Данъян пул вылын — Можга ёросысь Пычас гуртысь Валентина Семёнова

Удмурт Дунне
By Удмурт Дунне 10 ноября, 2015 13:18
_DSC2606

Валентина Семёновалы вормонтэм уж но ӧвӧл кадь.

Можга ёросысь Пычас гуртысь Валентина Семёнова 18 ар ӵоже ни социальной ужась луэ. Сюлмысь тыршемез понна нимтулзэ шаерысьтымы Данъян пул вылэ пыртӥзы.

Валентина Леонидовна 11 ар ӵоже тыршиз вал Пычасысь парсь вордонъя комплексын. Но комплекс пумен бырыны кутскиз, шуг-секытъёс пыр потыны быгатытэк.

— Со вакытэ нылы Можга педколледже дышетскыны пыриз, — тодаз вае Валентина Семёнова. — Маин дыдыме сюдом-дӥсялом шуыса, парсь вордонысь кошки. Аслам йырысьтым юан уг поты: дышетскеме ӧвӧл, кин монэ  кутоз?  Сузэре — дышетӥсь. Каникул дыръя нылпиосын пересьёслы юрттӥськиз. Со ик шуиз: оло, тон но астэ эскерод? Гуртысь калыкез тодӥсько. Уноез удмуртъёс. Огкыл шедьтыны быгато, дыр, малпай. Ачид умой луид ке, тонэн но котькин умой луоз, шуи. Нырысь-валысь одӥг гинэ кышкан маза ӧз сётылы. Ачим кырсь уг улӥськы ке но, котькинлэн киыз аслаз, кельшоз-а мынам ужаме муртъёслы?

Но нылкышно ваньмыныз огкыл шедьтыны быгатӥз. Пычасын Валентина Семёноваез гажасьтэмез ӧвӧл кадь. Туннэ солэн 5 утялтоно муртэз. Но мукетъёс но вазиськыло, монэ но бурд улад басьты шуыса. Но талэсь трос адямиез Валентина Леонидовналэн чакламез уг поты. Тросгес кузя люкасько ке, ваньзылы огкадь дырзэ висъямез уг луы, ужаса но вуттӥськыны шуг.

— Мурт песяез но аслэсьтыдзэ кадь ик яратыны луэ вылэм, — вера Валентина Леонидовна. — Ачим 44 арес дыръям мемейтэк кыли. Ачим анай, песянай ни ке но, арлыд люкамъя мемей уката уг тырмы. Улэп дыръяз кулэ луэмзэ ум валаське. Меми тырмымтэен но, лэся, одӥг-огез котыре сокем-сокем кыстӥськисько! Ма, туж яратымоно песяйёсы! Ӵош серекъяськомы но, бӧрдӥськомы но. Отпускын дыръям но сюлэм уг чида: нош дыртӥсько доразы. Туэ гинэ ӧй ваньмы — нылы доры Сочие ветлӥ. Но соку но сюлэм туж шуг улӥз, гуртоос кыӵе меда монтэк уло шуыса. Аслам матысь ӵыжы-выжыосы кадь пото.

Чаклано адямиосыз пӧлын тужгес егитэзлы 56 арес. Висеменыз ветлыны туж шугъяське со. Но таиз дӥне Валентина Семёнова эшез доры сямен дыртэ. Сыӵе эшъяськонзылы 12 ар ни. Нош тужгес арлыдоезлы 89 арес. Фёдор Михайлович Михайлов сельсоветэн кивалтэмын, Валентина Леонидовнаен огвакытэ ӵош но ужамын. Соин но, лэся, дораз чакласез вуыку, воргорон котьку пальыштэ: кышномурт куаралэсь корка ик шулдыр луиз, шуэ.

— Корказэс утялтӥськод, сиён пӧзьтӥськод но, уж быре. Но соос монэ куддыр воксё но уж сётыны уг возьмало. Ӵемгес вераськон часэз витё. Быдэс нуналъёсын телевизорен я радиоен гинэ пукыны секыт уго. Сюлэм вӧсьтэ телевизорлы уд усьты, со тонэ уз но веша. Ваньзылэн нылпиоссы вань ке но, огзы но бордазы уг уло. Соин ик одӥг нуналме одӥгезлы пересьлы, мукетсэ кыкетӥезлы сӥзисько. Ӧсэтӥ пыреме бере нырысь ик вӧзазы пуксисько, мылкыдзэс юасько.  Шутэтскон нуналъёсы гинэ ас мылкыдыя улӥсько. Нылы шуэ: эн ужа ни. Но мынам пудое ӧвӧл бере, дорам утялсконме ӝог йылпумъясько.  Мар карыса огнам пуком ай? Куддыр мӧзмыны кутскисько. Адямиосыным ик шулдыргес, нуналлэсь ортчемзэ но валатэк кылёно.

Тамында ар ӵоже Валентина Семёновалэн огпол но удысэзлэсь куштӥськон мылкыдыз ӧй вал на. Котькуд адямиез понна мар кароно шуыса огкыл гожтэмын ке но, со воксё но огкылъя уг улы. Мае косо, ваньзэ быдэстэ. Куддыр син шораз куашканы кутскем кенер йӧтэ ке, кема малпаськытэк, кияз молот но кортӵог кутэ. Бакча сиён мерттон-октонэз веранэз ик ӧвӧл ни!

— Кешыр, гордкушман бичаны огез песяе лымы усемез одно возьма вал. Ачиз но котырам юрттӥське. Кезьытлы чидатэк, ачиз ик юа: кынмиськод-а, Валя, мынам киосы эбыляса усьыло ни. Солэсь юасько: малы асьмеос шулдыр куазен ум гудӥськиське? Но солэн дышем сямыз сыӵе вал, азьло дырысен кешырзэс озьы окто вылэм. Но кызьы мон солы пумит мыном? Онисьяпай туж шудтэм нылкышно. Быземез бере семьяен удалтымтэ. Нылзэ ваемез бере ик уже потэм. Озьы 6 толэзьем пиналыз кулэм. Со монэ нылыз интыын адӟе вал. Но кулӥз ни со. Тужгес секытэз — адямиосты ватон, — лулӟе нылкышно.

Нялтас вераса, Валентина Семёновалы вормонтэм уж но ӧвӧл кадь. Толалтэез гинэ туж кышкаса возьма. Вань ужъёс пӧлысь тужгес секытэз — лымы поттан, шуэ. Пу пильылыны дышиз ни. Нош лымылэсь кышка. Кот куазен со юн секыт луэ. Нылкышно суйёс уг вормо. Пересьёс, сое жаляса, бордаз юрттӥськыны пото ик, лопата куто, лымыез огазе люкало. Нош сое азбарысь поттоно ук. Вал кадь кыткиськоно луэ, шуэ нылкышно.

Огезлэсь гинэ Валентина Семёнова кепыр вае: Данъян пул вылэ сюремезлэсь.  Мон огнам социальной ужась гуртамы ӧвӧл, шуэ. Вань эшъёсыным ӵош огкадь ужаськомы.

 Елена Сараматова

 

 

 

 

 

 

Удмурт Дунне
By Удмурт Дунне 10 ноября, 2015 13:18
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<