Филармониын чузъяськизы ӟуч но чиган романсъёс

Удмурт Дунне
By Удмурт Дунне Ноябрь 25, 2015 13:41
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Леонсия Эрденкоез чиган крезьгурлэн эксэй кышноез шуо. Со быдэс дуннелы тодмо луэ ӟуч но чиган романсъёсты быдэстэменыз.  Ижын концертэз азьын Л. Эрденко юанъёсылы валэктон сётыны соглаш луиз.

— Леонсия, тӥ нырысьсэ-а Удмуртие вуиды?

— Бен, Удмуртиысь учкисьёсын мон туннэ нырысьсэ пумисько. Малы ке татчыозь асьмеос тодмоесь ӧй вал. Удмурт кун филармония ӧтиз но, мон соку ик соглаш луи дорады лыктыны. Туннэ ӟуч романсъёсты чиган сюлмыным быдэсто но ӟеч мылкыдме калыклы кузьмало.

Чиган крезьгурлэн эксей кышноез Л. Эрденко.

Чиган крезьгурлэн эксей кышноез Л. Эрденко.

— Талант инкуазен сётӥське яке адями ассэ ачиз лэсьтэ, дышетскыса но быгатонлыкъёссэ волятыса?

— Со Инмарен сётэм узырлык, кузьым выллем. Тани, шуом, тӥледлы кузьмалозы машина, тӥ соин ворттылыны одно ик дышетскоды ук. Татын но озьы ик. Инмар мыным чебер, кужмо куара сётэм. Мон сое кутыны дышетски, визьнодасьёсы трос вал. Мон туж кема утчай аслым тупасьсэ. Сюриз сыӵе адями — Ирина Минина, джаз кырӟась. Шонерзэ вераса, тынад куараед вань ке, кырӟан аппаратэд ужа ке, тон чылкыт быдэстыны быгатод классикаез, джазэз, операез, шансонэз, романсэз.

— Кызьы валаськоды: кырӟан тӥляд яке ӧвӧл, кылъёссэ-а, гурзэ-а нырысь учкиськоды?

— Кызьы дэрем мугоръя пуксьыны кулэ, кырӟанэн но озьы ик. Куддыр аслам но юанэ кылдэ, мынам-а та кырӟанэ, оло, сое быдэстоно ӧвӧл. Кылзӥсько сюлэм куараме, чакласько учкисьлэсь мылкыдзэ. Аслам но, соослэн но пушсы бугыртӥське ке, со романсэз одно ик программаям пыртӥсько. Кырӟанъёсты бырйыкум, нырысь ик кылзӥсько гурзэ, собере гинэ сак учкисько ини кылъёссэ, куддыр кылъёссэ ачимъя воштӥсько. Но валтӥсь интыын мон понна — крезьгур, малы ке шуоно гур куд-ог дыръя кылъёслэсь тросгес но яркытгес вераны быгатэ.

— Кырӟась ке ӧй луысалды, кыӵе удысэз меда бырйысалды?

— Суредась луысал, дыр, творчествоен вырысал. Яке пудо-животъёсты утялтысал, мон соосты туж яратӥсько. Скал кыскыны кутскысал ке но, мон кырӟаса ужасал.

— Тӥ — чиган кышно, тунаськыны быгатӥськоды-а?

— Уг, ноку но тунаськеме ӧвӧл, малы ке шуоно ми Инмарлы оскись чиганъёс. Ми Индиысь потэм эрва выжыысь чиганъёс, туж яратӥськомы кырӟаны. Нялтас вераса, семьяысьтым вань нылкышноос кырӟало, экто, пиосмуртъёс скрипкаен шудо. Нош лаве выжыысь потэмъёслэн валтӥсь интыын коньдон, зарни, соос ик тунасько. Семья но кылдыто коньдоно адямиосын узырлыксэс эшшо но будэтон понна. Зэмзэ вераса, чиганъёс дунне вылын туж трос, соослэн вераськонзы но висъяське, пӧртэм интыосын улӥсь чиганъёс пумиськизы ке, ог-огзэс уз валалэ.

— Ас выжыдэс тӥ  умой тодӥськоды?

— Одно ик. Эрденко-Пономарёв выжымылы 300 ар. Пересь песятаймы Михаил Гаврилович Эрденко Москваысь консерваториын профессор вал, тодмо скрипач. Эшъяськиз Л. Толстой писателен, С. Рахманинов, А. Глазунов, А. Гречанинов крезьгурчиосын. Выжымы туж кырӟась. Семьяысьтымы котькудӥзлэн аслаз коллективез вань, ми ялан гастрольёсын, ог-огенымы адӟиськыны ӵем уг кылдылы. Семьяын луыны кулэ пастух, та кыллэн туж умой пуштросэз. Мынам атае — Россиысь дано артист, «Ромэн» театрлэн кивалтӥсез Николай Эрденко — быгатэ вал огазеяны милемды, пастух выллем люка вал котыраз. Туэ ноябре солы 70 арес тырмысал, таин валче ми бадӟым концертэн пусъёмы та лыдпусэз.

— Мар юрттэ улыны, шудо луыны но творчестводэс азинтыны?

—  Яратон. Мон егит дыръям бырйи яратонэз. Ноку но ӧй жаля та сярысь. Инмар сётэ ваньзэ, мар асьмелы кулэ. Кык пиосы, но туж гочалляй ныллы. Алигес пиелэн нылыз вордскиз, уд оске, со быдэсак мыным кельше. Табере мынам нылы вань, семьямы эшшо шудогес луиз.

Галина Семёнова

Туспуктэм: udmfil.ru

Удмурт Дунне
By Удмурт Дунне Ноябрь 25, 2015 13:41
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<