«Даур куара» конкурслы йылпумъянъёс

Удмурт Дунне
By Удмурт Дунне Ноябрь 14, 2015 13:52

100 ар«Удмурт дуннелы» 100 ар тырмонэн валче газетлэн внештатной корреспондентъёсыз пӧлын 2014-тӥ арын 31-тӥ октябре ялэмын вал «Даур куара» конкурс.

Ӵошатскон мынӥз таӵе удысъёсъя: проза (повесть, верос, роман); поэзия (кылбур цикл, роман); драма (пьеса, сценка, юмореска); ивор куды (интыосысь иворъёс); эскерон уж (научной исследование), туспуктон (фото, видео). Жаляса верано, берло кык номинациосъя ужъёс ӧз вуэ. Тау кариськом конкурсэ пыриськем вань авторъёсмылы.

Вормисе потэмъёс:

Проза

1-тӥ инты — Николай Карпов, газетлэн кемалась дырысен лыдӟисез но авторез. Гожъя улонысь учыръёс, веросъёс, дася йыртӥянъёс. Улэ Кизнерын, ужамын экономист луыса. Пусъемын «Уйвӧт» веросэз (2015, 21-тӥ апрель).

2-тӥ инты — Любовь Ганькова, гожъя кылбуръёс, веросъёс. Улэ Алнашын, ужамын бухгалтер луыса. Печатланы дасямын «Улэм потэ» веросэз.

3-тӥ инты висъямтэ.

Публицистика

1-тӥ инты — Валерий Баймурзин, дышетэ Пичи Пурга ёросысь Аксакшур шор ёзо школаын. Гожъя вашкала сям-йылолъёс, адямиос сярысь, историысь чуръёс. Дунъямын шаермылэн историеныз, Быдӟым Вормонэн герӟаськем мур пуштросъем материалъёсыз понна.

2-тӥ, 3-тӥ инты висъямтэ.

Поэзия

1-тӥ инты — Ирина Весёлых, газетлэн кемалась дырысен лыдӟисез но авторез. Гожъяз зарисовкаос, очеркъёс, кылбуръёс, пыриськылӥз пӧртэм конкурсъёсы. Ужамын дышетӥсь, журналист, райкомын инструктор луыса. Улэ Шаркан черкогуртын. Кылбур сузьетэз потӥз 2015-тӥ арын 16-тӥ январе.

2-тӥ инты — Виктор Крестьянинов, Грак ёросысь Вуж Эгра гуртысь дышетӥсь-пенсионер, «Эгра кенакъёс» но «Жильыртӥсь ошмес» фольклор коллективъёслэн арганчизы. Кылбуръёсыз потӥзы 2015-тӥ арын 13-тӥ феврале, 6-тӥ мартэ.

3-тӥ инты висъямтэ.

Ивор куды

1-тӥ инты висъямтэ.

2-тӥ инты — Марина Морякова, Кияса ёросысь Вуж Салья гуртысь ветеранъёслэн огазеяськонэнызы но «Нылкышно шуд» клубен кивалтӥсь, кема аръёс ӵоже ужамын культура удысын. Газетэ гожъя зарисовкаос, культура, семья ужпумъёсъя ивортонъёс, корреспонденциос. Пусъемын пӧртэм иворъёсыз, корреспонденциосыз.

3-тӥ инты — Раиса Корепанова, «Ижмаш» заводысь ветеран, Улэ Ижын, пыриське Алнаш землячестволэн ужаз. Гожъя удмуртлыкен герӟаськем ивортонъёс, корреспонденциос, тодэ ваёнъёс. Пусъемын пӧртэм иворъёсыз, корреспонденциосыз.

Драма

1-тӥ инты — Николай Трубачев, дышетӥсь, кивалтэ Дэри культура юртысь кырӟанъя «Вуюись» ансамблен. Газетэ печатласько кырӟанъёсыз. Берло кык арзэ мыло-кыдо гожъя юморескаос, та ужъёсыз понна ик вормисе потэмын.

2-тӥ инты — Ольга Николаева, Шаркан ёросысь Ляльшур школаысь дышетӥсь. Газетэ гожъя ивортонъёс, корреспонденциос, кылбуръёс. Вормисе потӥз «Мед серектоз нылыд-пиед» сценариез понна.

Вань та вылӥ верам авторъёс пусъемын луозы коньдон премиосын.

Валтӥсь премия (10 сюрс манет) сётыны чакламын Геннадий Парфёновлы, ужа Кияса ёрос музейын. Газетэ гожъяське пинал дырысен. Пусъемын конкурсын ялэм пӧртэм удысъёсъя мыло-кыдо пыриськемез понна.

Юрттӥсьёс

Газет вӧлмытыны юрттэмзы понна редакция коньдон премиен пусъе тужгес мыло-кыдо лыдӟисьёсты:

Николай Емельяновез — Можга ёросысь Удмурт Пычас гуртысь дышетӥсез-пенсионерез;

Раиса Моторинаез — Дэриысь арлыдоослэн «Мӧзмон» клубенызы кивалтӥсез;

Фаина Осинцеваез — Дэри ёросысь Ягул черкогуртысь эмъян удысысь ветеранэз;

Нина Шутоваез — Пичи Пургаысь Нылпиослы ватсаса тодон-валан сётон юртын ужасез.

«Удмурт дунне»

Удмурт Дунне
By Удмурт Дунне Ноябрь 14, 2015 13:52
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<