Александр Соловьёв: Кышкытлыклэсь утиськон — одӥгез валтӥсь ужпум

Удмурт Дунне
By Удмурт Дунне Ноябрь 5, 2015 15:49

4-тӥ ноябре Удмурт Элькунлы тырме 95 ар. Республикалэн вордскем нуналэныз валче шаерамы ортчозы трос пӧртэм ужрадъёс. Отчы пыриськоз уно сюрс адями. Ма лэсьтӥське таӵе бадӟым ужрадъёсын калыкез кышкытлыклэсь утён понна? Кызьы радъяське Удмуртиысь Терроризмлы пумит комиссилэн ужез? Та сярысь ми вераны куримы Удмуртилэсь Тӧрозэ Александр СОЛОВЬЁВЕЗ. Со кивалтэ та комиссиен.

А. Соловьёв

А. Соловьёв

— Александр Васильевич, элькунмылэсь вордӥськем нуналзэ пусъёнэ трос калык пыриськоз. Ма лэсьтӥське, адямиос асьсэды эркын но каньыл мед шӧдозы шуыса?

— Вераськонмы тупаз элькунмылэн юбилеезлы дасяськонэн. Соин мон нырысь ик ӟечкыласал Удмуртиын вань улӥсьёсты та нуналэн но сӥзьысал котькудӥзлы ӟечсэ гинэ.

Кышкытлыклэсь утиськон сярысь мадёно ке, оскытэм потэ: та ласянь уж мынэ ялан, нимысьтыз чаклам планъёсъя. Али праздникъёс азьын но МВД-ын, МЧС-ын, ФСБ-ын ужасьёсын кенешом валче ужез радъян сярысь. Шутэтскон нуналъёсы службае уногес адямиос потозы, соос борды итӥськозы калык дружинае ветлӥсьёс но казакъёс. Бадӟым ужрадъёс ваньмыз эскеремын-чакламын луозы.

— Дуннеын югдур ӟырдамын. Уката ик Сириысь террористъёсын нюръяськонэз кужмоятэмен валче. Таӵе вакытэ комиссилэн ужез мукет сяменгес-а радъяське?

— Бен, югдур котькудмес кужмогес кариськыны косэ. Россиын Национальной антитеррористической комитет (НАК) кылдытэмын вал 2006-тӥ арын. Солэсь ёзъёссэ усьтӥзы улосъёсын но. Та нуналъёсы ми дасяськом комиссимылэсь 50-тӥ заседанизэ. Отын нош эскером планъя чаклам кык-куинь ужпумъёсты, куд-ог кивалтӥсьёслэсь кылзэс юалом, азьланезлы ужан радмес учком. Ми шара ужаськом. Сайтын вань комиссилэн решениосыз. Котькуд мылкыд карись мурт быгатэ соосты каньылэн шедьтыны.

Терроризмлы пумит комиссилэн валтӥсь ужпумез — трос калыко интыосын (школаосын, вуз карон юртъёсын), транспортын, энергетикая но мукет валтӥсь объектъёсын кышкытлыклэсь утиськонэз радъян. Валамон, та ужен нырысь ик выро нимысьтыз кун органъёс, предприятиослэн безопасностья службаоссы.

Кыкетӥез ужпум герӟаськемын идеологиен. Кун власть палэнтыны, алыны кулэ терроризм мылкыдъёслы вӧлмыны юрттӥсь мугъёсты. Россиын юнматэмын Терроризм идеологилы пумитъяськонъя огъя план, со чакламын 2018-тӥ арозь. Президентэн юнматэм планэз быдэстон понна кыл куто Терроризмлы пумит комиссия, Элькун Тӧролэн но Кивалтэтлэн администрацизы, министерствоос, интыосысь кивалтӥсьёс.

Асьме шаерын планэз быдэстон ласянь чакламын кӧня ке нимысьтыз ужрадъёс. Кылсярысь, туэ январе ми эскерим но юнматӥм пӧртэм ведомствоосты огазеясь документэз, кытын возьматэмын котькуд ёз азе пуктэм ужпумъёс. Мартэ Удмурт Элькунлэн этносоциальной азинсконъя программаяз терроризмен нюръяськонъя ватсанъёс пыртӥм. Огъя вераса, ваньмыз син азьын, ваньзэ чакласа возьыны тыршиськом.

— Кышкыт учыръёсты алон ужез нырысь ик кулэ радъяны егитъёс пӧлын, уго ӵапак соос мукетъёсызлэсь азьло сётӥськыны быгато умойтэм мылкыдъёслы. Ма лэсьтӥське та ласянь?

— Зэм, умоеныз ӵош егитъёс пӧлын вӧлмо урод сямъёс но. Терроризм котькуд адямилы но быдэс обществолы кышкытлык вайись идеология луэ шуыса вераны тыршиськом школаосын, училищеосын, вузъёсын. Дышетскись пиналъёслы дасямын религиозной культурая но светской этикая нимысьтыз курс. Терроризмен нюръяськонлы сӥзем нуналэ — 3-тӥ сентябре — ваньмаз дышетскон учреждениосын ортчо пӧртэм ужрадъёс.

Но ватытэк вераны кулэ: сыӵе пумиськонъёсы пырисько югдурез валась егитъёс. Нош осконтэм пиос но нылъёс палэнэгес кылё. Шуом, пӧлазы пумисько Ислам кунлы синмаськисьёс.

— Тӥ поттылӥды Ислам государствоез. Пыр-почгес вералэ вал со сярысь.

— Ислам кун — террор вӧлмытӥсь огазеяськон. Кылем ар пумын Россиысь Вылӥ суд сое кышкытлык вайись огазеяськонэн лыдъяз но асьме кунын солы ужаны пумит луэмзэ вераз. Кызьы тодмо, та огазеяськон огъя халифат кылдытон мылкыдын улэ, бордаз экстремистъёсты но радикалъёсты кыскыны турттэ. Ислам кунэн кивалтӥсьёс тыршо ас палазы берыктыны мусульман калыкъёсты. Сыӵеос вань Россиын но.

Мон шонерен лыдъясько Владимир Путинлэсь Ислам кун ласянь вамышъёссэ. Тушмонэз быдтоно. Озьы ӧм лэсьтэ ке, террористъёс асьсэос дорамы вуозы, но соку нюръяськыны бер луоз ни.

— Ма лэсьтӥське егитъёсын ужез радъян ласянь асьме вылӥ дышетскон учреждениосын?

— Идеологиен герӟаськем ужен одно ик выроно. Нуналмысь. Дугдылытэк. Туж чакласькыса. Но вузъёсын куддыр шуо: милям ужмы — дышетон. Уставъёссыя учконо ке, озьы со. Но мон лыдъясько, егитъёслы ӟеч сямъёс пыӵатон потэ дышетон учреждениослэн кивалтӥсьёссы бордысь но. Югдурез кулэезъя дунъясь ректоръёс ужез радъян амал шедьто, дышетскисьёссэс урод мылкыдъёслэсь утьыны сюлмасько. Оскисько, сыӵе учкон ваньмаз вузъёсын вӧлмоз.

Монэ юнгес шугъяськытэ шоро-куспо дышетсконниосын югдур. Ӵапак ссузъёсын ӵемгес шараясько экстремизм мылкыдо адямиос, инмарлы оскон яке национализм шӧмо малпанъёс. Мон малпамъя, училищеосын, колледжъёсын дышетон программае пыртоно нимысьтыз курсъёс.

— Нош кызьы тӥ дунъяськоды ивор вӧлмытӥсьёслэсь ужамзэс?

— Журналистъёс терроризмлэсь утиськон ужын туж кулэ. Соос та удысэ кыскыны кулэ уногес калыкез. Со понна шаерамы ялэмын «Журналистъёс террорлы пумит» конкурс. Пайдаез вань. Умойтэм мылкыдъёслэсь утиськонлы сӥзем материалъёс пумен тросгес луо.
Шуггес югдур Интернетэн. Бен, эрикрадъёсты утись федерал ёзъёс вотэсэз чакласа возё, экстремизм шӧмо материалъёсты, вӧлмытыны лэзьымтэ иворъёсты интыямез нимысьтыз учко. НАК-лэн лыдпусъёсызъя Россиын шараямын ни Интернетын терроризм ужпумъёсын выронъя сюрслэсь уно учыр. Ӝутэмын уголовной ужъёс. Жаляса верано, асьмеос но палэнэ ӧм кыле. Куд-ог эшъёс вотэсэ интыяллям терроризмез шонерен лыдъясь ивортонъёс. Соослэсь кылзэс законъя юалозы.

— Ма лэсьтыны луоно на, ивор дуннеын кырсь материалъёс медаз кылдэ шуыса?

— Кышкытлыклэсь утиськон вылысь нимысьтыз кун ёзъёс Интернетысь сайтъёсты, адресъёсты ворсало. Но… Сюзэ пытсало, соос интые отын ик сюрс вылез сайт усьтӥське. Милемыз шугъяськытэ УФСИН-лэн учреждениосаз кылдэм югдур но. Ивор вӧлмытонъя туала амалъёс чотын отын кылдо экстремизм огазеяськонъёс.

Юанъёс кылдо Инмарлы осконэн герӟаськем дышетсконэн, тужгес но егитъёс кунгож сьӧры дышетскыны кошкыку. Но ми тыршиськом та удысэз но чакласа возьыны.

Вераськонмес йылпумъяса, верам потэ на: терроризмен нюръяськонын асьмелы валче луоно. Ваньмы дэмен ӧм басьтӥське ке та через быдтон борды, капчияк шокчыны уз луы.

Сергей Захаров

Туспуктӥз Э. Карипов

Удмурт Дунне
By Удмурт Дунне Ноябрь 5, 2015 15:49
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<