Филипп Кедровлэн анаезлы

Удмурт Дунне
By Удмурт Дунне Ноябрь 19, 2015 08:57

75Гожтэт

Мусо Анна кенак, туннэ кадь ик тодам лыктэ на войналэсь азьло Алнашын Гыронбыдтон праздник дыръя тӥ доры ветлэме, монэ куно каремед. Чылкак вордэм пие кадь потӥськод шуыса, тыбырам дуп-дуп вешаса, сектад тон монэ соку. Корка тросад куноосыд вал. Асьмелэн шудо улонмы сярысь трос выль кырӟанъёс кылӥ мон со вунонтэм ӝытэ. Берлогес тон ачид Филяен ми доры куное вуид. Тодӥсько на мон, кызьы ми Филяен ӵошен, тонэ калык кырӟанъёсыз кырӟаны косыса, акыляк кариськомы вал.

— Ма, шай-а со ӝож кырӟанъёсыз кылэмды потэ? — шуиськод вал тон. — Куректонэн, кайгуэн кылдытэм кырӟанъёс со, мусо пиосы.

Зэм, мусо Анна кенак, вунэмын вал ини со ӝож кырӟанъёс, нош пересь арлыдад шедьтэм шуддэ малпамтэ, витьымтэ шорысь лек тушмон пыд улаз лёгаз. Сьӧсь убирлэн ортчем сюресэз — сэрегпумъёс, жаг турынэн согем лудъёс, шимес сильтӧл ортчем бере кадь сӧсыръям, тӥям, погыръям писпуос; сюресъёс вылын — ошылэм, виылэм адямиос.

…Кылем арын, тудву куашетон дыръя, вал со: ӝыт, шунды пуксён вадес, ми Гжатск город дорысь одӥг бадӟым гуртэз басьтӥм. Гурт сутэмын, олокызьы ёмыратэк кылем муръёос гинэ чонь-чонь сыло. Гурт шорын — ӝужыт сюрыё колодча. Сьӧдэктэм урамын отын но татын нылкышно шӧйёс. Колодча вӧзысь кызьпу улын вием мемиез дорын ог дас арес пичи ныл сылэ. Уг бӧрды со: мемиез султоз на кадь потэ солы. Тани колодча доры пурысьтам пересь кышномурт, боды вылэ пыкиськыса, лыктэ: йырыз солэн куалекъя, пересь ас понназ маке вераське — со визьтэммем. Тани пыдаз ыбем кышномурт, сулеп лымы вылэ вир пытьы кельтыса, колодча доры гыж кыстӥське, куараез ӧвӧл ни, шулӟектэм ымдуръёсыз выремъя гинэ валай мон солэсь мар верамзэ. «Пие, пие!» — шуиз со, колодча пала возьматыса, собере катьтэмак кымин усиз… Мукетыз кышномурт, колодча сюрылэн юбо бордаз пыкиськыса, йырсизэ кыскаса, шимес бӧрдэ…

Война кутскем дырысь нырысьсэ таӵе кышкыт ужез адӟи мон соку: со колодчае немецъёс нылпиосыз улэпкын куяллям. Даурам уг вунэты мон бабылляськем тӧдьы йырсиё ог арес ёрос пичи нылэз. Чильпыраса вурем тӧдьы дэрем вылаз солэн бубыли выллем чагыр буртчин лента бырттэмын, ачиз но ныл чылкак бубыли кадь. Нунылэн одӥг но шекез ӧвӧл — улэпкын куштэм маке со колодчаын кулэмын. Басьтӥ мон сое ки вылам, огесэп учкыса сылӥ но… — шарак усизы синвуосы.

Сое-а вунэтод, Анна кенак!

Тӥни со нуны понна, вордскем калыкелэн куректонэз, кайгуэз понна, тынад синвуэд понна, мусо Анна кенаке, чурыт сюлмын вамыштӥмы ми каргам тушмонлэн музъемез вылэ. Кӧкыосын серекъясь нуныос понна, тэтэ каремзылы шумпотӥсь нылпиос понна вамышъямы ми сӥзьыл кезьыт зоро уйёсы, музъемез инмозь пазясь эзель пыр ортчим, каргам сьӧсьёслэн каргам каразы вуим. Куазь но татын каргамын, вылды: ӧй адӟы на мон чылкыт сэзь нуналэз, чагыр инэз; узвесь кадь секытэсь сьӧд пилемъёс, дӥськутэз пызьыртымон коттӥсь нап бус, сьӧдалэс тулкымъёсын бугыръяське Неман шур. Амалтэк тодэ лыкто вордскем шаерысь зарни сӥзьыл нуналъёс, тыл выллем гомаса сылӥсь кызьпу арамаос, таӵе ик кылӥсько кадь мон писпу куаръёслэсь жинграк усьылэмзэс. Нош татын…

Тани туннэ но сӥзьыл уй тём-тём пеймыт. Тӧл вузэ, укное йыгаське, корка борддорез писпу вайёсын џабъя.

Куазь уйшоре вуэ ини, нош мон, кӧлыны вормытэк, пукисько. љӧк вылын «Советской Удмуртия» газет. Отын Филялэн портретэз — гадь вылаз куинь орденъёсын етӥз офицер. Сэзь синъёсыныз со мон шоры учке кадь. Тани со нап суд йырсизэ паллян киыныз паналтоз но, ӧжыт керпотысагес, мыным вазёз кадь потэ:

«Я, кылзы ай, Петрович, кыӵе пӧрмиз?

Тон понна, вордӥськем шаере,

Тон понна, вордӥськем калыке,

Мон, кулэ ке луиз, тылъёсы но пыро…

— Эх, кисьты вал кылбуре вань ӟырдыт мылкыдэз!» — шуэ со, выль гожъяно кылбурзэ кияз возьыса.

Али мон тани учкисько солэн портретэз шоры но таӵе ик кылӥсько кадь солэсь куаразэ. Нош со ӧвӧл ни… ӧвӧл ни, Анна кенак, мынам яратон эше, тынад вордэм пиед. Уг выды мон та уе кӧлыны, тани та гожтэтме быдэстэме бере но кема пуко, Филяен ортчытэм дыръёсме тодам вайылыса.

Тани матысь батареяысь орудиос гурак вазизы. Шур сьӧры, каргам убиръёслэн юртъёссы вылэ, усьыло секыт снарядъёс. Зурка музъем, дырекъя мынам гожъяськон ӝӧке. Мон кыӵе ке узыр немецлэн бадӟым из юртаз. Ӝӧк вылын немецен Франциысь лушкаса ваем юг-юг ӝуась «молния» лампа, асьме нылкышноосын куэм чебересь пужыё ӝӧккышет. Тани нош ик музъем зурак луиз, — чебер ӝӧккышет понна пунэмез со, Анна кенак. Секыт орудиос ӵош ыбыку, музъем чылкак мыд-мыдлань шонаське, бадӟымесь тыл бӧмъёсын бугырске со немецъёслэн гуосазы — со синву понна, меми куректэм понна пунэмез, Анна кенак.

Кыӵе меда та уй асьме палан? Map ужаськод меда тон, мусо Анна кенак? Кубо вылад-а пукыса, куректондэ черс вылад биниськод, боецлы шуныт пӧзь керттыса-а, кайгудэ, куректондэ синэн-синэн бичаськод? Коӵышед ӧс выжыын мисьтӥське, дыр. Кинэ меда вите та коӵыш, малпаськод, дыр, тон ас поннад. Малпан! Кӧня бугоръёсы меда бинемын ини тынад малпанэд, кӧня ӝоктэме ӝоктэмын, кӧня выртъёс пыр, ӵем кисьёс пыр поттэмын? Уд шедьты, дыр, тынад малпанэдлэсь пумзэ.

Дыр витетӥ час ини. Выд кӧлыны, мусо Анна кенак. Ӟардытозь кема ӧвӧл ни. Со вакчи дыре ке но зарни вӧтъёс мед адӟод.

…Югыт толэзь валес вылад пиштэ. Туймы шур вылын но уя со. Тулкымъёс вылын зарни кизилиос веттасько, зымылыса шудо. Лабрес бадьпуо шулдыр кожын пичи пи визна… (Уйёсын озьы вӧтаса, Филялэсь пичи дырзэ адӟиськод, луоз, Анна кенак.) Синъёстэ киыныд возъяса, со бадьпуо кож пала учкыса, кема сылӥськод тон. «Пие, лэся, ук? Э, бабасыр! Огназ ведь шур дуре васькем!» Кушетскыса тон кож доры бызиськод. Отысь тӥ Филяен сяськаё возь вылтӥ бертӥськоды. Шунды пиштэ. Филя бубылиос сьӧры бызьылэ, сяськаос бичаса, тыныд сётъя. Собере тон сое гадяз орденъёсын веськыт мугоро командирен адӟиськод. Серекъяса пыре со корка, ӧс дорысен ик «ӟечбур, анай» шуыса, тон доры вамыштэ…

Толэзь ӟус вылэ пиштэ. Кӧлыны выдон азяд ӟус вылэ кельтэм черсэныд коӵыш шудэ. Шаркак! уськытэ со черсэз. Шуак сайкаськод тон, умйылтӥд зэм ик пие пыриз кожаса. Учкиськод но, коркан нокин ӧвӧл. Нош ӝыт гинэ тон дорын трос кузя пукизы вал. Вуиз Параска, Одоть кенак, вуиз Малань, со, коркад пырытэк, корказьысь ведраостэ басьтӥз но вулы мынӥз; льӧмпу бодыез вылэ пыкиськыса, пересь Сандра но вуиз. Пеймыт луон азьын азбарад кин ке уробоен пыриз. Со чырткем пересь Кузьма озьы пу вайиз тыныд. Куазь ялан кезьыт но кезьыт луыны кутскиз угось…

Сэзь кариськы, Анна кенак! Секыт адӟон ваньмы вылэ вуиз, сое дэмен вормоно. Выд, буйгаты шуак луэм сюлэмдэ. Бертоз пиед, трос пиосыд бертозы, соос пӧлын мон но луо. Вуо мон тӥ доры, одно вуо, мусо Анна кенаке. Мон шоры учкыса, эсэплы ке но вордэм пидэ адӟем кадь мед потод. Дан тыныд сыӵе пи вордэмед, быдэстэмед понна, Анна кенак!

Куазь ӟардыны кутске ини. Выдӥ ке но, луоз меда умме усеме. Кема кыллё, дыр, мон, вордскем шаере сярысь, тон сярысь, Филя сярысь малпаса. Map но тодэ уг лыкты сыӵе дыръя. Вожой шур, шулдыр кожъёс, визнаны ветлэмъёс, возь вылын шулдыр шудонъёс, эмезяны, сутэраны ветлэм интыос, кытын ке сяськаё шур дурын чебер уйвӧтын кадь кылдэм нырысь яратон. Зарни егит дыр, дугды, сыл огесэп!

Туннэ мон, гожтэтме куспетӥ карыса, одӥг ужпумен Неман шур дуре ветлоно луи. Вазь берытско шуыса, малпасько вал, нош эшъёсы чорыганы ӝутказы. Сюлэм ӧз чида, нош ик пичи дырме тодам вайи, луоз. Милям али сылон вадьсамы шурлэн ярдуръёсыз из борддор выллем меџесь. By огинтыяз сылэ кадь, сьӧд-сьӧд адске. Чорыг нош татын! Кис быдӟаесь чипейёс, вӧш пасьтаесь паяос. Чорыган сямен милесьтым пыжмес мултэс уллане васькытэм. Чорыгамлы немецлэн йырыз кур луиз, лэся, ыбылыны кутскиз. Пуляос, йыр йылтӥ жуэтыса, мур вуэ «чок-чок» мертчыло. Ярдурысь куакъёс вадьсы ватскыса, ӝоггес гылӟоно луим, котьмар ке но чорыглэсь йыр дуно ик. Чорыганы но татын кепыр ваёно. Нош со понна макем ческыт фронтовой чорыг лым. Сугон понӥськод, сьӧд пӧсьтурын, лавровой лист… Жаль, куное ӧтеме уг луы тонэ, Анна кенак.

Ми эшеным землянка азе потӥм. Чорыг лымен вырон ӵоже куазь ӝомытаны вуэм. Зарезь палась кезьыт тӧл ыртэ, инэз сьӧд пилем возъя. Таӵе дыръя Неман пештырске, сьӧд тулкымъёс шукыяськыса ярдуре жугисько, яр вылэ пальккыло.

Мынам капитанэ, шӧд-скымон сюлэмшугъяськыса, учке шур сопала.

— Маке мултэс кема уло… — шуэ со ас понназ.

Тулкым куашетэм куара ялан кужмоя. Бугрес тулкымо шур вылэ немецъёс ракетаос лэзьяло, шур вылтӥ льӧльмыт тыл нюжаосын ортчыло трассирующей пуляос.

Артысь землянкаысь боецъёслэн кырӟамзы кылӥське:

Кыдёкысь лымыё лудъёсын

Тон сярысь тӧл мыным шыпыртӥз.

Кылэмед ке тынад луысал

Та мӧзмись куараме мынэсьтым…

Ми землянкае пыримы. Ӝоген разведчикъёс вуизы. Лапег гинэ, таза мугоро сержант мешоке керттылэм мае ке пыртӥз. Сержант, номыр вератэк, ми шоры пальпотыса учкиз но, мешокез пертчылыса, отысь лусьтро немецез поттӥз. Землянкаын кин гинэ вал, ваньмыз гурак серектӥзы — немец быдэсак пызесь. Солэн ымаз ӟустари туйылэмын, лусьтро йырсиез пызесь, ул дэремез, штани улысьтыз потыса, пыдес вылозяз лэзькем. Нылпиосты виылэм киоссэ кытчы карыны ӟудыса кадь, сылэ со, ассэ востэмен возьматыны медэ, шӧдске. Нош ми умой тодӥськом солэсь сьӧд сюлэмзэ. Кылзэ юалом ми солэсь. Филя понна трос таӵеослэсь кылзэс юаломы на. Табере милемлы черод вуиз, Анна кенак.

Эшшо одӥг уж сярысь тыныд ивортэме потэ на. Татчы, тушмонлэн музъем вылаз, пырон нуналэ таӵе уж вал. Монэ полковник наблюдательной пунктэ ӧтиз. Мон аслам ординареценым чик сюрестэм интыетӥ компасъя мынӥсько. Пыд улын сьӧд сюй бус-бус небыт, интыен-интыен ву пызьыра. Лудъёсты, возьёсты куасьтон понна канаваос кырылэмын, пумтэм уно соос, отын пачылозяз — нюр ву.

Асьме палась кадь гуртэз уд адӟы татысь: коркаос, ог-огзылэсь кышкаса кадь, ӝыны иськеме, иськеме пазяськемын. Куд-огез таӵе хуторъёс ӵем мерттэм писпуосын котыртэмын. Возь вылъёсын, лудъёсын ву люкан канаваос дурын пашмем кызьпуос, лулпуос. Тэльёс ичиесь, соос но шер шедьыло.

Сюрес кузя мон боецелы Пруссилэн историез сярысь, Тевтонской орден сярысь, Мемельской областьлэн кызьы но мар пумысен немецъёс кие сюремез сярысь верасько… Куспамы тазьы вераськыса мыныкумы, пужым тэль палан ыбылэм куараос кылӥськизы, вакчияк автомат очередьёс кӧжы кадь пазьгиськизы, собере ик граната пуштӥз. Ми тэль дурын сылӥсь корка пала бызиськом. Корка  сэргын сылӥсь боец милемлы, бур пала кожыны косыса, киыныз шона: подвалэ каръяськем немецъёс подвалысь пичи гинэ укнотӥ ыбыло вылэм. Корка доры вуэммы бере корка сэргын сылӥсь боец милемлы вакчияк мадиз, кызьы соосты командирзы хуторъёсты эскерыны ыстӥз но, кызьы немецъёс соослэсь старшойзэс — старшинаез — виизы.

— Табере тӥни корка улысь подвалэ пыризы но, номыр кареммы уг лу. Куинь кузя соос. Сьӧсь пӧйшуръёс кадь, гуазы ватскизы. Подвалъёссы нош гадъёслэн быдэсак бетон, бомбаен но уд басьты. Ничево, ми соосты сейчас ӵынэн ӝокатом, — шуиз со, турын вайись кык боецъёс пала возьматыса.

Корка борддор вӧзтӥ мон со подвалысь потӥсь пичи укно доры мынӥ но немецъёслы, потыны косыса, черекъясько.

— Уг-а пото? — юасько корказь дорын сылӥсь боецлэсь.

— Уг но малпало, — шуэ со мыным, — вераськемез уг валало соос, соосын мукет сямен вераськыны кулэ.

— Сылэ ай, эн тылске, — шуи мон турынэн лыктэм боецъёслы, — может, мукет сямен быгатом.

Бордам мынам но, боецелэн но быдэн кык гранатамы вал. Гранатаосме мон подвалэ бӧрсьысь бӧрсьы зӥртӥ. Немецъёс пӧлысь огез гинэ улэп кылем. Боецъёс сое штабе нуизы.

Сьӧсь пӧйшурез табере ми аслаз гуаз жугиськом, Анна кенак.

Мусо Анна кенак, пумтэм сюресъёстӥ, тодымтэ, адӟымтэ лудъёстӥ, тэльёстӥ, шокчыны луонтэм ӟырт кезьыт куазьёсын, кезьыт зоро сӥзьыл уйёсын ми тон кадь мемиослэсь синвузэс утчаськом. Берыктом, мусо Анна кенак, мемиослэн синву шапыксылы быдэ берыктом. Вир синвуэн бӧрдытом убирез!

Шиббен, 1944-тӥ ар, октябрь.

Басьтэмын М. Петровлэн «Улон понна» книгаысьтыз (1948-тӥ ар)

Суредаз Пётр Ёлкин

 

Удмурт Дунне
By Удмурт Дунне Ноябрь 19, 2015 08:57
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<