Этнофутуризм но постмодернизм куспын. Кызьы нимано удмурт литературалэсь туала вакытсэ?

Удмурт Дунне
By Удмурт Дунне 19 ноября, 2015 08:51

2005-тӥ арын лыдӟись кие вуиз С. Матвеевлэн «Чорыглэсь лушкам кылбуранъёс» роман-уйбыртонэз. Та бордысен кутске удмурт литературалэн выль даурез.

Та вакытозь удмурт литератураын кузёяськиз этнофутуризм, тодамы ваём Л. Ореховалэсь «Ярдуртэм нюлэс», Э. Батуевлэсь «Гольык» кылбур бичетъёссэс, П. Захаровлэсь, В. Шибановлэсь кылбуръёссэс, О. Четкарёвлэсь гожъямъёссэ. Но, кызьы вера этнофутуризмез эскерись В. Шибанов, 2004-тӥ арлы та ӧр удмурт литератураын кысыны кутскиз. Нош кыӵе вакыт сое воштӥз?

Критик А. Арзамазов,     С. Матвеевлэсь романзэ эскерыкуз, вера постмодернизмлэн бычыясь удэз сярысь: «этно» сылме «эго» шуонын, этноцентризм — эгоцентризмын. Но учкид ке, постмодернизмлэн шокамез шӧдӥськизы ни Э. Батуевлэн но кылбуръёсаз («Гольык» бичет), Л. Нянькиналэн но гожъямъёсаз («Ау-ау! яке Инбамысь гожъёс» повесть).

Постмодернизм амалэн гожтэм текстъёсын автор ыше. Со интые кылдэ текст гожтӥсь я улонзэ мадись герой. С. Матвеевлэн 2015-тӥ арын потэм «Эмезь гурезь» романаз авторлэн малпанъёсыз но позициез уг шӧдӥсько, отын вань аслаз улонэз сярысь верась герой. Лыдӟись ачиз йылпумъянъёс лэсьтэ, текстлэсь ачиз выль пуштроссэ усьтэ. Лыдӟись но текст куспын диалог кылдэ. Дарали Лелилэн «Ӟазег лобон сюрес» антиутопияз йылпумъянэз 2 пӧртэм. Таосыз ӧз кельше ке, оло, лыдӟись ас понназ мукет но йылпумъян малпалоз.  Дневник амалэн гожъяськон но берло дыре удмурт литератураын туж азинске. Интернетын блогъёс, Н. Михайловлэн веросъёсыз, Д. Лелилэн гожъямъёсыз… «Эмезь гурезез» мон роман ӧй шуысал, со документальной жанрлы — дневниклы — тупа», — пусъе литературовед Л. Дмитриева.

Н. Михайлов веросъёсаз «уйвӧт» амалэз кутыны яратэ. Но солэн геройёсыз уг сюро дуннелэн сопалаз, этнофутуризмын сямен, соос одӥг дуннелэн пӧртэм интыосаз вуо. Уйвӧт — со улонысь огдырлы палэнскон вакыт. Зэмос улон кадь пото С. Матвеевлэн «Чорыглэсь лушкам кылбуранъёс» романысьтыз но уйвӧтъёс. Пӧртэм дыре герой сюре я Америкае, я аслаз вордӥськем гуртаз. Со уйвӧтъёс геройлы ассэ, лыдӟисьлы геройлэсь сюлэмшугъяськонъёссэ валаны юртто.

С. Матвеевлэн «Эмезь гурезь» романаз герой мукет произведениосысь цитатаосты тодаз вайылэ. Куддыр лыдӟись цитатаос но текст вискын огъя нюжаосты но уг шедьты. «Матвеев сомында авторъёсты романэзлэн сюжетэныз нокызьы уг герӟа. Кнут Гамсунэз вера, собере эшсэ Борис Игнатьевез тодаз вае, 300 манет вылэ вуэ. Но малы со Кнут Гамсун отын кутэмын? Анна Гавальда, Фред Варгас одӥг пол гинэ уг пото», — вера В. Шибанов.

Пӧртэм авторъёсты, тодмо суредаськисьёсты, артистъёсты, «масс-культуралэсь», туала удмурт лулчеберетлэсь тодметъёссэ (coca-cola, модая агентство Mademоiselle Oudmourte) кылбуръёсаз тодэ вайылэ кылбурчи Б. Анфиногенов. Солэн «Айшет будущего» кылбур бичетаз яркыт адӟисько этнофутуризмлэн тодметъёсыз: вашкалазэ гажан мылкыд, кылбуръёсын удмурт, ӟуч но англи кылъёсты кутон («Мон вӧтай туннэ: fashion арня,/ вспышки камер, pret-a-porter,/ ты идёшь и не видишь меня./ Мон тонэ адӟисько»). Николай Михайлов но веросъёсаз удмурт мифологиысь геройёсты кутэ, герой ишанъёс пӧлын улэ кадь («Шурысь ӝутскиз вутурынъёсын, куаръёсын биниськем песятай»). Озьыен, этнофутуризм но быдэсак удмурт литератураысь ӧз кошкы на?

Б. Анфиногенов алигес гожтӥз: «Этнофутуризм больницаын кылле, но шока… Кутске постэффект. Нимыз солэн — постэтнофутуризм». Нош маин пӧртэм луэ этнофутуризм постэтнофутуризмлэсь? Б. Анфиногенов вера: «Этнофутуризмлэн котьку валтӥсь малпанэз но концепциез вал ке, постэтнофутуризмлэн нокыӵе малпанэз ӧвӧл. Выль удмурт тинейджеръёслы ваньмыз дунне, соос ужало фермаын, гидын яке кеносын, со дыре ик, Интернет кутӥсь интыосты утчаса, ветло».

Озьыен, кызьы нимано удмурт литературалэсь берло вакытсэ? Оло, со постмодернизм, постреализм, постэтнофутуризм. Оло, выль удмурт литература — со пӧртэм ӧръёслэсь сурет?

Мария Векшина

 

 

Удмурт Дунне
By Удмурт Дунне 19 ноября, 2015 08:51
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<