Театр — споръяськон инты. Кызьы сайкатоно учкисез?

Удмурт Дунне
By Удмурт Дунне 24 ноября, 2015 12:30
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Кыӵе со, Ижысь туала театр? Со сярысь мадиз театр культураез вӧлмытӥсь Павел Зорин. Павел тодмо луиз егитъёслэн Les Partisans театрзылэн режиссёрез сямен, ЦСДР (Центр Современной  Драматургии и режиссуры), ШУД (Школа Удмуртской Драматургии), «Студия культурной журналистики» проектъёсты нуэменыз. Со пьесаос гожъя, borhes.livejournal.com блогаз Россиысь но дуннеысь театр улонэн тодматэ.

зорин

Павел Зорин, егитъёслэн Les Partisans театрзылэн режиссёрез.

П. З. Кельшиз-а «партизанъёслэн» «Колбаса. Фрагменты» спектакльзы? Тросэз мӧйы удмуртъёс спектакль бере мыным ӝожзэс, йыркурзэс веразы. Валэктоно луиз пьесалэсь философской пуштроссэ, собере ини калык валатскиз. Нош егитъёслы постановка кельше.

Л. Д. Нырысь лыдӟи пьесазэ, собере, дыр ортчыса гинэ, мынӥ спектакле. «Колбасаез» мыным валаны секыт вал: ваньзэ ас вылам басьтӥсько, удмурт луэменым юнме шорысь мыскыллямез выльысь чидам кадь луисько, сыӵеез сярысь поттылыны мылкыд ӧвӧл. Пьесаез валан понна трос малпаськоно луиз.

П. З. Ми спектаклез пӧртэм каръёсын возьма-тӥмы. Тужгес но секытэн сое Удмуртиын пумитало. Укыр матын но тодмо со ваньмыз: пӧртэм национальностен муртъёслэн ог-огзы сярысь ултӥяса вераськемзы. Мон ачим удмурт, «вотяк» — ултӥян кыл шуыса, тодӥсько. Та пьесаын быдэс Удмуртия адӟиське. Авторез Валерий Шергин уг вала кадь, макем мур пуштросо пьеса со гожтӥз.

Л. Д. Кемалась ик ӧвӧл огез тодмо режиссёрмы шуиз: туала театрын солы тужгес но уг кельшы «чернухаез» возьматон. Мукетыз бадӟым мурт вераз: искусство одно ик умоезлы, ӟечезлы дышетыны кулэ.

П. З. Туала вакытэ адямиос асьсэос бырйыны кулэ, мае соос уродэн лыдъяло, нош мае — умоен. Дышетон, югдытон кемалась вужмизы ини. Туала адямилэн пуш дуннеез укыр шуг но ӟуго-ӟуго, сое капчиен гинэ мертаны но дунъет сётыны уг луы. Театрлы возьматыны кулэ тае ваньзэ, нош дунъет сётонлэсь, тӧдьылы но сьӧдлы люконлэсь куштӥськоно. Театр шоры шуг-секытъёсты вунэтон амал но шутэтскон инты шоры кадь гинэ учкон — со эскапизм*. Учкисьлэн но пушказ маке мед бугырскоз, малпаськыны мед дышоз. Кытын эшшо секыт ужпумъёс сярысь вераськод? Судын-а? Судын бер луэ ни. Театр — споръяськон, эчешон инты.

Л. Д. Малпасько, учкисез будэтоно, шугезлы дасяно. Оло, соин но тӥ журналистикая студия усьтӥды, ЦСДР-ын пьесаосты шара лыдӟиськоды?

П. З. Ижысь театр туж азинскиз, нош дышетскем критикъёсмы уг тырмо. Адямиос мылкыдзэс вотэсэ гожто ке но, комментарийёссы «кельшиз — ӧз кельшы» выллем гинэ пӧрмо. Соин сэрен студия сярысь малпан кылдӥз. ЦСДР-ын ми туала драматургъёслэн ужъёсынызы тодматыны тыршиськом, пьесаосты шара лыдӟыса. Спектакль пуктыны трос дыр но кужым кулэ. Нош тазьы капчигес пӧрме учкисез выль пьесаосын тодматыны.

Иже гастроле мукет театръёс шер ветло. Куддыръя лыктыло театръёс, но соос ӟеч постановкаосты уг вайыло. Огъя вераса, учкисьлы номыре адӟыны. Оло, соин но, дышымтэ шорысь, Ижысь Ӟуч театрын выль амалэн пуктэм классикаез (Пётр Шерешевский режиссёрлэсь А. Пушкинлэн «Маленькие трагедии» пьесаосызъя пуктэм спектакльзэ — Л. Д.) учкисьёс ӧз валалэ, чагиськон гожтӥзы.

Л. Д. Соин ик тӥляд Les Partisans театрды Ижлэн улоназ пыриз но аслэсьтыз учкисьсэ шедьтӥз. «Партизанъёс» доры тросгес егитъёс ветло.

П. З. Со ӝогак ӧз пӧрмы. Нырысь калык ӧжыт люкаськылӥз — ог 50 адями. Али ини спектакльёсын аншлагъёс луыло. Ми котькыӵе арлыдо адямилы тупась постановкаос шедьтыны тыршиськом. Малпаськиськом вуоно учкисьёс сярысь но. Тросэз учкисьёсмы шуо: нырысьсэ театре вуимы. Али Ижысь театръёсын номыр учкыны. Ӟуч театр но весь комедиос пуктылӥз. Но со но воштӥське ини, туалагес луэ.

Л. Д. Кызьы соос воштӥськыны быгатӥзы?

П. З. Егит режиссёръёсын лаборатория радъязы. Солы луыса театрын Дмитрий Удовиченко М. МакДонахлэсь «Человек-подушка» пьесазэ пуктӥз. «Человек-подушка» бордын ужасьёс туэ Удмуртилэсь Кун премизэ басьтӥзы. Озьыен, государство но дунъя туала улонысь лэчыт ужпумъёсты возьматӥсь постановкаосты.

XtQPE6D64m0

ЦСДР-ын егит драматургъёслэсь пьесаоссэс лыдӟон.

Л. Д. М. МакДонахлэн пьесаезъя спектакль абдрано кадь сюжетэныз бордаз кыске. Берло дыре мае мон учкылӥ — Екатеринбургысь Коляда-Театрлэсь постановказэ, Шерешевскийлэсь Ӟуч театрын пуктэм ужъёссэ — ваньмыз, пӧртэм тыл но крезьгур спецэффектъёсты кутыса, шоу выллем пуктэмын.

П. З. Туала адямилэн малпаськон амалыз крезьгур клиплы кельше. Шуом, кузь статьяосты лыдӟон куспын телефонэз, почтаез трос пол эскериськод. Адямилэсь сыӵе сямзэ но лыдэ басьтоно луэ. Тани «Колбаса» спектакльмы но фрагментъёслэсь кылдытэмын.

Л. Д. Кызьы та ласянь Удмурт театр адӟиське?

П. З. Удмурт театре мае учкыны мынод, егит артистъёсты сяна. Соосын пуктэм «Гужем уе вӧтан» яке, шуом, «Ревизор» мар сярысь? Кызьы ке но туала улонэн герӟаськемын-а та спектакльёс? Азьло даурысь костюмъёсын дӥсяськыса но, туала ужпумъёсты возьматыны луоно ке но…

Малпасько, та театрын ӧвӧл адями, кудӥз югдурез воштыны быгатысал. Асьсэос соос выльзэ утчаны тыршо. Туэ «Ватос но гипноз» спектаклен пыриськизы туала драматургилы сӥзем «Коляда-Plays» фестивале. Пичи сценазэс лэсьтон бордын ужало ни. Кема ни, ог 5 ар, пичи сцена сярысь вераськон мынэ. Мед пуктозы удмурт кылын нылпи спектакльёс но…

Л. Д. Алексей Ложкин, театрлэн валтӥсь режиссёрез, вераз: удмурт кылын нылпи спектакльёсты возьматыны нокинлы.

П. З. Нырысь соос мед ӵектозы спектакльёсты, собере учкись но лыктоз!

* * *

Павел Зоринэн вераськеме бере мынам таӵе малпанэ кылдӥз: театр учкисьлы ӵектӥськыны быгатыны кулэ. Учкись туж ӝог ваньмызлэсь акыльтэ, весь воштӥське, выльзэ вите. Туала учкисьёсъя кариськыса, театръёс выль сценической амалъёс утчало, выль ужпумъёс но темаос сярысь поттыло. Соин но туала театр — споръяськонъёс но экспериментъёс ортчытон инты.

* Эскапизм — улонысь шуг-секытъёслэсь ватскыны тыршыса малпам дуннее выён.

 Лариса Дмитриева

Туспуктӥз Александр Шкляев

Удмурт Дунне
By Удмурт Дунне 24 ноября, 2015 12:30