысетӥ воштӥсез генерал-майор Игорь Кондаков, Россиысь МЧС-ысь тылпулэсь утиськонъя управленилэн кивалтӥсез Владимир Розанов, МЧС-лэн Приволжск федерал центреныз кивалтӥсьлэн воштӥсез Олег Блохин, шаерысьтымы Правительстволэн Тӧроез Виктор Савельев, Кизнер ёрос муниципал кылдытэтлэн йырыз Александр Плотников но мукетъёс.

— Та юрт ӝутэмын Россиысь химия ож тӥрлыкез быдтонъя федерал программа улсын, — люкаськемъёслы вазиськиз Владимир Розанов. — Туннэ нуналлы та программа чотын 2002-тӥ арысен ёросын 13 объект лэсьтэмын: клуб, югдурез утисьёслы юрт, диагностикая центр, нылпи садъёс, школаос, мугорез кыдатонъя комплекс но мукет. Азьланезлы эшшо 13-ез чакламын. Та ужъёслы федерал бюджетысь висъяськоз ог 500 миллион манет.

Олег Блохин шаерысьтымы спасательёслэсь ужамзэс умоен пусйиз. 5 ар куспын Удмуртиын кышкыт учыръёсын адями бырон учыръёс 21 процентлы кулэсмизы, шуиз. Та лыдпусэз эшшо но пичигес кельтыны быгатомы. Угось Кизнерысь спасательёслэн табере луонлыксы кылдӥз шукырес учыръёс дыръя Интернет пыр герӟаськыны Москваысь, Нижний Новгородысь МЧС-ын ужасьёсын.

— Та часть 34 номеро лыдъяське. Нош мон сое нырысетӥ номеро шуысал! — выль коркалы паймемзэ уг ваты Виктор Савельев.

Зэм, часть синъёсты кыске. Корка вӧзын ик… фонтан! Коӵышлэн пыдаз — сапег, кияз — ву пазян гумы. Фонтан мышкын — спасательёслы вӧл-вӧл дышетскон-бызьылон инты. Вань отын ӝужыт башняез но, туп ӵыжан сэрегез но. Тапалан ик тылпу кысӥсь машинаосты миськон инты, спасательёслы мунчо.

Юрт пушкы пырыса, синъёс эшшо но шумпото. Тӧдь-тӧдь борддоръёсты шулдырто нылпи суредъёс. Укноосын — мудрон шторка, МЧС-лэн пусэз выллем лызо, нап-ӵужо. Вӧлдэт но огшоры ӧвӧл — котькуд кабинетын пӧртэм пужыос, чильк-вальк люстраос адско. Спасательёслы шутэтскыны пуктэмын валесъёс, мугорзэс куасалляны — тренажёръёс, лулсэрзэс гань-гань карыны — бадӟым аквариум, улэп сяськаос, вань психологлэн сэрегез. Усьтэмын музей.

Частьын тылпу кысӥсь 2 выль машина сылэ. Котькудаз, «горд атасэз» лапкомытыны сяна, пӧртэм кышкыт учыръёсты вормыны туала тӥрлык интыямын. Ужа татын ваньмыз-ӧвӧлэз 49 адями.

— Кизнер черкогурт шортӥ чугун сюрес кошке, — вера тылпулэсь утиськонъя  34 номеро частьлэн кивалтӥсез Юрий Никулин. — Таин сэрен, кыӵе ке вызове потыку, ӝеганъёс кылдылӥзы. Вылез юртмы черкогуртлэн уйпалаз сылэ. Вужез — 1976-тӥ арын пуктэмез — лымшорын. Со ларгамын ке но, ужзэ уз уреты на. Озьы ӝеганъёс уз кылдылэ ни.

Ольга Корепанова

Удмурт Дунне
By Удмурт Дунне 24 ноября, 2015 11:44
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<