Инмарен сётэм чуръёс. А. Кузнецовалы — 75 ар

Удмурт Дунне
By Удмурт Дунне Ноябрь 26, 2015 12:57
Кузнецова

Алла Алексеевна ассэ «сьӧлыко адями мон» шуылӥз.

Алла Кузнецова вордӥськиз 1940-тӥ арын 29-тӥ шуркынмонэ Дэри ёросысь Чимошур гуртын.

Пичи дырыз секыт война вакытэ ортчиз. Атаез фронтэ кошкиз, отысь бертыса, музон семьяен улыны кутскиз. Анаез Пелагея Архиповна Лукиных кык нылъёссэ — Аллаез но Людмилаез — огназ быдэ вуттӥз ини.

— Пичи дырысеным интернатын улэменым, ӟуч кылын вераськыны дыши, — улон-вылонзэ тодаз вайылӥз кылбурчи. — Соин ик, дыр, капчиен сётскылӥз удмурт но ӟуч кылъёсын гожъяськон.

Алла Алексеевна ассэ «сьӧлыко адями мон» шуылӥз. Улон угось сое ӧз жаля, ас сяменыз сэрпалляз — пыдйылчи кадь улон интытэк кыльылӥз, ужтэк но сютэм ветлылӥз, пиналъёссэ нылпи юртын но кытын будэтӥз.

— Школа бере ужаны кутски кирпич заводын, — егит дырзэ тодаз вайылӥз кылбурчи. — Собере кытчы но ӧй вуылы. Мон культура удысын ужась но вал, фрезеровщик но, общежитиын комендант но луылӥ, выж но миськи, библиотекаын книга но сётъяй…

16 аресысен Алла Кузнецова кылбуръёс гожъяны кутскиз. Нырысетӥез «Чуръёсы тыныд» кылбур бичетэз 1976-тӥ арын потӥз. Отын яратонлы, шаерез гажанлы, войнае быремъёслы сӥзем кылбуръёсыз печатласькизы. Собере бӧрсьысь бӧрсе  вордскизы мукетъёсыз сборникъёсыз.

Тросэз кылбуръёсыз, кырӟанъёс луыса, калыке вӧлмизы: «Капи-кап», «Малпасько тонэ»… Алла Алексеевналэсь капчиен гожъяськыны быгатэмзэ али ке но тросэз тодазы ваё: ӝӧк сьӧры пуксёз но кытӥ-мар сюлме пырись чуръёс гожтоз. Алла Алексеевна ӵем гинэ пыралляз «Инвожо» журналэ (мон соку отын ужай). Тани-тани «Удмуртия» издательствоын «Лушкем яратон» («Интим») (1995-тӥ арын) книгаез потыны кулэ вал. Нош солэн кылбуръёсыз йыраз на — редакцие лыктэ но, ми дорын гожтыса, чуръёссэ книгапоттонние нуэ. Милемын но вераськыны вуэ, кылбур дуннеяз но зымылэ. Паймымон адями вал со. Лыдӟисьёсын пумиськонъёс дыръя быдэс залэз абдратъяз: ачиз ик кылбуръёссэ лыдӟе, артист сямен кырӟанъёссэ кырӟаса сётэ, улэм-вылэмез сярысь мыло-кыдо маде. Алла Алексеевна бере вераськись адями трослы бездыт адӟиське ни вал.

Филармониын зарни юбилейзэ пусйыкуз, Дэри ёросысь эшъёсыз солы удмурт дэрем дӥсязы. Алла Алексеевна соку шудолэсь но шудо вал, сцена вылын бубыли кадь поръяз, вань сюлэмзэ поныса, кылбуръёссэ лыдӟиз.

Улон сое пӧртэм каръёсы но гуртъёсы вуттылӥз. Егит дыръяз Орёл городын но улӥз, Сюмси черкогуртэ но кошкылӥз. Бӧрысь Дэри ёросысь Сокол гуртын но улыны кылдӥз. Ми, нылкышно кылбурчиос, ӵем гинэ со доры эмезяны но губияны ветлӥмы. Котьку ик милемыз шумпотыса но капчи мылкыдын пумиталляз.

2003-тӥ арын 18-тӥ гудырикошконэ, шудтэм учыре шедьыса, Алла Кузнецова бырыны шедиз.

Любовь Тихонова

Удмурт Дунне
By Удмурт Дунне Ноябрь 26, 2015 12:57
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<