Йыромем фламинго, ӧвӧлтэм ужась но дано премия

Удмурт Дунне
By Удмурт Дунне Ноябрь 18, 2015 08:33

Вавож

30 пол ӵошатскизы

Арлы быдэ шаерысьтымы предприятиос но огазеяськонъёс пӧлын спортэз азинтонъя вожвылъяськон ортче.

Гуртысь предприятиос пӧлын вормисе потӥз Вавож ёросысь «Колос» хозяйство. Спортэн вырыны отын луонлыкъёссы трос, нуналлы быдэ ужа «Колос» комплекссы. Та предприятиысь спорт понна кыл кутӥсь, куас базалэн кивалтӥсез Надежда Жуйкова верамъя, гуртоос понна бадӟым спартакиада ортчытӥське. Кылем арын 10 амалъя кужымзэс эскеризы, вормисе потӥзы пӧртэм ужъёсты быдэсъясьёслэн, пудо вордӥсьёслэн но специалистъёслэн командаоссы. «Колос» хозяйствоын ар куспын 30 ӵошатскон ортчытэмын.

Можга

Ӧвӧлтэм ужась

Можга городысь одӥгеныз культурая юртэн кивалтӥсьлы 50 сюрс тыриськон тупатӥзы.

Россиысь Следствиея комитетлэн Удмурт Республикая ёзэз ивортэмъя, кивалтћсь малпам узырмыны, аслэсьтыз тодмозэ выж миськисе интыяса. Куспазы азьвыл ик кенешиллям, документъёс вылын гинэ ужано луоз шуыса. Ӧвӧлтэм ужасьлэсь толэзьлы быдэ лыктӥсь уждунзэ кисыяз тыриз клубен кивалтӥсь. Озьы бюджетлы 50 сюрс манет тыр ыштон ваемын.

Дэри

Премия — дышетӥсьлы

«Удмурт Кенеш» огазеяськонлэн ёросысь ёзэз ар ӵоже ужамезлы йылпумъян лэсьтӥз.

Арлы быдэ ортчись ужрадэ удмуртлыкез азинтӥсьёс, ёросысь кивалтӥсьёс люкасько. Сюлмаськытӥсь ужпумъёссэс эскерем сяна, «Удмурт Кенешлэн» Дэри ёросысь ёзаз ужаны мылкыд карисьёсты бырйизы. Та нуналэ ик тодмо луиз 2005-тӥ арысен ёросын сётӥськись Э. Батуев нимо премилэн лауреатэз — Шор Постол школаысь удмурт кылъя но литературая дышетӥсь Надежда Кабанова. Ужрадэ вуылӥз журналистлэн, писательлэн Э. Батуевлэн анаез Анна Батуева.

Дэбес

Атайёсты данъязы

Ёросысь культурая юртын 8-тӥ арзэ атайёсты данъяло.

Та ужрадэ ӧтемын вал Дэбес ёросысь вань муниципал кылдытэтъёсысь 10 тужгес адӟем карымон бубыос. Ӧтем куноосты шуныт кылъёсын но синпель кузьымъёсын ӟечкылазы ёросысь кивалтӥсьёс. Котькуд атай сярысь ӟеч кылъёс верамын вал, пусйыны кулэ, ваньзы соос таза улонэн эшъясько. Ӟеч атай но усто кузпал луэм сяна, калык пӧлын ортчылӥсь ужрадъёсы мыло-кыдо пырисько. Та ужрад дыръя ик йылпумъян лэсьтэмын «Одӥг нунал анайтэк» фотоконкурслы. 5 уж пӧлысь умоен лыдъямын Ирина Перевозчиковалэн туспуктэмез.

Балезино

Бырем бере медаль

13 аресъем Андрей Касимовлы быремез бере «За спасение погибавших» медаль сётӥзы.

Шимес учыр вал кылем арын 27-тӥ октябре. 11 аресъем Александра но 13 аресъем Андрей Касимовъёсты Балезиноын улӥсь воргорон пӧяса сике пыртӥз но кыкназэс ик вииз. Пиосмурт нылашез сантэмаз, пияш аслэсьтыз сузэрзэ утьыны выриз, но кужмыз ӧз тырмы. Андрей Касимов кышкасьтэм луэмез понна пусъемын.

Глазов

Депутатлы 100 юан

Глазовысь город Думаын Удмуртилэн кунлык басьтэмезлы 95 ар тырмонлы сӥзем урок ортчиз.

Школаын дышетскись пиналъёслы городэн кивалтон сярысь пыр-поч веразы Глазов городлэн йырыз Олег Бекмеметьев но Глазов город Думалэн тӧроез Игорь Волков. Та вакытэ город администрациын 160 пала адями тырше, соос 23 удысэз нуо. Городысь кивалтӥсьёсын урокез радъяны юрттӥзы 15 номеро школалэн директорез, город Думалэн депутатэз Павел Колчин, та школаысь историен дышетћсь Татьяна Горбушина. Бадӟым ужрад ортчиз «Депутатлы 100 юан» проект улсын.

Яр

5 сюрсэз ортчизы

Ёросысь пудо вордон удысын тыршисьёс 9 толэзь ӵоже ужамзылы йылпумъянъёс лэсьтӥзы.

Та вакытэ ёросысь сюро таза пудолэн лыдыз 7 сюрс 74, со пӧлысь 2 сюрс 940-эз — скалъёс. 9 толэзь куспын 10 сюрс 669 тонна йӧл поттэмын. Одӥг скаллэсь 3 сюрс 578 килограмм йӧл кыскемын, кылем арен ӵошатыса, 349 килограммлы уногес. Котькинлы адӟем карымон тыршо «Прогресс», «АгроЯр», «Елово» хозяйствоос но Д. Егоровалэн, И. Семакиналэн, И. Веретенниковалэн фермер хозяйствооссы. Туканпи фермаысь скал кыскисьёс С. Щепина, Л. Салтыкова, Н. Семакина,

В. Толстикова котькуд скаллэсь 5 сюрс килограммлэсь трос йӧл кыскизы.

Ува

Йыромем тылобурдоос

Удугуӵин черкогурт дорысь фламинго тылобурдоез шедьтӥзы.

Аспӧртэм тылобурдоез 1-тӥ ноябре синйылтэм пӧйшурась Сергей Пасынков. Фламинго уя вылэм Петровцы гурт бервылысь ӵыпетын. Ӵуказеяз со вуэм Удугуӵин котыре. Таяз учыре сое синйылтэм ни егерь Михаил Королёв. Гуртоос кышказы, шуныт палась вуэм тылобурдо кынмоз яке ӟичы улэ шедёз шуыса. Ӝегатскытэк ӧтизы Ижысь зоопаркын ужасьёсты. Соос 4-тӥ ноябре фламингоез сьӧразы нуизы.

Та нуналъёсы ик фламинго тылобурдоосты шедьтӥзы Дэри но Сюмси ёросъёсысь. Огзэ тылобурдоез пуныос куртчылӥзы, нош кыкез зоопаркын уло. Фламингоез сяна, Удугуӵин черкогуртын улӥсьёс ӵыпетысьтызы синйылтӥллям сьӧд юсез, али сое утчало.

 

Удмурт Дунне
By Удмурт Дунне Ноябрь 18, 2015 08:33
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<