Данъян пулын — Пичи Пурга ёросысь Аксакшур гуртысь Алексей Мотов

Удмурт Дунне
By Удмурт Дунне 10 ноября, 2015 10:56
Scan

Пичи Пурга ёросысь Аксакшур гуртысь Алексей Мотов.

Пичи Пурга ёросысь Аксакшур гуртысь Алексей Мотов егит дырысеныз «Аксакшур» СПК-ын механизатор луыса тырше. ӟеч тыршемез «Удмурт Республикаысь гурт удысысь дано ужась» нимын пусъемын. Та нуналъёсы Алексей Леонидовичлэн нимыз ёросысь Данъян пул вылэ пыртэмын.

Геннадий (озьы шуо Мотовез гуртоосыз) пичи дыръяз ик техника борды кыстӥськылӥз. Угось вал кинлэсь адӟем карыны:  дядяез Леонид Алексеевич руль сьӧрын ворттылӥз, шутэтскыны потытозяз, колхозын ужаз.

Аксакшурысь 8-тӥ классэз йылпумъяса, армие ветлыса, Геня вордскем гуртаз улыны кыле, ужаны интыяське «Дружба» колхозэ. Колхоз кивалтӥсьёс сое Пичи Пурга черкогуртэ трактористэ дышетскыны келяло. Пияш мыло-кыдо отын дышетске — атай вӧзын ворттылон одӥг, нош таиз чылкак мукет — ачид руль сьӧрын пукиськод, тӥяськем трактордэ ас киосыныд тупатъяны быгатӥськод.

Алексей Леонидовичлы пӧртэм тракторъёсын ужаны кылдӥз. Яратоно эшеныз со кӧня лудъёсты но возьёсты котыртӥз: гыриз, кизиз, кутсаз, турназ, араз.

— Гужемзэ уен-нуналэн ужано, — вера Алексей Леонидович. — Шутэтскон нуналъёсты адӟыны уг кылдылы ни. Толалтэзэ бон кӧня ке ганяк кариськоно ик, соку ужмы ӧжытгес луэ. Ульчаос лымыен согисько ке, мон соосты  тракторен сузяса ветлӥсько. Тулыспал, валамон ини, техникаез бусые поттыны дасяськом. Колхозын ноку но уж уг бырылы. Нош ваньмон дыр сюрыку, Нинаен но солэн анаеныз вожмаськыса сямен «Удмурт дунне» газетэз лыдӟиськом. Гуртын улӥсьёс но ужасьёс сярысь гожъямъёс кельшо. Ми асьмеос но гуртын улӥськом ук, со тема милемлы туж матын.

Алексей Леонидовичлэн кузпалыз но Нина Петровна колхозын тырше. Со валтӥсь бухгалтер. Ӟеч тыршемез понна Удмурт Республикаысь гурт удысысь дано ужась луэмын.

Кузпалъёс адӟем карымон 2 пинал будэтӥзы. Сергейзы, Сарапулысь радиоколледжез йылпумъяса, Ижысь радиозаводын тырше. Люда нылзы Сарапулысь медучилищеын дышетскиз. Али ужа Пичи Пурга ёрос больницаын.

Шумпотыса верано,  Аксакшурын улӥсьёс пудо вордонлэсь уг куштӥсько. Мотов кузпалъёслэн но гид тыр пудозы — скал возё, ошпи куайыто, кунян будэто, парсь пиято, азбар тыр чипы-курег вордо.

— Туж ужась семья, — Мотов кузпалъёс сярысь ӟеч кылъёс гинэ вера «Аксакшур» СПК-ен кивалтӥсь Зоя Почегова. — Алексей Леонидовичез кытчы гинэ мыныны но мае гинэ  лэсьтыны уд косӥськы, ваньзэ тыро-пыдо, рос-прос быдэстэ. «Уг быгаты», «уг пӧрмыты» кылъёссэ солэсь ноку уд кылы. Котькыӵе тракторен ужаны быгатэ. Оскымон, ужзэ гажась, техникаез яратӥсь, адямиен одӥг кыл шедьтыны быгатӥсь воргорон со. Туж умой шудэ арганэн, эшъяське спортэн.

Любовь Тихонова

 

Удмурт Дунне
By Удмурт Дунне 10 ноября, 2015 10:56
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<