Алнаш ёросысь пиос кунмес утьыны дасесь

Related Articles

• Кизён йылпумъяське 0 31.Май
• Удмуртиысь калыкъёслэн ассамблеяенызы кивалтоз «Удмурт Кенешлэн» вице-президентэз Владимир Байметов 0 07.Фев
• Шаерамы 10 сюрс 59 ВИЧ-инфекциен черламъёс 0 21.Дек

Тросэз пиос военной службазэс ортчыны дась.

Быдэ вуэм пиосты армие басьтон Алнаш ёросын азьланьтӥське. Призывникъёс медкомиссия ортчо.

Призывъя врачебной  комиссилэн кивалтӥсез, Алнаш ёрос больницаысь врач-терапевт Ольга Смирнова пусъе: туннэ нуналлы медкомиссиез 165 егит пиос ортчизы. Берло дыре тросэз пиос курадӟо ӝуш но сюл висёнъёсын, вирзӥбетсы будэмын, сюрлызы кырыжамын, ӵем пумиське плоскостопие. Кинлэн тазалыкез лябгес, соосты Ижкаре эскериськыны лэзиськом. Хирург доры келямын 6 адями, терапевт доры — 10-15 мурт, быдэн 4 адямиен — дерматолог но психиатр доры, невропатолог доры — 10 мурт. Кылем арен ӵошатыса, туэ умоен пусйыны кулэ пиослэсь дырыз дыръя медкомиссиез ортчыны сюлмаськемзэс. Тазалыксэс эскерон кыстӥськоз  декабрёзь.

Тросэз пиос военной службазэс ортчыны дась. Ёрос администрациысь егитъёсын ужанъя секторлэн кичӧлтэмезъя 27-тӥ октябре Призывниклэн нуналыз радъямын вал. Отчы люкаськылӥзы вуоно солдатъёс но соослэн анай-атайёссы. Службазэс оскымон но ӟеч ортчыны  пиослы сӥзизы ёрос администрацилэн йырыз Алексей Семёнов, военком Вячеслав Миронов, службазэ пӧсь интыын ортчытэм Андрей Горынцев.

Призывниклэсь нуналзэ йылпумъяса, Алнаш черкын молебен ортчиз.

Людмила Сурчакова

Туспуктӥз А. Горбунов